ជីវិតមនុស្សម្នាក់ៗត្រូវការចាំបាច់ណាស់ក្នុងការថែរក្សាសុខភាពទាំងកាយនិងចិត្តឱ្យល្អ ដើម្បីមានថាមពលគ្រប់គ្រាន់ទៅប្រឈមមុខនឹងបញ្ហាផ្សេងៗដែលកំពុងកើតមានក្នុងលំហនៃជីវិតយើង។

ជាមួយគ្នានេះមានកត្តាច្រើនណាស់ចូលរួមចំណែកក្នុងការធ្វើឱ្យសុខភាពផ្លូវចិត្តប្រសើរឡើង ដូចជាហាត់ប្រាណ ការញុំា ការគេង ជាដើម។ហើយថ្ងៃនេះចាបបៃតងនឹងនាំទាំងអស់គ្នាទៅយល់ដឹងបន្ថែមទៀតពីទម្លាប់នៃការរស់នៅដើម្បីឱ្យសុខភាពផ្លូវចិត្តល្អ អាយុវែង និងជៀសបានជំងឺកាចមួយចំនួន។

យោងតាមការឱ្យដឹងរបស់ទស្សនាវដ្តី JAMA Network Open ការសិក្សាបានរកឃើញថាការមានកន្លែងបៃតងជុំវិញផ្ទះ និងសង្កាត់ដែលអ្នករស់នៅអាចធ្វើអោយប្រសើរឡើងនូវល្បឿនដំណើរការយល់ដឹងទាំងមូលរបស់ខួរក្បាលផងដែរ។បន្ថែមពីលើនេះសម្រាប់អ្នកដែលលំហែអារម្មណ៍ក្នុងសួនជាញឹកញាប់ ក៏អាចជួយកាត់បន្ថែមបញ្ហាធ្លាក់ទឹកចិត្តបានផងដែរ។នេះបើតាមការចុះផ្សាយរបស់ neurosciencenews។

បន្ថែមពីនេះយោងតាម nrpa.orgបានបង្ហើបឱ្យដឹងដែរថាចំពោះបុគ្គលដែលមានទម្លាប់ទៅលេងសួនច្បារបៃតងរៀងរាល់មួយសប្ដាហ៍៣ដង អាចមានសុខភាពផ្លូវចិត្តប្រសើរជាងបុគ្គលដែលមិនបានទៅ។បន្ថែមពីនេះប្រសិនបើអ្នកបានធ្វើចលនារាងកាយ(ការរត់ហាត់ប្រាណ យូហ្គា...)នៅតំបនបៃតងទៀតនោះ នឹងជួយទាំងរាងកាយនិងផ្លូវចិត្តអ្នកកាន់តែប្រសើរទៀត​ជាពិសេស បញ្ហាសម្ពាធឈាម កម្រិតកូឡេស្តេរ៉ុល និងភាពតានតឹងនឹងកាត់បន្ថយបានល្អ ។

យោងតាមប្រភព medicinenet ចុះផ្សាយកាលពីឆ្នាំ២០១៩ ដែលសិក្សាពីធម្មជាតិបៃតងជាមួយជីវិតយើងមួយទៀតនោះបានលើកឡើងដែរថាមិនត្រឹមតែលំហាត់ប្រាណនិងការញុំាត្រឹមត្រូវទេដែលអាចជួយឱ្យអាយុវែង សូម្បីតែការរស់នៅជាមួយទីធ្លាដែលមានរុក្ខជាតិបៃតងក៏អាចជួយឱ្យរស់នៅបានយូរអង្វែងដែរ។

ធម្មជាតិពិតជាមានតម្លៃណាស់សម្រាប់ពិភពលោកទាំងមូលក្នុងនោះក៏មានជីវិតយើងផងដែរ ហេតុនេះប្រសិនបើអ្នកចង់បានភាពស្រស់ថ្លានៃអារម្មណ៍ សូមកុំភ្លេចផ្សាភ្ជាប់ជីវិតនឹងធម្មជាតិ ដើម្បីសុខភាពប្រសើរឡើងទាំងកាយនិងចិត្ត។

អត្ថបទដោយ៖ ភោគ ម៉ារី