មជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក (CDC) បាននិយាយនៅក្នុងបណ្តាញជូនដំណឹងអំពីសុខភាព មនុស្សប្រហែល២ម៉ឺននាក់ ដែលបានចូលរួមការជួបជុំសាសនាដ៏ធំមួយនៅរដ្ឋ Kentucky កាលពីខែមុនអាចប្រឈមមុខនឹងកើតជំងឺកញ្ជ្រឹល ដោយត្រូវតាមដានរោគសញ្ញាក្នុងរយៈពេល២១ថ្ងៃ។ នេះបើយោងតាមការចុះផ្សាយរបស់សារព័ត៌មាន CNN កាលពីថ្ងៃទី០៣ ខែមីនា ឆ្នាំ២០២៣។

ការដាស់តឿន CDC ត្រូវបានផ្ញើទៅកាន់គ្រូពេទ្យ និងមន្ត្រីសុខភាពសាធារណៈ បន្ទាប់ពីនាយកដ្ឋានសុខភាពសាធារណៈរដ្ឋ Kentucky បានរកឃើញករណីជំងឺកញ្ជ្រឹលលើបុគ្គលម្នាក់ដែលមិនបានចាក់វ៉ាក់សាំង។ បុគ្គលនោះមានប្រវត្តិនៃការធ្វើដំណើរអន្តរជាតិនាពេលថ្មីៗនេះ និងបានចូលរួមក្នុងការជួបជុំសាសនាដ៏ធំមួយនៅថ្ងៃទី១៧ និង១៨ ខែកុម្ភៈ នៅសាកលវិទ្យាល័យ Asbury ក្នុង Wilmore រដ្ឋ Kentucky។

មិនត្រឹមតែប៉ុណ្ណោះ CDC ក៏បានសង្កត់ធ្ងន់ទៀតថា ប្រសិនបើអ្នកណាបានចូលរួម ការជួបជុំនៅសាកលវិទ្យាល័យ Asbury នៅថ្ងៃទី១៧ ឬ១៨ ខែកុម្ភៈ ហើយមិនទាន់បានចាក់វ៉ាក់សាំងពេញលេញប្រឆាំងនឹងជំងឺកញ្ជ្រឹល គួរតែដាក់ខ្លួនឲ្យនៅដាច់ដោយឡែករយៈពេល២១ថ្ងៃ ហើយតាមដានសុខភាពខ្លួនសម្រាប់រោគសញ្ញានៃជំងឺកញ្ជ្រឹល ដើម្បីកុំឲ្យឆ្លងជំងឺកញ្ជ្រឹលទៅកាន់អ្នកដទៃ។

មន្ត្រី CDC ក៏ណែនាំដល់បុគ្គលដែលមិនទាន់បានចាក់វ៉ាក់សាំងប្រឆាំងនឹងជំងឺកញ្ជ្រឹល គួរតែទៅចាក់វ៉ាក់សាំងឲ្យបានគ្រប់ៗគ្នា ព្រោះមានតែវ៉ាក់សាំង MMR ចំនួនពីរតែប៉ុណ្ណោះ ដែលមានប្រសិទ្ធភាពប្រហែល៩៧% ក្នុងការបង្ការជំងឺកញ្ជ្រឹល។

សូមជម្រាបថា កញ្ជ្រឹលគឺជាជំងឺមេរោគឆ្លងពីមនុស្សម្នាក់ទៅមនុស្សម្នាក់ តាមរយៈការប៉ះផ្ទាល់ទឹករងៃរបស់អ្នកជំងឺ ក្អក កណ្ដាស់ជាដើម  អមដោយមានរោគសញ្ញាកន្ទួលក្រហមលេចឡើងនៅលើមុខ ហើយរាលដាលចុះក្រោមពី៣ ទៅ៥ថ្ងៃបន្ទាប់មេរោគចាប់ផ្ដើមទៅក្នុងខ្លួន។ ខណៈបច្ចុប្បន្ននេះការរីករាលដាលនៃជំងឺកញ្ជ្រឹលកំពុងកើតឡើងខ្លាំងនៅក្នុងតំបន់ទាំងអស់របស់អង្គការសុខភាពពិភពលោក (WHO)៕

អត្ថបទដោយ៖ ស្រីណុច