បញ្ហាក្រួសក្នុងតម្រងនោមតែងកើតឡើងនៅពេលជាតិកាល់ស្យូមមានវត្តមានច្រើនលើសពេកក្នុងតម្រងនោម។ ក្រួសក្នុងតម្រងនោមអាចបង្កការឈឺចាប់ខ្លាំងនៅពេលវាប្រែជាមានទំហំធំ។ ស្របពេលដែលអ្នកកំពុងតែមានជំងឺក្រួសក្នុងតម្រងនោមការបរិភោគ របៀបថែទាំរស់នៅ និងព្យាបាលឱ្យបានត្រឹមត្រូវពិតជាសំខាន់ខ្លាំងណាស់ដើម្បីជួយឲ្យតម្រងនោមឆាប់ជាសះស្បើយ និងកុំកើតឡើងវិញម្ដងទៀត។

ជាក់ស្ដែងលោកវេជ្ជបណ្ឌិត Do Anh Toan ប្រធាននាយកដ្ឋានវះកាត់ក្រួសក្នុងតម្រងនោម មន្ទីរពេទ្យ Binh Dan បានរៀបរាប់ឲ្យដឹងថា ក្រួសនៅក្នុងតម្រងនោមត្រូវបានរកឃើញថា ជាប្រភេទសារធាតុ Calcium oxalate monohydrate និង brushite គឺជាគ្រាប់ថ្មរឹងខ្លាំង ខណៈក្រួសកាល់ស្យូម oxalate គឺតែងតែមាននៅក្នុងតម្រងនោមអ្នកជំងឺប្រហែល៦០ទៅ៧០% ។

ដោយឡែកលោកវេជ្ជបណ្ឌិតបានព្រមានអ្នកជំងឺក្រួសតម្រងនោមមិនគួរបរិភោគអាហារសម្បូរ oxalate ច្រើនទេ ដែលប្រភេទអាហារទាំងនេះនឹងចូលទៅបង្កើនក្រួសបន្ថែមនៅក្នុងតម្រងនោមមានន័យថាកាន់តែបរិភោគកាន់តែគ្រោះថ្នាក់ចំពោះតម្រងនោម។ ខណៈអាហារផ្លែឈើទាំងនោះរួមមាន ផ្លែប៊ឺរី ស្ត្របឺរី ទំពាំងបាយជូ គីវី ក្រូច ដំឡូងផ្អែមជាដើម។ ចំពោះបន្លែមានដូចជា ស្ពៃ ការ៉ុត ប៉េងប៉ោះ ត្រប់ ពោតបារាំង ឆៃថាវជាដើម។ អ្នកជំងឺគួរតែចៀសវាងការទទួលទានសណ្តែកច្រើន គ្រាប់អាល់ម៉ុន គ្រាប់ស្វាយចន្ទី រួមទាំងភេសជ្ជៈទឹកផ្លែឈើផងដែរ។ គួរបញ្ជាក់ដែរថា អាហារទាំងនេះមិនមែនមិនល្អសម្រាប់សុខភាព គ្រាន់តែអ្នកជំងឺក្រួសតម្រងនោម គួរចៀសវាង។

ទន្ទឹមនឹងនេះដែរ ប្រសិនជាអ្នកស្រឡាញ់សុខភាព មិនចង់ឈឺ មិនចង់កើតក្រួសតម្រងនោម ឬខ្សោយក្រលៀនទាំងវ័យក្មេង ដាច់ខាតអ្នកត្រូវបង្កើនទម្លាប់ផឹកទឹកឱ្យបានចាប់ពី២ទៅ៣លីត្រក្នុងមួយថ្ងៃ ។ ជាពិសេសត្រូវយកចិត្តទុកដាក់លើអាហារបំប៉នជាតិកាល់ស្យូម ដែលជាសារធាតុរ៉ែ។ ជាការពិត អ្នកដែលមានក្រួសក្នុងតម្រងនោមត្រូវរក្សារបបអាហារដែលមានជាតិកាល់ស្យូមគ្រប់គ្រាន់ ព្រោះកង្វះជាតិកាល់ស្យូមនឹងបង្កើនហានិភ័យនៃក្រួសតម្រងនោម ៕

អត្ថបទដោយ៖ ស្រីណុច