បញ្ហាទល់លាមក ឆ្អល់ពោះ និងពោរពេញទៅដោយជាតិពុលក្នុងខ្លួន អាចកើតមានឡើងបាន បណ្ដាលមកពីទម្លាប់រស់នៅ ជាមួយនឹងរបបអាហារប្រចាំថ្ងៃ ដោយនេះ កត្តាដ៏គួរឱ្យព្រួយបារម្ភមួយ ដែលអាចជះឥទ្ធិពលទៅដល់សុខភាពរាងកាយផ្សេងៗពេញមួយតួខ្លួន។

ទន្ទឹមនឹងការលើកឡើងខាងលើ ថ្ងៃនេះ Healthy Cambodia នឹងលើកយកប្រភេទផ្លែឈើចំនួន៤មុខ ដែលត្រូវបានគេសិក្សាឃើញថា មានអត្ថប្រយោជន៍បំផុតក្នុងការជួយសម្រួលទៅដល់ប្រព័ន្ធរំលាយអាហារ សម្រាប់មនុស្សគ្រប់វ័យ ប្រសិនបើជ្រើស១មកញ៉ាំ២ពេលក្នុងមួយថ្ងៃរឹតតែទទួលបានផល៖

១. ល្ហុង៖ យោងតាមប្រភព tuasaude.com បានលើកឡើងឱ្យដឹងថា ផ្លែល្ហុងសម្បូរទៅដោយជាតិទឹក និងជាតិសរសៃ ដែលមានសមត្ថភាពជួយដល់ការរំលាយអាហារ។ តួយ៉ាង ផ្លែល្ហុង ១០០ ក្រាមមានជាតិសរសៃ ១,៨ក្រាម កាបូអ៊ីដ្រាតប្រហែល ១១ក្រាម និង ៤០កាឡូរី បន្ថែមពីលើនេះក៏មានសារធាតុចិញ្ចឹមផ្សេងទៀតដូចជា ម៉ាញេស្យូម ប៉ូតាស្យូម និងវីតាមីន C។

២. ជម្ពូ៖ ផ្លែជម្ពូ បានផ្តល់ជាតិសរសៃយ៉ាងល្អ សម្រាប់ការសម្រកទម្ងន់ និងកាត់បន្ថយអារម្មណ៍ឃ្លាន។ ផ្លែជម្ពូ សម្បូរទៅដោយសារធាតុចិញ្ចឹមបន្ថែមទៀតដូចជា ប្រូតេអ៊ីន កាល់ស្យូម ជាតិដែក វីតាមីន A និងវីតាមីន C។ សំបករបស់វាមានផ្ទុកសារធាតុអាល់កាឡូអ៊ីត Jambosine ដែលមានលក្ខណៈសម្បត្តិព្យាបាលជំងឺទឹកនោមផ្អែមផងដែរ។

៣. ក្រូច៖ ផ្លែក្រូចសម្បូរទៅដោយជាតិទឹក ដែលជួយផ្តល់ជាតិទឹកដល់ពោះវៀន កាត់បន្ថយបញ្ហាទល់លាមក។ ជាងនេះទៅទៀតផ្លែក្រូចអាចការពារកោសិកាពីការខូចខាតបង្កើតកូឡាជែន ដែលជាប្រូតេអ៊ីនព្យាបាលរបួសស្បែក។

៤. សារី៖ ផ្លែសារី គឺជាអាហារពេលព្រឹកដ៏ល្អបំផុតសម្រាប់សុខភាពពោះវៀន ព្រោះសារធាតុសរសៃមាននៅក្នុងផ្លែឈើ១មុខនេះ ធ្វើឱ្យប្រព័ន្ធរំលាយអាហារមានដំណើរការប្រក្រតី និងបង្កើតអារម្មណ៍ឆ្អែត ដែលកាត់បន្ថយអារម្មណ៍ឃ្លានបានយូរ។

ជារួមមកវិញ ក្នុងចំណោមផ្លែឈើទាំង៤មុខខាងលើនេះ ពិតជាមានអត្ថប្រយោជន៍ច្រើនមិនថាចំពោះសុខភាពក្រពះពោះវៀនទេ សូម្បីតែស្បែកក៏អាចទទួលបានភាពភ្លឺរលោងផងដែរ។ ដូច្នេះជាមតិយោបល់បន្ថែម គួរតែជ្រើសយកផ្លែ១មុខមកទានជាប្រចាំក្នុង១ថ្ងៃ២ពេល ព្រឹក-ល្ងាច ដើម្បីបំប៉នសុខភាពឱ្យកាន់តែមាំមួន៕

អត្ថបទដោយ៖ ប៉ាវ ភក្តី