ជាតិជាមនុស្សស្រី ពិតជាពិបាកខ្លាំងណាស់ ក្នុងការប្រឈមមុខនឹងរោគស្ត្រីផ្សេងៗ ជាពិសេសរឿងបញ្ហាមករដូវប្រចាំខែតែម្តង។ មកទល់នាពេលសព្វថ្ងៃ មានមនុស្សស្រីរាប់លាននាក់ រមែងរអ៊ូនឹងអាការមិនស្រួលខ្លួនអំឡុងពេលមករដូវ ដោយរោគសញ្ញាទាំងនោះរួមមាន៖ ឆ្អល់ ឬហើមពោះ, ឈឺក្បាល, ចុកពោះ, ក្អួតចង្អោរ, អស់កម្លាំងល្ហិតល្ហៃ, រដូវមកច្រើន ឬតិចខុសប្រក្រតី, ការប្រែប្រួល​អារម្មណ៍លឿនខុសពីធម្មតា, រាគ...ជាដើម។

ដោយឡែក ក្នុងចំណោមវិបត្តិខាងលើនេះ អាចបណ្ដាលមកពីបញ្ហាសុខភាពផ្ទាល់ខ្លួនមួយផ្នែក និងមួយផ្នែកទៀត គឺចោទមានឡើងពីរបបអាហារដែលអ្នកទទួលទានពុំបានត្រឹមត្រូវអំឡុងពេលមករដូវ។ ផ្អែកលើការចុះផ្សាយរបស់គេហទំព័រ healthline.com បានឱ្យដឹងថា ក្នុងអំឡុងពេលមករដូវ ស្ត្រីគ្រប់រូបគួរជៀសវាងនូវអាហារចំនួន៥ប្រភេទខាងក្រោម៖

១. កាហ្វេ​៖ ការទទួលទានជាតិកាហ្វេអ៊ីន អំឡុងពេលមករដូវ អាចបង្ករជារោគហើមពោះ និងធ្វើឱ្យឈឺក្បាលកាន់តែធ្ងន់ធ្ងរ។ កាហ្វេក៏អាចបណ្តាលឱ្យមានបញ្ហារំលាយអាហារដូចគ្នាដែលបង្កើតជាអាការ រាគរូស ផងដែរ។ ដូច្នេះសម្រាប់អ្នកញៀនកាហ្វេគួរកាត់បន្ថយ ឬផ្អាកញ៉ាំសិន ក្នុងអំឡុងពេលមករដូវប្រចាំខែ។

២. ស្រា៖ គ្រឿងស្រវឹងអាចជះឥទ្ធិពលអវិជ្ជមានមួយចំនួនដល់រាងកាយ ប៉ះពាល់ដល់វដ្តរដូវធ្ងន់ធ្ងរ។ ដោយហេតុថា ស្រាអាចធ្វើឱ្យខ្សោះជាតិទឹក បង្ករចេញជារោគសញ្ញា ឈឺក្បាលកាន់តែខ្លាំង ហើមពោះ រាគក្អូត ចង្អោរ អស់កម្លាំង ...ផងដែរ។

៣. សាច់ក្រហម៖ ក្នុងអំឡុងពេលមករដូវរាងកាយផលិត prostaglandins ដោយសមាសធាតុនេះជួយដល់ដំណើរការលំហូរឈាមរដូវ។ ក៏ប៉ុន្តែប្រសិនណាកម្រិត prostaglandins កើនឡើងខ្ពស់ពេក អាចបណ្តាលឱ្យងាយរមួលក្រពើ។ នេះហើយ ជាមូលហេតុដែលត្រូវកាត់បន្ថយការទទួលទានសាច់ក្រហម ដោយសារតែសារជាតិដែកនៅក្នុងសាច់ក្រហមជួយផលិត prostaglandins ខ្ពស់។

