រឿងរ៉ាវឈឺសន្លាក់រុំារ៉ៃនៅក្នុងប្រទេសកម្ពុជា ភាគច្រើនគេសង្កេតឃើញកើតមានទៅលើមនុស្សវ័យចំណាស់ដោយមានអាយុចាប់ពី៥០ឆ្នាំឡើងទៅ ហើយអាចមានករណីខ្លះកើតចំពោះក្មេង និងមនុស្សពេញវ័យផងដែរ។ មូលហេតុនៅក្រោយនៃបញ្ហាឈឺសន្លាក់នេះ គឺអាចបណ្តាលមកពីកត្តាច្រើនយ៉ាងណាដូចជា ផឹកគ្រឿងស្រវឹង កង្វះជីវជាតិនៅក្នុងខ្លួន ទម្លាប់សកម្មភាពប្រចាំ កត្តាជំងឺប្រចាំកាយ ក៏ដូចជាការប្រើប្រាស់នូវថ្នាំមួយចំនួន។

ហេតុនេះហើយ ដើម្បីជួយសម្រួលទៅសុខភាពសន្លាក់ទូទៅ ផ្អែកទៅតាមប្រភពចេញផ្សាយរបស់គេហទំព័រ forthealthcare និង caryortho បានលើកឡើងនូវគន្លឹះសំខាន់ៗទាក់ទិនទៅនឹងការថែរក្សាសន្លាក់ កុំឱ្យមានបញ្ហា៖

- ការគ្រប់គ្រងទម្ងន់រាងកាយ៖ ប្រសិនបើអ្នកលើសទម្ងន់ សូមកំណត់ការទទួលយករបបអាហារ ដែលមានសុខភាពល្អ និងការធ្វើលំហាត់ប្រាណទៀងទាត់ ដើម្បីអាចជួយអ្នកក្នុងការគ្រប់គ្រង ទម្ងន់រាងកាយ។

- រក្សាសកម្មភាព៖ ទម្លាប់នៃសកម្មភាពគឺជាផ្នែកមួយដែលជួយឱ្យសន្លាក់មានសុខភាព ប៉ុន្តែគួរជ្រើសរើសទម្រង់នៃការធ្វើលំហាត់ប្រាណដែលមានប្រសិទ្ធភាព (ដូចជាហែលទឹក ដើរ ឬជិះកង់ជាដើម)។

- ការម៉ាស្សា៖ សាច់ដុំនៅជុំវិញសន្លាក់ ដើរតួយ៉ាងសំខាន់ក្នុងការរក្សានូវស្ថេរភាព និងមុខងារ រាងកាយ។ ការអនុវត្តឱ្យបានទៀងទាត់នូវការម៉ាស្សាជាប្រចាំអាចជួយ សម្រួលនូវអាការៈ ចុករោយ ឬបំបាត់អាការៈរលាកសន្លាក់។

- ការបរិភោគអាហារ៖ ព្យាយាមទទួលទានត្រីដែលមានសារជាតិខ្លាញ់ល្អឱ្យបានច្រើន ដូចជាត្រីសាម៉ុង ត្រីសាឌីន ដើម្បីទទួលបានអត្ថប្រយោជន៍ប្រឆាំងនឹងការរលាកសន្លាក់។ ប្រភពអាហារផ្សេងទៀតដែលជួយដល់សុខភាពសន្លាក់រួមមាន តែបៃតង គ្រប់ធញ្ញជាតិ ខ្ញី ទឹកដោះគោជូ ឬផ្លែទទឺម រូមទាំងបរិភោគទឹកឱ្យបានគ្រប់គ្រាន់៕