ពេលខ្លះនៅក្នុងខ្លួនមានសញ្ញាតិចតួច ហើយអ្នកមិនចាប់អារម្មណ៍ធ្វើឱ្យដួលដាច់សរសៃឈាម និងសន្លាប់ដេកពេទ្យក៏មានដែរ។ ពេលអ្នកមានអារម្មណ៍នឿយហត់ អស់កម្លាំង ឧស្សាហ៍ងងុយដេកញឹកញាប់ នេះគេហៅថា ភាពស្លេកស្លាំងហើយបញ្ហានេះព្រោះតែខ្វះគ្រាប់ឈាមក្រហម ឬកោសិកាគ្រាប់ឈាមក្រហមធ្លាក់ចុះដែលបណ្ដាលមកពីកង្វះជាតិដែក។ ហើយជំងឺខ្វះគ្រាប់ឈាមក្រហមអាចបង្កឱ្យអ្នកដេកពេទ្យដើម្បីព្យាបាល ហើយប្រភេទខ្លះណាអាចតម្រូវឱ្យអ្នកព្យាបាលជាមួយថ្នាំ។ ប្រសិនបើនៅក្នុងករណីធ្ងន់ធ្ងរអាចឈានដល់ការបញ្ចូលឈាម ឬវះកាត់។
នៅពេលដែលចំនួនកោសិកាគ្រាប់ឈាមក្រហមរបស់អ្នកធ្លាក់ចុះទាបពេក នោះរាងកាយរបស់អ្នកមិនអាចស្រូបយកអុកស៊ីសែនតាមតម្រូវការបាននោះទេ ហើយវាអាចធ្វើឱ្យអ្នកមានអារម្មណ៍ថា អស់កម្លាំងខ្លាំង នឿយហត់ និងងងុយដេកញឹកញាប់។ នៅក្នុងករីណខ្វះកោសិកាគ្រាប់ឈាមក្រហម ដែលអាចធ្វើឱ្យអ្នកមានរោគសញ្ញាមួយចំនួនដូចជា ដកដង្ហើមខ្លីៗ វិលមុខ ឈឺក្បាល ស្បែកស្លេកស្លាំង ឬត្រជាក់ចុងដៃចុងជើង។ នេះបើយោងតាមការចុះផ្សាយរបស់ NIH News in Health។
ដើម្បីការពារពីភាពស្លេកស្លាំង និងការខ្វះកោសិកាគ្រាប់ឈាមក្រហម អ្នកត្រូវញុំាអាហារណាដែលសម្បូរជាតិដែក។ ប្រភពជាតិដែកភាគច្រើនសម្បូរនៅលើសាច់គោ សាច់ចៀម អ័យស្ទ័រ ថ្លើមគោ សាច់មាន់ សាច់ត្រី និងសំបកខ្យង(ស៊ុបខ្យង)។ មួយទៀតជាតិដែកក៏មានសម្បូរនៅក្នុង សណ្ដែកសៀង សណ្ដែកខៀវ គ្រាប់អាល់ម៉ុន គ្រាប់ស្វាយចន្ទី គ្រាប់ល្ពៅ គ្រាប់ផ្កាឈូករ័ត្ន គ្រាប់ជី តៅហ៊ូ បន្លែបៃតងស្លឹងខៀវចាស់ផងដែរ។
ដូច្នេះនៅក្នុងករណីអ្នកដឹងថា ខ្លួនកំពុងតែស្ថិតក្នុងករណីខាងលើខុសប្លែកពីធម្មតា ចូលអ្នកស្វែងរកវេជ្ជបណ្ឌិតដែលមានជំនាញច្បាស់លាស់ ដើម្បីធ្វើការពិគ្រោះ និងពិនិត្យរកមើលជំងឺទៅតាមអាការរបស់ខ្លួនយើងផ្ទាល់៕ អត្ថបទដោយ៖ ទ្រ សុភាព