ចំណងស្នេហានិងមិត្តភាពសុទ្ធតែដើរតួសំខាន់សម្រាប់ដំណើរជីវិតយើងគ្រប់គ្នា ហើយក៏មានចំណងស្នេហាខ្លះកាន់តែមានសំណាងដោយសារ តែដៃគូរបស់ខ្លួនអាចបំពេញភារកិច្ចជាមិត្តភក្តិបានមួយផ្នែក ធ្វើឱ្យចំណងស្នេហាខ្លួនកាន់តែមានសុភមង្គលថែមទៀត។

តាមការឱ្យដឹងរបស់ powerofpositivityបានលើកឡើងពីចំណុចសម្គាល់៤ ដែលអាចសន្មត់ថាដៃគូអ្នកកំពុជាមិត្តភក្តិដ៏ល្អបន្ថែមពីជាដៃគូស្នេហាថែមទៀត ដែលអ្នកគួររក្សាដៃគូនេះឱ្យបានល្អព្រោះជាសំណាងដែលអ្នកបានគេជាដៃគូបន្តដំណើរទៅថ្ងៃមុខដ៏វែងឆ្ងាយជាមួយគ្នាបាន។

ចំណុចពិសេសទាំង៤នោះរួមមាន៖

១.អ្នកអាចមានពេលបង្កភាពក្អាកក្អាយជាមួយគ្នា

ពិតណាស់ជីវិតមិនអាចគេចផុតពីការកើតទុក្ខ តែក្នុងនោះក៏អាចមានតួអង្គលួងលោម ឬបង្កស្ថានភាពរីករាយសើចសប្បាយឱ្យដល់ជីវិតអ្នកមួយប៉ប្រិចភ្នែក ដោយមិនដឹងខ្លួនអ្នកផងដែរ។ដោយនេះហើយជាមនុស្សដែល ផ្ដល់អត្ថន័យឱ្យជីវិតអ្នកមួយផ្នែក ដែលយល់ពីអ្នក អាចកែប្រែស្ថានភាពមិនល្អរបស់អ្នក ដឹងពីតម្រូវការអ្នក បីដូចខ្លួនតែមួយឬមិត្តជំនិតផ្ទាល់ខ្លួន ដូច្នេះដែរ។

២.អ្នកមានអារម្មណ៍សុវត្ថិភាពពេលនៅជាមួយគ្នា

បើគិតដល់មិត្តភក្តិអ្នកអាចជួបគេច្រើននៅពេលអ្នកមិនរីករាយ ឬមានរឿងក្នុងចិត្តពេលខ្លះគ្រាន់តែបាននៅក្បែរនិយាយលេងជាមួយមិត្តអ្នកក៏រំសាយភាពទុក្ខព្រួយដែរហើយមិនចង់ឱ្យពួកគេចាកចេញពីអ្នកឡើយ ដោយសារអារម្មណ៍ដ៏ល្អនៅពេលអ្នកចំណាយពេលនៅក្បែរគ្នានោះឯង។មិនខុសគ្នាប៉ុន្មានដែរពីដៃគូដែលលក្ខណៈសម្បត្តិល្អដូចមិត្តភក្តិគឺអ្នកមានអារម្មណ៍ថាគ្រប់យ៉ាងបានធូរស្បើយនៅពេលមានពេលជាមួយមនុស្សម្នាក់នោះ ដោយមិនចាំបាច់មានកម្មវិធីឬបរិយាកាសអច្ចារ្យអ្វីក៏ដោយ។

៣.អ្នកអាចខឹងគ្នាតែមិនព្រមបញ្ចប់ចំណងទំនាក់ទំនងដោយងាយៗ

ជាដៃគូនឹងគ្នាប្រហែលជាអ្នកមានរឿងជាច្រើនត្រូវជជែក ត្រូវសប្បាយ ហើយក៏ត្រូវកើតទុក្ខនិងមានការអន់ចិត្តឬ ខឹងគ្នាផងដែរ ហើយចំណុចមួយដែលល្អសម្រាប់ដៃគូនិងជាមិត្តដ៏ល្អសម្រាប់គ្នានោះគឺ អាចលើកលែង ហើយស្រុះស្រួលគ្នាវិញបានដោយមិនហាមាត់បញ្ចប់ចំណងស្នេហាគ្នាទាំងកំហឹង។

៤.អាចចុះសម្រុងជាមួយមិត្តរបស់អ្នក

មិត្តភក្តិគ្នាគឺអាច ចុះសម្រុងជាមួយមិត្តដ៏ទៃទៀតបាន ហើយអាចមានពេលវេលាជជែក ឬសប្បាយជាមួយគ្នា ដោយមិនមានអារម្មណ៍ទើសទាល់។នេះហើយជាអ្វីដែលអ្នកអាចកត់សម្គាល់បានយ៉ាងងាយ។

មានមិត្តមានដៃគូដ៏យល់ចិត្តអាច បង្កភាពរីករាយ ហើយមានទុក្ខព្រួយជាមួយគ្នា តែមិនចាកចោលគ្នា នេះហើយជាសំណាង និងបង្កប់អត្ថន័យដ៏ឧត្តមសម្រាប់ជីវិត ចូលថែរក្សានិងលើកតម្កើង ចំណងទំនាក់ទំនងបែបនេះឱ្យកាន់តែប្រសើរនោះជីវិតអ្នកនឹងរឹតតែមានក្ដីសុខ ទោះក្នុងគ្រាលំបាក។

អត្ថបទដោយ៖ ភោគ ម៉ារី