ការសម្រាលកូន គឺជាដំណើរប្រព្រឹត្តិ តាមបែបធម្មជាតិ នៃមនុស្សជាតិយើង ក្នុងការផ្ដល់កំណើតដល់កូន ។ ដំណើរការ បែបធម្មជាតិនេះ អាចត្រូវបានចែកចេញ ជាពីរដំណាក់កាលធំៗ គឺការឈឺពោះឆ្លងទន្លេ(មាន៣ដំណាក់កាលផ្សេងៗគ្នា)  និងការប្រសូតរបស់ទារក ចេញពីផ្ទៃម្ដាយ។ ភាគច្រើន ការសម្រាលកូន គឺមានសុវត្ថិភាព ប៉ុន្តែករណីខ្លះ បញ្ហាអាចកើតឡើងចំពោះទារក ឬម្ដាយ ឬកើតមានចំពោះទាំងម្ដាយ ទាំងកូនផងក៏មាន។

យោងតាមគេហទំព័រ medlineplus.gov មានបញ្ហាប្រឈម ចំនួន១០ប្រការ      ដែល​ស្រ្តីពពោះអាចជួបប្រទះ ជាពិសេសក្នុងកំឡុងពេល នៃដំណើរការសម្រាលកូន ។

១. ការសម្រាលកូនមុនកំណត់៖ កើតឡើងនៅពេលដែល មានការឈឺពោះសម្រាលកូន មុនសប្ដាហ៍ទី៣៧ នៃការពពោះ ។

២. បែកទឹកភ្លោះលឿនពេក៖ ជាការបែបទឹកភ្លោះលឿនពេក ហើយប្រសិនបើ ការឈឺពោះសម្រាល មិនទាន់ចាប់ផ្ដើម វាអាចបង្កហានិភ័យ នៃកាបង្ករោគ និងគ្រោះថ្នាក់ដល់ទារក។

៣. សុកបាំងមាត់ស្បូន៖ បង្កជាការលំបាក ក្នុងការសម្រាលកូន អាចបង្កហានិភ័យ ក្នុងការហូរឈាម ក្នុងកំឡុងពេលសម្រាលកូន ។

៤. ការឈឺពោះសម្រាលកូនយូរខុសធម្មតា៖ ស្រ្តីអាចប្រឈម នឹងការឈឺពោះសម្រាលកូន មានរយៈពេលយូរ ។ ករណីនេះ អាចកើតឡើងក្រោមហេតុផល មួយចំនួនដូចជា៖ កំលាំង កន្រ្ដាក់របស់ស្បូនខ្សោយ   មាត់ស្បូនក្របើក ទីតាំងរបស់ទារកមានភាពខុសប្រក្រតី ទារកមានទំហំធំពេក ឬអាងត្រគៀកតូចពេក ដែលនាំឲ្យមានភាពលំបាក ក្នុងការសម្រាលកូន។

៥. ដំណើរខុសប្រក្រតីនៃចង្វាក់បេះដូងទារក៖ ចង្វាក់បេះដូងរបស់ទារក អាចដើរលឿន ឬយឺតខុសធម្មតា វាជាសញ្ញាបញ្ជាក់ថា ទារកខ្វះអ៊ុកស៊ីហ្សែន ឬមានបញ្ហាផ្សេងទៀត។

៦. បញ្ហាទងសុក៖ កើតឡើង នៅពេលដែល ទងសុកបានរុំជើង រុំដៃ ឬរុំករបស់ទារក ។

៧. ទារកកើតបញ្ច្រាស៖ កើតឡើង ពេលនៅពេលដែល ទារកសម្រាលចេញគូទ ឬជើងមកមុន ដែលជាធម្មតា ទារកត្រូវសម្រាល ចេញក្បាលមកមុន ។

៨. ជាប់ស្មា៖ កើតឡើង នៅពេលដែល ក្បាលទារក ចេញក្រៅផុត ប៉ុន្តែស្មារបស់ទារក នៅជាប់ មិនទាន់អាចចេញរួច ។​

៩. កង្វះអ៊ុកស៊ីហ្សែន៖ ទារកមិនអាចទទួលអ៊ុកស៊ីហ្សែន ឲ្យបានគ្រប់គ្រាន់ ពេលនៅក្នុងស្បូន ឬក្នុងកំឡុងពេលឈឺពោះសម្រាល ឬក្រោយសម្រាលរួច ។

១០. បញ្ហាហូរឈាម៖ ស្រ្តីអាចប្រឈម នឹងបញ្ហាហូរឈាមច្រើនខុសធម្មតា ក្នុងកំឡុងពេលសម្រាលកូន ឬក្រោយពេលសម្រាលកូន។ ករណីធ្ងន់ធ្ងរ វាអាចបង្កគ្រោះថ្នាក់ ដល់អាយុជីវិតបាន ។

ក្រៅពីនេះ ស្រ្តីពពោះអាចប្រឈម ជាមួយបញ្ហាមួយចំនួនទៀត ប៉ុន្តែលោកអ្នកមិនគួរ មានការព្រួយបារម្ភខ្លាំងពេកនោះទេ ព្រោះបច្ចុប្បន្ន មានបរិក្ខារពេទ្យទំនើបទាន់សម័យ និងមានគ្រូពេទ្យជំនាញ ។ ស្រ្តីគ្រប់រូប គួរប្រឹក្សាជាមួយគ្រូពេទ្យជំនាញ ឲ្យបានទៀងទាត់ នៅមុន និងក្នុងកំឡុងពេលពពោះ ព្រមទាំងក្រោយសម្រាលកូនរួមផង ៕

អត្ថបទដោយ៖ ហួ ភារ៉ា