ទឹកដូង គឺជាភេសជ្ជៈដ៏កំពូលពេញនិយមបំផុតមួយដែលជាជម្រើសភេសជ្ជៈជំនួយសុខភាពនិងសម្រស់ ជាពិសេសនៅក្នុងប្រទេសកម្ពុជាយើងផ្ទាល់តែម្តង។ បើតាមការឱ្យដឹងពី Healthline នៅក្នុងទឹកដូង មាន៩៤% គឺជាទឹកដែលជាបណ្តុំនៃសារធាតុរ៉ែ សារជាតិចិញ្ចឹមផ្សេងៗដូចជា កាល់ស្យូម ប៉ូតាស្យូម ម៉ាញ៉េស្យូម សារធាតុអេឡិចត្រូលីត អង់ទីអុកស៊ីដង់ធម្មជាតិការពារជំងឺមហារីក ការពារក្រួសក្នុងតម្រងនោម ព្រមទាំងជួយជម្រុញការផលិតកូឡាជែនជំនួយស្បែកតាមធម្មជាតិទៀតផង។

ព្រោះតែអត្ថប្រយោជន៍ដ៏ច្រើនមហាសាលបែបនេះហើយ ទឹកដូងបានក្លាយជាភេសជ្ជៈកំពូលពេញនិយមសម្រាប់មនុស្សទូទៅ រហូតមានអ្នកខ្លះទទួលទានទឹកដូងជំនួសទឹក ឬអ្នកខ្លះទទួលទានច្រើនលើសលុបពេក ហើយការទទួលទានអ្វីដែលលើសលុបពេក តែងតែមិនមានផលវិជ្ជមានសល់សុខភាពនិងជីវិតយើងនោះទេ។ សំនួរសួរថា តើញ៉ាំទឹកដូងរាល់ថ្ងៃ​មានបញ្ហាដល់ក្រពះឬអត់? ប្រភព Healthline បានឱ្យដឹងថា វាអាចប៉ះពាល់ក្នុងករណីអ្នកញ៉ាំទឹកដូងលើសកម្រិត។ ផលប៉ះពាល់នោះ​នឹង ជះលទ្ធផលមកជាការរាគរូសកម្រិតស្រាលឬធ្ងន់តាមសុខភាពរបស់អ្នក។

សំនួរសួរបន្តទៀតថា ចុះទទួលទានទឹកដូងបរិមាណប៉ុនណាទើបត្រឹមត្រូវ ហើយល្អសម្រាប់សុខភាព? បើយោងតាម NourishByWebmd ទឹកដូងអាចញ៉ាំបានរាល់ថ្ងៃគ្មានជាបញ្ហាទេ ប៉ុន្តែមិនគួរញ៉ាំលើសពី២កែវក្នុង១ថ្ងៃនោះឡើយ។ អាចញ៉ាំបានម្តង១កែវ ១ថ្ងៃ២ដង បើលើសចំនួននេះ គេរាប់ថាជាការស្រូបសារជាតិចិញ្ចឹមលើសបរិមាណបង្កជាបញ្ហាផ្សេងៗវិញ។

ដូចនេះសំនួរថា “ទឹកដូងប៉ះពាល់ឬអត់ បើញ៉ាំច្រើន?” ប្រហែលជាបានបកស្រាយនៅខាងលើហើយ មកដល់ចំណុចនេះក៏ចង់ឱ្យបងប្អូនដឹងបន្ថែមពីអត្ថប្រយោជន៍របស់ទឹកដូង១ផ្លែៗដែលបងប្អូនបានញ៉ាំចូលទៅក្នុងរាងកាយដែរ។ នៅក្នុងការសិក្សាមួយពីឆ្នាំ២០១៨ ដែលពាក់ព័ន្ធនឹងមនុស្ស ៨នាក់ អ្នកស្រាវជ្រាវបានរកឃើញថា ទឹកដូងបានបង្កើនការបត់ជើងតូច នៃប៉ូតាស្យូម ក្លរួ និងcitrate ចំពោះបុគ្គលដែលមិនមានក្រួសក្នុងតម្រងនោម មានន័យថា ទឹកដូងអាចជួយលាងសម្អាតប្រព័ន្ធ និងរក្សាការពារបញ្ហាក្រួសក្នុងតម្រងនោម។ លើសពីនេះ វាក៏ជួយដល់សុខភាពបេះដូង មុខងារខួរក្បាល បញ្ហាកម្រិតជាតិស្ករក្នុងឈាម និងអត្ថប្រយោជន៍ជាច្រើនបន្ថែមទៀតផងដែរ៕

អត្ថបទដោយ៖ កញ្ញា លីហួយ