បន្លែផ្លែឈើ៣មុខ ល្អបំផុតសម្រាប់ ខែក្ដៅៗជួយជម្រុញការផលិតកូឡាជេន ស្បែកស្អាត មិនខ្មៅស្រអាប់

ជាការពិតណាស់ ការពិតទៅ ការថែរក្សាស្បែករបស់យើង គឺមិនមែនចាំទាល់តែខែក្ដៅ ឬក៏ខែត្រជាក់នោះទេ ត្រូវតែថែរក្សាជាប្រចាំ។ ក៏ប៉ុន្ដែរូបរាងកាយរបស់មនុស្ស តែងតែផ្លាស់ប្ដូរ ជារឿងធម្មតា ដូចស្បែករបស់យើងអ៊ីចឹងគឺងាយនឹងចាស់ ជ្រីញជ្រួញតាមអាយុមិនខាន។ គ្រាន់តែបើយើងជាមនុស្សថែរក្សានោះក៏ជួយរក្សាស្បែករបស់អ្នកមិនងាយចាស់ទៅតាមអាយុបានដូចគ្នា។

ដូច្នេះខាងក្រោមនេះគឺជា បន្លែផ្លែឈើ៣មុខល្អៗសម្បូរជាតិទឹក និងជួយថែរក្សាស្បែករបស់អ្នកឱ្យមានសុខភាពល្អ។

-ផ្លែប៉ោម៖ ការសិក្សាដោយអ្នកជំនាញផ្នែកអាហាររូបត្ថមបាននិយាយថា ផ្លែប៉ោម​គឺ ផ្ទុកបរិមាណអេឡាហ្សែន និងកូឡាជែនច្រើនដែលអាចជួយឱ្យស្បែកក្មេងជាងវ័យ។ បន្ថែមពីនេះ ផ្លែប៉ោមគឺ បានដើរតួនាទីយ៉ាងសំខាន់ក្នុងការប្រឆាំងនឹងអុកស៊ីតកម្មការពារការបំផ្លាញកោសិកា និងជាលិការបស់ស្បែក។

-ប៉េងប៉ោះ៖ មនុស្សជាច្រើនគិតថា ប៉េងប៉ោះគឺជាបន្លែ សូម្បីក្រុមអ្នកជំនាញអាហារូបត្ថម្ភ ក៏ពួកគាត់ចាត់ទុកថាជាបន្លែដែរ ក៏ប៉ុន្តែតាមរុក្ខសាស្ត្រ វាគឺជាសមាជិកនៃគ្រួសារផ្លែឈើ។ មូលហេតុដែលប៉េងប៉ោះជួយឱ្យសាច់យើងស្អាត ក្មេងជាងវ័យ គឺដោយសារវាជាផ្លែឈើដែលសម្បូរវីតាមីនស៊ី ជួយជំរុញការផលិតកូឡាជេនស្បែក ជាតិជូរនៃប៉េងប៉ោះ ជួយជម្រុះកោសិកាចាស់ៗនៃស្បែក និងជួយផលិតកោសិកាថ្មីៗសម្រាប់ស្បែកបានលឿនបំផុត។​​​ ល្អជាងនេះ គឺវាជួយបង្រួមរន្ធញើសរបស់ស្បែក និងប្រឆាំងរ៉ាឌីកាល់សេរី ដោយសារវាមានសារធាតុប្រឆាំងអុកស៊ីតកម្ម lycopene ការញុំាប៉េងប៉ោះញឹកញាប់ ប្រៀបដូចការបញ្ចូលវីតាមីនឱ្យស្បែកអញ្ចឹង។

-ផ្លែដូង៖ តាមការសិក្សាស្រាវជ្រាវជាច្រើនបានលើកឡើងថា ទឹកដូងមានផ្ទុកទៅដោយអរម៉ូនអ៊ឹស្ត្រូសែន ដែលជួយធ្វើឱ្យស្បែករបស់អ្នកភ្លឺថ្លា និងស្បែកសុខភាពល្អ។ ជាងនេះទៀត ទឹកដូងនេះ មានចំណែកសំខាន់ជួយដល់ការបង្កើតកូឡាជែននិងអេឡាស្ទីន(Elastin) ដែលមានលក្ខណៈសម្បត្តិជួយឱ្យស្បែកមានភាពបត់បែន តឹងណែន និងពន្យាដំណើរការចាស់ ធ្វើឱ្យរាងកាយមានអារម្មណ៍ស្រស់ស្រាយ បំបាត់ការស្រេកទឹក ហើយវាក៏ជាភេសជ្ជៈមួយ ធ្វើឱ្យរាងកាយអាចស្រូបយកជាតិប្រូតេអ៊ីនក្នុងរយៈពេលត្រឹមតែ ៥ នាទីប៉ុណ្ណោះ។