១.តំណពូជ៖ តាមលោកវេជ្ជបណ្ឌិត ចាន់ បញ្ញាសុខា ឯកទេសផ្នែកបេះដូង និងសរសៃឈាម បានលើកឡើងថា ជំងឺលើសឈាមមិនមែនជាជំងឺឆ្លង ឬជំងឺតពូជនោះទេ ប៉ុន្តែវាត្រូវបានកំណត់ថាជាជំងឺដែលមានលក្ខណៈគ្រួសារ បានន័យថា វាមានហ្សែនកំណត់។ ករណីក្នុងក្រុមគ្រួសារមួយដែលមានម្តាយ ឬឳពុកកើតជំងឺលើសសម្ពាធឈាមនោះ កូនៗនឹងអាចមានលទ្ធភាពប្រឈមនឹងជំងឺនេះក្នុងភាគរយខ្ពស់ជាងអ្នកដទៃផងដែរ។

២. គ្រឿងស្រវឹង៖ ការញ៉ាំគ្រឿងស្រវឹងញឹកញាប់យូរៗទៅអាចធ្វើឱ្យសម្ភាធឈាមកើនឡើង និងអាចបណ្តាលឱ្យខូចបេះដូង នេះជាកត្តាឆក់ជីវិតរបស់អ្នកលឿនណាស់។ បើយោងតាមអ្នកឧកញ៉ាវេជ្ជបណ្ឌិត គួច ម៉េងលី​ មានប្រសាសន៍ថា “ជំងឺសសៃឈាមយើងនឹងមានបញ្ហា បើយើងមិនហាត់ប្រាណ ផឹកស្រាជាប្រចាំថ្ងៃ ឬញុំាសាច់មានជាតិខ្លាញ់ច្រើនពេក ហើយយើងអត់​ដុត​ជាតិខ្លាញ់តាមរយៈការហាត់ប្រាណ វានឹង​​​ស្តុកទុកក្នុងសសៃឈាមយើង ធ្វើឱ្យសសៃឈាមរួមតូច នោះវានឹងបង្កសម្ពាធឈាមឡើងខ្ពស់ មកពីខ្លាញ់ក្នុងសរសៃឈាមយើងច្រើន ធ្វើឱ្យឈាមមិនអាច​ធ្វើរត់ស្រួល”។ អ្នកដឹងហើយថា ស្រាសម្បូរជាតិពុលណាស់ បើនៅក្នុងរាងកាយស្រូបជាតិពុលច្រើន តើបេះដូង ថ្លើម និងសរសៃឈាម ប៉ះពាល់អ្វីខ្លះ? តើជីវិតរបស់អ្នកមានជំងឺកាចបែបនេះ រស់នៅដល់អាយុប៉ុន្មានដែរ?

៣. ជក់បារី៖ តាមលោកវេជ្ជបណ្ឌិត ឃ្លាំង សៀងលី ផ្នែកវេជ្ជសាស្ត្រនៅមន្ទីរពេទ្យបង្អែកអ្នកលឿងបានលើកឡើងថា ការជក់បារីមិនត្រឹមតែបង្កើនសម្ពាធឈាមប៉ុណ្ណោះទេ ប៉ុន្តែសារធាតុគីមីដែលមាននៅក្នុងបារីក៏អាចបំផ្លាញស្រទាប់ជញ្ជាំងសរសៃឈាមរបស់យើងខ្លាំងដែលអាចបណ្តាលឱ្យសរសៃឈាមរួមតូច និងបង្កើនហានិភ័យនៃជំងឺបេះដូង ហើយផ្សែងបារីក៏អាចបង្កើនហានិភ័យជំងឺបេះដូង។ ហើយភាគច្រើនចាស់ៗ ដែលជក់បារីច្រើនមានហានិភ័យដល់អាយុជីវិតលឿន ព្រោះតែវាប៉ះពាល់បេះដូងខ្លាំង។

៤. កុំទម្លាប់ញុំាសម្លផងទឹកទឹកត្រីផង៖ មនុស្សជាច្រើនតែងមានទម្លាប់បន្ថែមទឹកត្រីទឹកជ្រលក់ជាមួយម្ហូបអាហារទាំងដែលជាតិអំបិលគ្រប់គ្រាន់មានក្នុងសម្ល ការទម្លាប់ញុំាដូច្នេះអាចបង្កជាគ្រោះថ្នាក់ដល់សុខភាពបាន ដូចនេះគួរព្យាយាមកាត់បន្ថយ។ តាមលោកវេជ្ជបណ្ឌិត Dr. Laffin នៃមន្ទីពេទ្យ Cleveland បានលើកឡើងថា ការញ៉ាំប្រៃច្រើន ធ្វើឱ្យមានបញ្ហាចាល់ជាតិទឹកក្នុងរាងកាយជាផ្នែកមួយវិវត្ដទៅរកជំងឺលើសឈាម។ ការលើសឈាមជាហានិភ័យខ្ពស់នាំឱ្យកើតជំងឺគាំងបេះដូង ហើយខ្សោយបេះដូង និងងាយគ្រោះថ្នាក់ដល់សរសៃឈាមខួរក្បាលលឿន៕ អត្ថបទដោយ៖ ទ្រ សុភាព