នាមុននេះបន្តិចសមាគមបាល់ទាត់ថៃ ឬហៅកាត់ថា FA Thailand បានបង្ហោះសារពាក់ព័ន្ធនឹងការសម្រេចរបស់ខ្លួនជុំវិញការករណីហឹង្សាវាយប្រតាយប្រតប់គ្នារវាងក្រុមជម្រើសជាតិបាល់ទាត់ថៃ និងក្រុមឥណ្ឌូណេស៊ី នៅវគ្គផ្ដាច់ព្រ័ត្រ វិញ្ញាសាបាល់ទាត់ផ្នែកបុរសអាយុក្រោម២២ឆ្នាំ នៃព្រឹត្តិការណ៍កីឡាស៊ីហ្គេម លើកទី៣២ នៅប្រទេសកម្ពុជា នាថ្ងៃទី២៣ ខែឧសភា ឆ្នាំ២០២៣នេះ។

 ទាក់ទិននឹងបញ្ហាទាំងអស់នេះសមាគមបាល់ទាត់ថៃ បានឲ្យដឹងថា ក្រោយពីមានការស៊ើបអង្កេតយ៉ាងហ្មត់ចត់សមាគមបានរកឃើញ មន្រ្តីជាប់ពាក់ព័ន្ធ និងក្រុមកីទ្បាករបស់ខ្លួនចំនួន៥នាក់ បានបង្កកំហុសខុសឆ្គងទៅលើសមាជិករបស់ក្រុមឥណ្ឌូណេស៊ី អំទ្បុងពេលការប្រកួតវគ្គផ្តាច់ព្រ័ត្រ នៅម៉ោងបន្ថែម១៥នាទី ២ដង ក្នុងវគ្គទី១ ដោយក្នុងនោះមានកីទ្បាករ២នាក់ និងជំនួយការគ្រូបង្វឹក៣នាក់ផងដែរ។

 វិញបញ្ហាខាងលើនេះ សមាគមបាល់ទាត់ថៃ បានសម្រេចចិត្តពិន័យលើកីទ្បាករ Thirapak Prueangna និងអ្នកចាំទី Soponwit Rakyart មិនឲ្យពាក់ព័ន្ធនឹងកីឡាបាល់ទាត់រយៈពេល៦ខែ។ ចំណែកឯជំនួយការគ្រូបង្វឹក៣នាក់ ត្រូវពិន័យរយៈពេល១ឆ្នាំផងដែរ។

 ការសម្រេចពិន័យនេះត្រូវបានអនុលោមតាមបទប្បញ្ញត្តិស្តីពីក្រមសីលធម៌ សម្រាប់អត្តពលិកអាជីព និងបុគ្គលិកកីឡាអាជីព ទទួលបន្ទុកសមាគមបាល់ទាត់ថៃ ខណៈកីឡាករ និងជំនួយការគ្រូបង្វឹកទាំង៥នោះស្ម័គ្រចិត្តទទួលកំហុស និងការពិន័យដោយសន្ដិវិធីគ្មានការប្រកែកតវ៉ាឡើយ ៕

អត្ថបទដោយ៖ ស្រីណុច