គ្មាននរណាម្នាក់បានដឹងខ្លួនទុកជាមុនថា ថ្ងៃខាងមុខយើងនឹងជួបរឿងល្អ ឬរឿងអាក្រក់ ហើយក៏គ្មាននរណាម្នាក់ចង់ឱ្យខ្លួនរងសម្ពាធផ្លូវចិត្តនោះដែរ។

បើយោងតាមការចុះផ្សាយរបស់ Time of India បានបង្ហាញដំណោះស្រាយ០៧យ៉ាងដែលជួយរំងាប់អារម្មណ៍បានលឿន ក្រោពេលអ្នកទទួលរងសម្ពាធផ្លូវចិត្ត។

១.ទទួលយកការពិត

បើអ្នកទទួលរងសម្ពាធនៅថ្ងៃណាមួយ ចូរអ្នកបង្រៀនខ្លួនឯងឱ្យចេះទទួលយកការពិតលើរឿងទាំងអស់ដែលធ្លាក់មកលើអ្នក ដើម្បីឱ្យអារម្មណ៍របស់អ្នកធូរស្បើយ។ ការរៀនទទួលយកការពិត អាចបង្រៀនឱ្យអ្នកកាន់តែស្គាល់ច្បាស់ពីតម្លៃរបស់ខ្លួនឯង ហើយអាចដោះស្រាយដោយខ្លួនឯងបាន។

២.ដកខ្លួនចេញមួយរយៈ

មិនថា ខ្លួនអ្នកកំពុងជួបសម្ពាធផ្លូវចិត្តពាក់ព័ន្ធ បញ្ហាការងារ បញ្ហាស្នេហា បញ្ហាមិត្ត និងបញ្ហាគ្រួសារ ចូរអ្នកផ្ដល់ឪកាសឱ្យរាងកាយរបស់បានសម្រាកផង ពីព្រោះការដែលរាងកាយរបស់អ្នកសម្រាក ភាពតានតឹង និងសម្ពាធទាំងឡាយ បានរំសាយតាមសុបិន។ ក្រោយមកទៀត ចូរអ្នកគិតគំនិតវិជ្ជមាន លើកទឹកចិត្តខ្លួនឯង ដើម្បីផ្ដល់កម្លាំងចិត្តឱ្យខ្លួនឯង ដើម្បីដើរទៅមុខទៀត។

៣.ដកដង្ហើមឱ្យវែង

ចូរអ្នកកុំគិតរឿងដែលកន្លងហួស អ្នកត្រូវតែលើកទឹកចិត្តខ្លួន យកចិត្តទុកដាក់ចំពោះខ្លួនឯង និងផ្ដោតលើគោលដៅរបស់ខ្លួនវិញទើបជារឿងប្រសើរ។ អង្គុយក្បែរមាត់សមុទ្រ ដកដង្ហើមឱ្យវែងៗ ស្ដាប់សំឡេងទឹកសមុទ្រ និងធ្វើសមាធិ ដើម្បីបន្ធូរអារម្មណ៍លុបចោលភាពឈឺចាប់។

៤.បើមានភាពតានតឹងហើយ ដើរលេងខ្លះទៅ

វេជ្ជបណ្ឌិត Girija Kishore Lead បាននិយាយថា ការដើរលេងជួយឱ្យអ្នកលុបចោរភាពតានតឹងរបស់អ្នក ហើយវាបានធ្វើឱ្យចិត្តរបស់អ្នកធូរស្បើយ លែងមានសម្ពាធទៀតហើយ។

៥.និយាយភាពតានតឹងចេញមកក្រៅ

ត្រូវផ្ដល់ឪកាសឱ្យខ្លួនឯងនិយាយរឿងដែលដានជាប់នៅក្នុងចិត្តចេញមកខាងក្រៅឱ្យអស់ ដើម្បីឱ្យអារម្មណ៍របស់អ្នកធូរស្បើយ។ អ្នកអាចឈរនៅកន្លែងណាមួយដែលមានបរិយាកាសល្អ រួចនិយាយលឺៗ ដើម្បីបន្ធូរភាពតានតឹងរបស់ខ្លួន។

៦.ធ្វើលំហាត់ប្រាណ ឬរត់

វិធីដ៏មានប្រសិទ្ធភាពជួយកាត់បន្ថយភាពតានតឹងគឺ ការហាត់ប្រាណ និងរត់។ ជាដំបូងវាអាចធ្វើឱ្យអ្នកស្ទាក់ស្នើរចិត្ត ប៉ុន្តែបើអ្នកធ្វើបាន នោះភាពសោកសៅទាំងប៉ុន្មានក៏រលាយអស់ អារម្មណ៍របស់អ្នកក៏ត្រូវធូរស្បើយ។

៧.វិធីដកដង្ហើម ៤-៧-៨

វិធីសាស្ដ្រដកដង្ហើម ៤-៧-៨ ត្រូវបានគេទទួលស្គាល់ថា អាចជួយដោះស្រាយការថប់បារម្ភ និងធ្វើឱ្យចិត្តរបស់អ្នកស្ងប់បានដែរ។ វិធីសាស្ត្រនេះគឺ ស្រូបដង្ហើមចូលតាមច្រមុះរយៈពេល៤វិនាទី រួចទប់ដង្ហើមឱ្យជាប់រយៈពេល៧វិនាទី បន្ទាប់មកបញ្ចេញខ្យល់តាមមាត់មួយៗរយៈពេល៨វិនាទី។