បញ្ហាឈឺចង្កេះឬខ្នងផ្នែកខាងក្រោយ បច្ចុប្បន្នមនុស្សស្ទើរតែគ្រប់វ័យហើយដែលជួបប្រទះ។ ការអង្គុយមិនបានយូរ ចុករោយ ឈឺចាប់ ពិបាកអង្គុយ ពិបាកគេង និងផ្ដល់ផលរំខានដល់សកម្មភាពប្រចាំថ្ងៃ ជាពិសេសភាគច្រើនកើតលើមនុស្សវ័យចាប់ពី៤៥ឆ្នាំឡើងទៅ។ ជាមួយគ្នានេះប្រសិនបើមិនបានទទួលការព្យាបាលឱ្យបានត្រឹមត្រូវ បញ្ហាឈឺចង្កេះនេះក៏អាចវិវត្តន៍ជាជំងឺរ៉ាំរ៉ៃធ្ងន់ធ្ងរបានផងដែរ។

តាមការចែករំលែកពីមន្ទីរពេទ្យកាល់ម៉ែត បានឱ្យដឹងថាកត្តាដែលបណ្ដាលឱ្យឈឺចង្កេះមានដូចជា ៖

- វិបត្តិសាច់ដុំនិងសរសៃពួរតឆ្អឹងត្រង់សន្លាក់

- ការសឹកសន្លាក់ឆ្អឹងឬពុកឆ្អឹងចង្កេះ

- ការរលាកសន្លាក់ឆ្អឹងនិងឆ្អឹងចង្កេះ

- ការបាក់បែកឆ្អឹងចង្កេះដែលបណ្តាលមកពីគ្រោះថ្នាក់ ប៉ះទង្គិច ធ្លាក់ពីទីខ្ពស់ និងរអិលជាដើម

- ការគាប ឬសង្កត់ទៅលើសរសៃប្រព័ន្ធប្រសាទ

- ជំងឺមហារីក

- ភាពចុះខ្សោយនិងការលូនមកក្រៅនៃទ្រនាប់ឆ្អឹង (ដែលនេះជាករណីជួបភាគច្រើន)។ ការលូនមកក្រៅនៃទ្រនាប់ឆ្អឹងនេះ ប្រសិនបើមិនបានធ្វើរោគវិនិច្ឆ័បានឆាយឱ្យឆាប់រហ័ស និងព្យាបាលត្រឹមត្រូវទេនោះ វាអាចផ្ដល់ផលវិបាកដូចជា ពិការជើង វិបត្តិបន្ទោរបង់ និងឈឺចាប់ខ្លាំងរហូតមិនអាចធ្វើអ្វីបាន។ បន្ថែមពីនោះ ផ្អែកតាមគេហទំព័រ medicalnewstoday បានឱ្យដឹងបន្ថែមថា ឈឺចង្កេះ ក៏អាចបណ្ដាលមកពីឆ្អឹងកងខ្នងខុសប្រក្រតី និងបញ្ហាតម្រងនោម(ក្រលៀន) ដូចជាគ្រោះក្នុងតម្រងនោម ឬឆ្លងមេរោគតម្រងនោមផងដែរ។

ចំពោះការព្យាបាល ប្រភពដដែលបានឱ្យដឹងថា អាចព្យាបាលបានតាមរយៈការលេបថ្នាំ វះកាត់ ការព្យាបាលតាមចលនា ​និងការផ្លាស់ប្តូរទម្លាប់ការរស់នៅផងដែរ។ យ៉ាងណាមិញ ប្រសិនបើបងប្អូនមានបញ្ហាដូចការរៀបរាប់ខាងលើ ឈឺចង្កេះយូរ​មកហើយ​ ឬញឹកញាប់​ បូករួមទាំងរាងកាយចុះខ្សោយ គ្មានកម្លាំង ឬមានអាការគ្រុនក្ដៅ មិនស្រួលក្នុងខ្លួន គួរប្រញាប់ជួបពិនិត្យប្រឹក្សា និងទទួលការព្យាបាលពីគ្រូពេទ្យជំនាញឱ្យបានទាន់ពេលវេលា៕

អត្ថបទដោយ៖ Senghong