៤. អាហារហឹរ៖ ដូចដែលប្រិយមិត្តអ្នកអាន បានដឹងហើយថា ការទទួលទាន អាហារហឹរនឹងបង្កគ្រោះថ្នាក់ធំដល់ក្រពះពោះវៀន ធ្វើឱ្យមានបញ្ហា ក្អួត ចង្អោរ ប្រព័ន្ធរំលាយមានសមត្ថភាពខ្សោយក្នុងការចាប់យកសារជាតិចិញ្ចឹមក្រោយៗទៀតទៅបំពេញឱ្យសរីរាង្គទាំងមូល។ លើសពីនេះទៅទៀត ប្រសិនណាអ្នកទទួលទានអាហារហឹរអំឡុងពេលមករដូវ ហានិភ័យងាយប្រឈមនោះ គឺរោគឈឺក្រពះ ចុកពោះ រាគ ក្អួតចង្អោរ ឬឈានដល់បញ្ហាវិលមុខ អស់កម្លាំង ដោយសាររោគក្រពះធ្វើទុក្ខខ្លាំងក៏មាន..។

៥. អាហារផ្អែម ប្រៃ៖ ការញ៉ាំច្រើនជាសារជាតិផ្អែមពេក អាចធ្វើឱ្យរាងកាយទទួលបានថាមពលភ្លាម និងអស់ទៅវិញយ៉ាងងាយផងដែរ។ ពីព្រោះការទទួលទានអងាហារផ្អែមច្រើនពេក ដែលភាគច្រើនគេសង្កេតឃើញនៅក្នុងអាហារកែច្នៃ អាចបណ្តាលឱ្យមានអារម្មណ៍អស់កម្លាំងពេញមួយថ្ងៃ ខណៈពេលដែលជាតិស្ករ និងកាបូអ៊ីដ្រាតក្នុងអាហារកែច្នៃ ធ្វើឱ្យមានការកើនឡើងកម្រិតជាតិស្ករនៅក្នុងឈាមនិងការធ្លាក់ចុះភ្លាមៗជាបន្តបន្ទាប់អាចធ្វើឱ្យអ្នកមានអារម្មណ៍អស់កម្លាំង។ បញ្ហានេះ ប៉ះពាល់ខ្លាំងដល់អារម្មណ៍ អាចអន់ចិត្ត ខឹង មួម៉ៅ ស្ត្រេស ធុញថប់ ក្នុងកំឡុងពេលមករដូវ។ ចំណែកឯសារធាតុអំបិលវិញ​ ងាយបង្ករចេញជាបញ្ហាឆ្អល់ ឬហើមពោះថែមទៀត។

បន្ថែមជាមួយនឹងការតមនូវរបបអាហារខាងលើ ក៏មានទម្លាប់សកម្មភាព ក៏ដូចជារបបអាហារមួយចំនួនទៀត ដែលស្ត្រីគ្រប់រូបគួរឱ្យយកចិត្តទុកដាក់ និងថ្នមខ្លួនអំឡុងពេលមករដូវផងដែរ ដោយក្នុងនោះរួមមាន៖ ហាមផឹកទឹកត្រជាក់ លើករបស់ធ្ងន់ៗ ញ៉ាំអាហារផ្អាប់ ងូតទឹកយូរជាង១៥នាទី ឬងូតទឹកត្រជាក់ពេក ក្តៅពេក ជាដើម។ ដោយជួសមកជាការញ៉ាំទឹកក្តៅឧណ្ឌៗ ងូតទឹកក្តៅឧណ្ឌៗ(១៥នាទីចុះក្រោម) ញ៉ាំបន្លែផ្លែឈើ និង ផ្លាស់សំឡី ឬ ក្រដាសទ្រាប់យ៉ាងតិចបំផុតរៀងរាល់២ម៉ោងម្ដង។ ហើយការដែលធ្វើបែបនេះ អាចជួយសម្រួលដល់រដូវមានដំណើរការល្អ ជៀសឆ្ងាយពីបញ្ហាឆ្លងរោគបាក់តេរី និងបញ្ហាសុខភាពផ្សេងៗនាពេលបច្ចុប្បន្នបន្តទៅថ្ងៃមុខ៕