ជឿថាមានមនុស្សច្រើនណាស់ដែលកំពុងតែជួបជាមួយបញ្ហាលាបឡេតែស្បែកមិនស។ ឆ្ងល់ណាស់ហេតុអ្វីលាបឡេដូចគេដែរ ខំពាក់អាវដៃវែងខោជើងវែង មិនដែលឱ្យស្បែកត្រូវថ្ងៃសោះ ហេតុអ្វីស្បែកនៅតែមិនស តើមកពីអ្វី? ចង់ដឹងថាហេតុអ្វីខំលាបឡេដែរតែមិន តោះអានអត្ថបទខាងក្រោម។
យោងតាមការបញ្ជាក់ពី healthline បានឱ្យដឹងថាសភាពស្បែករបស់មនុស្សយើងម្នាក់ៗគឺខុសគ្នាឆ្ងាយណាស់ អ្នកខ្លះមានសភាពស្បែកមានសំណើម និងមានជីវជាតិពីធម្មជាតិ លាបឡេតែបន្តិចសហើយ។ ប៉ុន្តែអ្នកខ្លះទៀតមានសភាពស្បែកស្ងួត និងខ្វះជីវជាតិ ស្បែកប្រភេទនេះពិបាកក្នុងការលាបឡេឱ្យសណាស់។ ជាមួយគ្នានេះដែរ កត្តាធំៗដែលធ្វើឱ្យបុគ្គលមួយចំនួនលាបឡេមិនសមានដូចខាងក្រោម៖
១. លាបឡេនៅពេលស្បែកស្ងួត៖ ហាមដាច់ខាតមិនត្រូវលាបឡេនៅពេលដែលស្បែកស្ងួត ឬមុនពេលងូតទឹកឱ្យសោះ ពីព្រោះប្រសិនជាអ្នកលាបអំឡុងពេលស្បែកកំពុងស្ងួត គ្មានជាតិទឹកគឺធ្វើឱ្យស្បែករបស់អ្នកកាន់តែស្ងួតលើសដើម ហើយសាច់ឡេដែលអ្នកលាបនោះក៏មិនជ្រាបដល់កោសិកាស្បែករបស់អ្នកដែរ។
២. ស្បែកខ្វះអាហាររូបត្ថម្ភ៖ ជឿថាត្រង់ចំណុចនេះមិនមានអ្នកយកចិត្តទុកដាក់ទេ មនុស្សជាច្រើននៅពេលដែលស្បែកស្រអាប់ ស្បែកស្ងួតគ្មានសំណើម ស្បែកមិនសតែងតែនឹកដល់ឡេមុនគេ គិតថាឱ្យតែលាបឡេដឹងតែសហើយ។ ប៉ុន្តែវាមិនដូចការគិតនោះទេ ប្រសិនជាស្បែករបស់អ្នកកំពុងតែខ្វះសារធាតុចិញ្ចឹម ខ្វះវីតាមីន A វីតាមីន D ស័ង្កសី ជាតិដែក និងវីតាមីន C នោះទោះជាអ្នកខំលាបឡេល្អយ៉ាងណា លាបអស់ច្រើនយ៉ាងណាក៏មិនសដែរ។ អ្នកគួរតែទៅពិគ្រោះយោបល់ជាមួយពេទ្យស្បែកគឺល្អបំផុត។
៣. ស្បែកខ្វះជាតិទឹក៖ ជាតិទឹកគឺសំខាន់បំផុតសម្រាប់ស្បែក ប្រសិនអ្នកជាមនុស្សដែលមិនសូវផឹកទឹក ផឹកទឹកមិនបានគ្រប់គ្រាន់ អ្នកនឹងគ្មានថ្ងៃទទួលបានស្បែកសឡើយទោះជាអ្នកខំលាបឡេអស់ច្រើនយ៉ាងណាក៏ដោយ។
៤. ប្រើសាប៊ូដុសខ្លួនដែលមានជាតិកាត់៖ សាប៊ូដុសខ្លួនមិនមែនមានតួនាទីជម្រះក្អែលតែមួយមុខនោះទេ ប៉ុន្តែសាប៊ូដុសខ្លួនគឺសំខាន់ណាស់សម្រាប់ស្បែក ប្រសិនជាអ្នកជ្រើសរើសប៉ះសាប៊ូដុសខ្លួនដែលមានជាតិកាត់មកដុះរាល់ថ្ងៃ គឺធ្វើឱ្យស្បែករបស់អ្នកប្រឈមនឹងងាប់កោសិកា ព្រមទាំងស្បែកស្ងួតផងដែរ។
៥. ប្រើឡេមិនត្រូវជាមួយស្បែក៖ នេះជាចំណុចសំខាន់បំផុតដែលអ្នកត្រូវតែដឹង ជំហានដំបូងអ្នកត្រូវស្គាល់ពីសភាពស្បែករបស់ខ្លួនឯងឱ្យច្បាស់ ហើយត្រូវដឹងថាស្បែករបស់អ្នកកំពុងមានបញ្ហាអ្វី បញ្ហាខ្មៅស្រអាប់ ខ្វះជាតិទឹក ឬយ៉ាងណា។ បន្ទាប់មកអ្នកត្រូវជ្រើសរើសឡេដែលមានសារធាតុផ្សំជួយជួសជុលស្បែករបស់អ្នក ទើបលាបទៅឆាប់ឃើញផល។
៦. កត្តាហ្សែននិងតំណពូជ៖ នេះជាកត្តាធម្មជាតិដែលមនុស្សគ្រប់គ្នាមិនអាចប្រកែកបាន។ ប្រសិនជាអ្នកមានហ្សែនពីម្តាយឬឪពុកដែលមានសម្បុរខ្មៅ ឬស្រអែម នោះស្បែកអ្នកក៏ទៅតាមនោះដែរ ហើយកត្តាហ្សែននេះហ្នឹងនៅជាមួយអ្នកអស់មួយជីវិត មិនអាចកែប្រែបានឡើយ៕
អត្ថបទដោយ៖ មឿន គន្ធា