ជំងឺរលាកបំពង់ក និងរលាកបំពង់សម្លេង ជាជំងឺមួយដែលកើតច្រើនលើកុមារ។ រោគសញ្ញាមួយចំនួនក៏អាចបង្ហាញថាកូនរបស់អ្នកមានការឆ្លងបាក់តេរីធ្ងន់ធ្ងរនៅជុំវិញប្រអប់សំឡេង ហៅថាepiglottis ។ epiglottis គឺជាជាលិកាដែលគ្របលើបំពង់ក (ប្រអប់សំឡេង) និងបំពង់ខ្យល់(បំពង់ដកដង្ហើម) នៅពេលអ្នកញ៉ាំឬផឹកទឹក។ ក្នុងអំឡុងពេល epiglottitis ជាលិកាហើមរលាក មានដំបៅអាចឈានដល់ចំណុចដែលបិទបំពង់ខ្យល់ជិតបាន។

ជំងឺនេះច្រើនកើតលើកុមារមានអាយុចន្លោះ២ទៅ៦ឆ្នាំ ហើយអាចបណ្តាលឱ្យស្លាប់បានប្រសិនបើមិនព្យាបាលត្រឹមត្រូវ នេះបើផ្អែកតាមការឱ្យដឹងពីប្រភពHealthline។ សូមប្រុងប្រយ័ត្នប្រសិនបើកូនតូចរបស់អ្នកមានរោគសញ្ញាដូចជា៖

-     គ្រុនក្ដៅ

-     ឈឺបំពង់ក ពិបាកលេបអាហារ(ពិបាកសូម្បីលេបទឹកមាត់)

-     ក្អួត (ពេលខ្លះអាចមានឈាម)

-     សម្លេងប្រែប្រួល

-     មានហើមបំពងក ដុំពកសៗ ឬដំបៅ នៅត្រង់បំពង់ក ម្ដុំក្រឡើតជាដើម

-     ខ្សោយ មើលទៅហាក់គ្មានកម្លាំង

-     មានអាការគ្រុនផ្ដាសសាយលើសពី១សប្ដាហ៍

ក្រៅពីជំងឺរលាកប្រអប់សម្លេងនេះ​ វាក៏អាចជាសញ្ញា នៃជំងឺរលាកបំពង់កស្រួចស្រាវ ដែលអាចកើតឡើងយ៉ាងលឿន ក្រោមរយៈពេល៣សប្ដាហ៍។ ហេតុនេះមាតាបិតាគ្រប់រូបមិនគួរមើលរំលងឡើយប្រសិនបើកូន គ្រុនផ្ដាសាយ ក្ដៅខ្លួន ឬមានអាការដូចការរៀបរាប់ខាងលើ។ គួរកុំចេះតែផ្សំថ្នាំឱ្យកូនលេបដោយគ្មានវេជ្ជបញ្ជារ ត្រូវប្រញាប់នាំកូនទៅពិនិត្យប្រឹក្សាជាមួយគ្រូពេទ្យ ចៀសវាងទុកកូនឱ្យរហូតធ្ងន់ធ្ងរប្រកាច់ ឬប៉ះពាល់ដល់អាយុជីវិត៕

អត្ថបទដោយ៖ Senghong