អាការៈឈឺក្បាលបានកើតឡើងជារឿយចំពោះមនុស្សទូទៅ ពេលខ្លះអាចមកពីជំងឺ ហើយខ្លះមកពីសម្ពាធបរិយាកាសការងារជុំវិញខ្លួនជាដើម។ តែបើអ្នកឧស្សាហ៍ឈឺក្បាលញឹកញ៉ាប់វិញ អាចជាសញ្ញាមិនល្អនោះទេ ត្រូវប្រញ៉ាប់ទៅជួបពេទ្យជាំបន្ទាន់ ព្រោះនេះអាចជារោគសញ្ញាដុំសាច់ក្នុងខួរក្បាល ឬខ្ទុះក្នុងខួរក្បាល និងអាចជារោគសញ្ញានៃជំងឺផ្សេងៗទៀត។
យោងតាមមន្ទីរពេទ្យកាល់ម៉ែតកម្ពុជាបានឱ្យដឹងថា ការឈឺក្បាលមានច្រើនប្រភេទ និងច្រើនទំរង់ដោយខ្លះមានរយៈពេលខ្លីត្រឹមប៉ុន្មាននាទី និងខ្លះទៀតមាន រយៈពេលវែងដល់រាប់ម៉ោង។
គេចែកការឈឺក្បាលជា២ប្រភេទធំៗ៖ ការឈឺក្បាលដោយឯកឯងដែលមិនរួមផ្សំនឺងជំងឺផ្សេងៗ (Céphalée primaire) និងការឈឺក្បាលបន្ទាប់ពីការប៉ះទង្គិចក្បាលឬជំងឺផ្សេងៗ (Céphalée secondaire)
ចំណែកមូលហេតុនៃការឈឺក្បាលមួយចំនួន បណ្តាលមកពីកត្តាដែលមិនធ្ងន់ធ្ងរ ប៉ុន្តែវាអាចអោយឈឺក្បាលរ៉ាំរ៉ៃដែលយើងជួបជា ញឹកញាប់ ហើយរំខានដល់ការងារ និងការរស់នៅប្រចាំថ្ងៃដូចជា៖ ការឈឺក្បាលប្រកាំង, ការឈឺសរសៃមុខ និងក្បាល, ការរលាកឆ្អឹងច្រមុះ ឬដុះសាច់ច្រមុះ, ការធុញថប់ (Stress) និងការថប់បារម្ភ។
ប៉ុន្តែក៏មានការឈឺក្បាលមួយចំនួនបណ្តាលមកពីជំងឺធ្ងន់ធ្ងរ ដែលអាចបណ្តាលអោយមានគ្រោះថ្នាក់ដល់ជីវិត ដែលទាមទារអោយមានការធ្វើរោគវិនិច្ឆ័យច្បាស់លាស់ និងឆាប់រហ័សដូចជា៖ ជំងឺរលាកស្រោមខួរក្បាល, ការហូរឈាមក្នុងស្រោមខួរក្បាល, ការត្បៀត ឬបែកសរសៃឈាមខួរក្បាល (Stroke) និង ដុំសាច់ក្នុងខួរក្បាល ឬខ្ទុះក្នុងខួរក្បាលជាដើម។
ដូច្នេះប្រសិនបើអ្នកមានអាការៈដូចខាងលើសូមប្រយ័ត្នទៅមន្ទីរពេទ្យជំនាញ ឬទូទៅ ដើម្បីពិនិត្យសុខភាព និងធ្វើរោគវិនិច្ឆ័យឱ្យបានដឹងថាមានជំងឺអ្វីឱ្យប្រាកដ ចៀសវាងទុកឱ្យស្ថានការណ៍កាន់តែអាក្រក់ ហើយអាចឈានដល់ដំណាក់កាលពិបាកព្យាបាល៕
អត្ថបទដោយ៖ម៉ន វុទ្ធា