​១. បើអ្នករស់នៅក្នុងអតីតកាល និងអនាគតនោះ ចិត្តរបស់អ្នកគ្មានក្តីសុខទេ។ ចិត្តរស់នៅក្នុងអតីតកាល ធ្វើឱ្យអ្នកគិតពីរឿងដែលកន្លងហួស នាំឱ្យអ្នកឈឺចាប់ខ្លាំងឡើង។ បើអ្នករស់នៅក្នុងអនាគតនោះ វាធ្វើឱ្យអ្នកកើតចិត្តទុក្ខព្រួយច្រើនឡើង។ តាមលោកគ្រូ នឹម ឈុន្នី បានលើកឡើងថា មនុស្សដែលរីករាយបំផុត ជាអ្នកដែលចេះរស់នៅជាមួយបច្ចុប្បន្ន។ ជីវិតរបស់អ្នក​មានថាមពលខ្លាំងណាស់ បើអ្នកចេះរស់នៅជាមួយបច្ចុប្បន្នកាលដែលពោរពេញទៅដោយភាពវិជ្ជមាន និង​​ចេះរីករាយនៅគ្រប់ដំណាក់កាលនៃជីវិតរបស់ខ្លួន”។

២. នៅក្នុងសង្គមយើងមានជំងឺមួយរីកខ្លាំងនោះ គឺជំងឺប្រៀបធៀបខ្លួនឯងជាមួយអ្នកដទៃ វាធ្វើឱ្យបាត់បង់ជាខ្លួនឯង។ ហើយមើលមកខ្លួនឯងជាមនុស្សគ្មានសមត្ថភាព មិនល្អដល់គេថែមទៀត។ ការពិត គេកើតមកក្នុងគ្រួសារល្អ មានគ្រួសារតាមជួយ យើងកើតក្នុងគ្រួសារលំបាក មានតែពឹងខ្លួនឯង។ អ្នកឃើញទេ! កុំប្រៀបធៀបខ្លួនឯងជាមួយអ្នកដទៃ។ តាមលោកគ្រូ នឹម ឈុន្នី បានលើកឡើងថា បើអ្នកចង់ឱ្យជីវិតរីកចម្រើន និងរឹងមាំបាន អាស្រ័យដោយមនុស្សចេះបើកចិត្តឱ្យ​ទូលាយចំពោះមនុស្សជុំវិញខ្លួន ហើយកុំព្យាយាមប្រៀបធៀបខ្លួនឯងជាមួយអ្នកដទៃ ត្រូវរៀនសូត្រ និងដុះខាតសមត្ថភាពជាប្រចាំថ្ងៃ រៀនគ្រប់ទីកន្លែងនិងគ្រប់កាលៈទេសៈទាំងអស់។ ទើបចិត្តរឹងមាំមានភាពរីករាយបាន។

៣. តាមលោកគ្រូ នឹម ឈុន្នី បានប្រាប់ថា នៅពេលអ្នកងើបពីគេងហើយចេះដឹងគុណថាអ្នកនៅមានជីវិតបន្តដំណើរទៅថ្ងៃបន្ទាប់ ការដឹងគុណបែបនេះដូចជាឱសថប៉ូវផ្លូវចិត្តឱ្យអ្នកធ្វើដំណើរទៅរកក្តីស្រមៃប្រកបដោយថាមពលវិជ្ជមាន ឱ្យអ្នកចេះរីករាយជាមួយមនុស្សជុំវិញខ្លួន ឱ្យអ្នករៀនរីករាយជាមួយអ្វីដែលខ្លួនកំពុងធ្វើនិងកំពុងតែមានផងដែរ។ ការដឹងគុណចំពោះរឿងតូចតាចក្នុងជីវិតអាចនាំមកនូវសុភមង្គលហើយឱ្យចិត្តអ្នកចេះអត់ធ្មត់ជាងមុន៕ អត្ថបទដោយ៖ ទ្រ សុភាព