កាលពីពេលថ្មីៗនេះមន្រ្ដីសុខាភិបាលប្រទេសហុងគ្រី បានប្រកាសពីការរកឃើញវីរុស Zika នៅលើពលរដ្ឋខ្លួនចំនួន២នាក់ ក្រោយពីពួកគេបានបានធ្វើដំណើរទៅលេងកំសាន្តប្រទេសថៃ។ ខណៈការសិក្សាថ្មីបានអះអាងថា នៅពេលបច្ចុបប្បន្ននេះវីរុស Zika កំពុងតែមានការប្រែប្រួលខ្លាំង។ នេះបើយោងតាមការចុះផ្សាយរបស់សារព័ត៌មាន Thailandmedical កាលពីថ្ងៃទី០១ ខែមីនា ឆ្នាំ២០២៣។

ក្រុមអ្នកស្រាវជ្រាវអន្តរជាតិមួយក្រុមមកពីប្រទេសចិន ប៉ាគីស្ថាន ចក្រភពអង់គ្លេស បានរកឃើញនៅក្នុងការសិក្សាថ្មីមួយថា មេរោគ Zika កំពុងផ្លាស់ប្ដូរក្នុងអត្រាដ៏គួរឲ្យព្រួយបារម្ភ ខណៈប្រទេសមួយចំនួនកំពុងតែមានហានិភ័យខ្ពស់នៃមេរោគមួយនេះ។ ជាងនេះទៅទៀតវ៉ាក់សាំងពិសោធន៍ទាំងអស់ដែលត្រូវបានបង្កើតឡើងសម្រាប់វីរុស Zika និងមួយចំនួនទៀតដែលកំពុងស្ថិតក្រោមការសាកល្បងព្យាបាលប្រហែលជាលែងមានប្រសិទ្ធភាពប្រឆាំងនឹងវីរុស Zika ពូជថ្មីទៀតហើយ។

គួរបញ្ជាក់ដែរថា យោងតាមប្រភពព័ត៌មានដដែលខាងលើបច្ចុប្បន្ននេះវីរុស Zika បានក្លាយជាមេរោគដែលគំរាមកំហែងដល់សុខភាពពិភពលោកយ៉ាងសំខាន់។ វាគឺជាមេរោគ RNA ដែលបន្តការផ្លាស់ប្ដូរជាច្រើនលើកច្រើនសារនៅក្នុងហ្សែនរបស់វា ប៉ុន្តែទោះជាយ៉ាងណាក៏ដោយអ្នកវិទ្យាសាស្រ្ដអាចនឹងបង្កើតថ្នាំ ព្រមទាំងវ៉ាក់សាំងដែលមានប្រសិទ្ធភាពជាងមុន ក្រោយការសិក្សាស្រាវជ្រាវយ៉ាងម៉ត់ចត់។

គួរឱ្យដឹងផងដែរថា កាលពី០៧ ខែកុម្ភៈឆ្នាំ២០១៦ កន្លងមក ផ្អែកតាមនាយកដ្ឋានប្រឆាំងជំងឺឆ្លងកម្ពុជា (CDC) បានរំលឹកឲ្យដឹងថា វីរុសZika រកឃើញដំបូងនៅលើសត្វស្វាក្នុងឆ្នាំ១៩៤៧ និងលើមនុស្ស ក្នុងឆ្នាំ១៩៥២ នៅប្រទេស Uganda និងTanzania ប៉ែកទ្វីបអាហ្វ្រិក ។ បន្ទាប់មកជំងឺ នេះមានការផ្ទុះឡើងជារប៉េះរប៉ោះ នៅទ្វីបអាហ្រ្វិក អាមេរិក និង អាស៊ីប៉ាស៊ីហ្វិក។ ជំងឺនេះចំលងតាម មូសខ្លា ដូចជំងឺគ្រុនឈាមដែរ និងមានរោគសញ្ញាដូចជំងឺគ្រុនឈាម (គ្រុនក្តៅ ឈឺក្បាល ក្រហមភ្នែក កន្ទួលក្រហមលើស្បែក ឈឺសន្លាក់)៕

អត្ថបទដោយ៖ ស្រីណុច

រូបភាពកាលពី២០១៦