ជាទូទៅមនុស្សយើងម្នាក់ៗ មានប្រភេទឈាមមិនដូចគ្នានោះទេ អ្នកខ្លះមានឈាមប្រភេទ A ឈាមប្រភេទB ឈាមប្រភេទ AB ឬឈាមប្រភេទ​ 0 ជាដើម ។ ឈាមក៏ត្រូវបានបែងចែកជាប្រភេទ​ វិជ្ជមាន និងអវិជ្ជមាន ហើយភាពខុសគ្នានេះ វាអាស្រ័យថាតើ គ្រាប់ឈាមមានផ្ទុក ប្រូតេអីន ឬអត់ ។ ឧទាហរណ៍ ប្រសិនបើកោសិកាគ្រាប់ក្រហម មានផ្ទុកប្រូតេអីន នោះមានន័យថា ជាប្រភេទវិជ្ជមាន (ឧទាហរណ៍ AB⁺) តែក្នុងករណីគ្រាប់ឈាមក្រហម មិនមានផ្ទុកប្រូតេអីនទេ នោះមានន័យថា ជាប្រភេទឈាមអវិជ្ជមាន (ឧទាហរណ៍ O^-) ។

ស្របពេលជាមួយគ្នានេះ មានការសិក្សាជាច្រើន បានរកឃើញថា ប្រភេទឈាម អាចឆ្លុះបញ្ចាំង ពីស្ថានភាពសុខភាព របស់មនុស្សយើងបាន​។ ឧទាហរណ៍ មនុស្សដែលឈាមប្រភេទ O ងាយប្រឈមក្នុងការបង្ករោគ ដោយមេរោគ cholera (ជំងឺរាក) ជាងមនុស្សដែលមានឈាមប្រភេទផ្សេង។ ក្រៅពីនេះ អ្នកជំនាញក៏បានលើកឡើងថា មនុស្សដែលមានឈាមប្រភេទ O នឹងមិនសូវមានភាពធ្ងន់ធ្ងរ ពីការបង្ករោគដោយវីរុសកូវីដ ១៩ទេ។

មនុស្សដែលមានឈាមប្រភេទO មានហានិភ័យទាប ពីការកើតជំងឺបេះដូង និងការកកស្ទះសរសៃឈាម​បេះដូង ប៉ុន្តែពួកគេ ងាយប្រឈមនឹងបញ្ហាហូរឈាម ជាពិសេសនៅពេលសម្រាលកូន ឬមានការប៉ះទង្គិចលើរាងកាយ ។​

បើយោងតាម សមាគមគ្រូពេទ្យជំងឺបេះដូងសហរដ្ឋអាមេរិក មនុស្សដែលមានឈាមប្រភេទ A, B , AB ងាយប្រឈមក្នុងការកើតជំងឺបេះដូង ដូចជា ការគាំងបេះដូង ឬជំងឺខ្សោយបេះដូងជាដើម ។ ក្រៅពីនេះ ពួកគេក៏ងាយប្រឈម ក្នុងបញ្ហាកំណកឈាម តាមសរសៃវ៉ែនសួត ឬសរសៃឈាមក្នុងបេះដូង ដែលអាចបង្កគ្រោះថ្នាក់ដល់អាយុជីវិតបានគ្រប់ពេលវេលា ។ ប្រូតេអីន ដែលមាននៅក្នុងឈាមប្រភេទ A, B , AB អាចជាមូលហេតុ បង្កឲ្យមានកំណកឈាម តាមសរសៃឈាមទាំងនោះ នេះបើតាមគ្រូពេទ្យជំនាញ ។

ស្របពេលជាមួយគ្នានេះ ដើម្បីទទួលបានសុខភាពល្អ លោកអ្នកគួរផ្លាស់ប្ដូរ ទម្លាប់មិនល្អ ក្នុងការរស់នៅ មានរបបចំណីអាហារត្រឹមត្រូវ និងរក្សាតុល្យភាពទម្ងន់រាងកាយជាដើម ៕

អត្ថបទដោយ៖​ ហួ ភារ៉ា

ប្រភព៖ www.cnet.com