តម្រងនោមមិនមែន សរីរាង្គមិនចេះខូច តម្រងនោម​មិនមែនមិនចេះរលាក​ តម្រងនោមក៏អាចកើតជាជំងឺក្រួសក្នុងតម្រងនោម និងបាត់បង់មុខងារច្រោះយកជាតិពុលក្នុងរាងកាយ។ តម្រងនោមមិនមែនដែកថែបទេ  ប្រសិនបើអ្នកមិនចេះថែរក្សា ពេលដែលខូច តើអ្នកណាមកឈឺជំនួសអ្នក? សរីរាង្គមួយនេះឈឺម្ដងៗខាតពេលវេលាថែទាំ អស់ទាំងថវិកាមិនចេះតិចឡើយ។

ដូច្នេះចាប់ពីពេលនេះតទៅ ត្រូវយកចិត្តទុកដាក់ថែករក្សាការពារ ដូចជាគេង ញុំាអាហារប៉ូវតម្រងនោម​ ផឹកទឹកឱ្យបានគ្រប់គ្រាន់ ចៀសបានចៀសអាហារកែច្នៃ ប្រៃ ប្រើប្រាស់ថ្នាំគ្មានការណែនាំត្រឹមត្រូវ…។ ជាមួយគ្នានេះដែរ ក្រុមការងារចាបៃតង សូមលើកយកអាហារ៣ប្រភេទ ដែលមាននាទីជំនួយមុខងារតម្រងនោម ឱ្យសកម្ម​ ដែលអាចញុំាបានទាំងអ្នកកំពុងកើតជំងឺតម្រងនោម និងអ្នកចង់ការពារ។

អាហារខាងក្រោមនោះមានដូចជា៖

១. ផ្លែប៉ោម៖ ផ្លែឈើនេះត្រូវបានគេឱ្យឈ្មោះថា ជាស្ដេចផ្លែឈើ ដែលល្អសម្រាប់ជំនួយសុខភាពច្រើន​ ពោល គឺរួមទាំងសុខភាពតម្រងនោមដូចគ្នា។ ផ្លែប៉ោមសម្បូរដោយ វីតាមីនc សារធាតុប្រឆាំងអុកស៊ីតកម្ម ជាតិសរសៃខ្ពស់ ជាជម្រើសល្អ សម្រាប់ជំនួយសុខភាពតម្រងនោម ។

២. ត្រីខ្លាញ់ល្អ៖ មានដូចជាត្រីសាលម៉ុន ធូណា សាឌីន…ជាដើមត្រីទាំងនេះមានផ្ទុកដោយអាស៊ីតខ្លាញ់អូមេហ្កា៣ កាល់ស្យូម ផូស្វ័រ ជាតិដែក ស័ង្កសី ជាតិដែក ម៉ាញ៉េស្យូម និងប៉ូតាស្យូម ល្អសម្រាប់ជួយទ្រទ្រង់មុខងារ តម្រងនោមឱ្យសកម្ម ជាងមុន។

៣.សណ្ដែក៖ សម្បូរដោយ ជាតិសរសៃ ប្រូតេអ៊ីន ជាតិដែក ប៉ូតាស្យូម ម៉ាញេស្យូម… មានផ្ទុកខ្លាញ់អាក្រក់ទាប ល្អសម្រាប់សុខភាពបេះដូង សម្ពាធឈាម និងសុខភាពតម្រងនោមផងដែរ។

គូសបញ្ជាក់ផងដែរថា រាល់អាហារដែលញុំាជាប្រចាំថ្ងៃប្រៀបដូចជាអាវុធមុខ២ ដែលអាចការពារ និងសម្លាប់ជីវិតអ្នកបាន ដូច្នេះមុនញុំាអាហារណាមួយគិតពីផលអាក្រក់ត្រឡប់មកវិញផង៕

អត្ថបទដោយ៖ ប៉ែត ធីតា