នៅក្នុងជីវិតរបស់មនុស្សគ្រប់គ្នាសុទ្ធតែមានបញ្ហាស្មុគស្មាញ ភាពតានតឹង និងអារម្មណ៍អវិជ្ជមានរត់ចូលផ្លូវចិត្ត រហូតធ្វើឱ្យអ្នកមានជំងឺបាក់ទឹកចិត្តផងដែរ។ បើអ្នកមានបញ្ហាអារម្មណ៍បែបនេះ តើអ្នកគួរតែដោះស្រាយយ៉ាងណា? តាមលោកHéctor García និងលោក Francesc Miralles ជាអ្នកនិពន្ធរួមគ្នាបាននិយាយថា ការដឹងពីអ្វីដែលអ្នកអាចគ្រប់គ្រងបាន ឬអ្វីដែលអ្នកមិនអាចគ្រប់គ្រងបាននោះ វាជួយឱ្យអ្នកបានមើលឃើញនៅក្នុងពាក្យអធិដ្ឋាន សមាធិ ភាពស្ងប់ស្ងាត់ក្នុងស្ងប់។ ទោះបីអ្នកមានបញ្ហាត្រូវតែព្យាយាមដោះស្រាយបញ្ហាណាមួយដែលដៃរបស់អ្នកចាប់យកមកដោះស្រាយ វាធ្វើឱ្យផ្លូវចិត្តអ្នកកាន់តែធូរស្រាលឡើង។ ដើម្បីរស់នៅក្នុងបញ្ហាឱ្យមានក្តីស្ងប់នោះ គឺការធ្វើសមាធិនេះឯង។

ព្រោះថាការធ្វើសមាធិជួយឱ្យអ្នកមានសតិអារម្មណ៍អាចគ្រប់គ្រងលើការព្រួយបារម្ភអំពីរឿងដែលហួសពីសមត្ថភាពឬរឿងដែលគ្មានប្រយោជន៍អ្វីសោះ។ ពេលអ្នកធ្វើសមាធិឱ្យអ្នកមានការយល់ដឹងពីអ្វីដែលអ្នកអាចផ្លាស់ប្តូរបាន ដើម្បីបង្កើតលទ្ធផលលើការងារ ក្នុងការទំនាក់ទំនង និងការដឹកនាំរបស់អ្នកឱ្យរីកចម្រើន។ នេះជាលទ្ធផលសមាធិដែលជួយអ្នកឱ្យអាចគ្រប់គ្រង់លើរឿងណាដែលដោះស្រាយបានតែប៉ុណ្ណោះ។ ហើយភាពអវិជ្ជមានក៏រត់ចេញពីផ្លូវចិត្តរបស់អ្នកដែរ។ តាមលោក Epictetus ជាទស្សនៈវិទូក្រិនបានលើកឡើងថា “បញ្ហាកើតចំពោះអ្នកវាមិនមែនជាបញ្ហានោះទេ លុះត្រាអ្នកមានអារម្មណ៍ទៅប្រតិកម្មចំពោះបញ្ហានេះឯង ទើបធ្វើឱ្យចិត្តរបស់អ្នកមានបញ្ហា”។

តាមព្រះពុទ្ធសាសនាបានបញ្ជាក់ថា ការធ្វើសមាធិជាវិធីមួយដើម្បីយល់ដឹងអំពីបំណងប្រាថ្នា និងអារម្មណ៍របស់អ្នកឱ្យមានហេតុផលដើម្បីដោះលែងខ្លួន ឱ្យខួរក្បាលជ្រះស្រលះដោយមិនគិតពីរឿងអ្វីទាំងអស់នោះទេអ្នកកាន់តែល្អប្រសើរឡើងវិញ។ ពេលអ្នកសមាធិជាពេលអ្នកគ្រាន់តែសង្កេតលើគំនិត និងអារម្មណ៍របស់អ្នកដែលវានឹងលេចឡើង ហើយអ្នកមិនចាំបាច់ត្រូវអនុញ្ញាតឱ្យអារម្មណ៍ទាំងនោះគ្រប់គ្រងអ្នកឡើយ។ តាមវិធីសមាធិនេះជួយបណ្តុះគំនិតរបស់អ្នករំលាយកំហឹង ការច្រណែនឈ្នានីស ឬការអាក់អន់ចិត្តទាំងឡាយចេញពីចិត្ត។ នេះជាឥទ្ធិពលសមាធិជួយផ្លូវអារម្មណ៍របស់អ្នករឹងមាំជាងមុន ហើយមានក្តីរីករាយប្រសើរឡើងផងដែរ៕ អត្ថបទដោយ៖ ទ្រ ​សុភាព