នៅពេលដែលធ្មេញចាប់ផ្តើមមានឡើងពណ៌លឿង មិនសូវស្អាត មានកំបោរជាដើម យើងតែងតែនិយាយបន្តៗគ្នាថា “ទៅលាងធ្មេញចេញម្តងទៅ” ឬក៏ “ទៅពេទ្យធ្មេញ លាងធ្មេញទៅ” ជាដើម។ ជាមួយទន្តបណ្ឌិតជំនាញដែលមានបទពិសោធន៍ជាង១៥ឆ្នាំក៏បានចែករំលែកមកកាន់ចាបបៃតងដែរថា ការលាងធ្មេញមានអត្ថប្រយោជន៍ច្រើនណាស់ ប៉ុន្តែវាក៏ត្រូវធ្វើតាមក្បួនវេជ្ជសាស្រ្តទន្តបណ្ឌិតដែរ មិនមែនចេះតែធ្វើៗតាមចិត្តទេ ប្រយ័ត្នជួបបញ្ហាយំស្តាយក្រោយ។

តាមរយៈកិច្ចសម្ភាសផ្ទាល់ជាមួយ លោកស្រីទន្តបណ្ឌិត ណម ចំណាន ជាសហស្ថាបនិក និង ជាប្រធានផ្នែកគ្លីនិកនៅមន្ទីរព្យាបាលធ្មេញ មែលវីន ព្រមទាំងជាប្រធានសមាគមផ្នែកពត់តម្រង់ធ្មេញកម្ពុជា បានឱ្យដឹងថា ការលាងសម្អាតធ្មេញដោយក្រុមទន្តបណ្ឌិតជំនាញ អ្នកនឹងទទួលបានអត្ថប្រយោជន៍យ៉ាងច្រើនដូចជា៖

-ទទួលបាននូវក្លិនដង្ហើមស្រស់ថ្លា កាត់បន្ថយក្លិនមាត់

-បង្ការមិនឲ្យមានជម្ងឺរលាកអញ្ចាញធ្មេញ ដែលអាចប៉ះពាល់ដល់ធ្មេញ និង អនាម័យធ្មេញ

-ការពារមិនឲ្យធ្មេញងាយនឹងរង្គើ ឬ បាក់បែក, ព្រមទាំងធ្វើឲ្យធ្មេញមានពណ៌ស ស្អាត ញញឹមមានភាពជឿជាក់ជាងមុន

-ចុងក្រោយក៏អាចកាត់បន្ថយជំងឺដង្កូវស៊ីធ្មេញ ឬ រោគពុកធ្មេញជាដើមផងដែរ។

ចំណែកឯរយៈពេលចន្លោះនៃការសម្អាតនេះដែរ ជាទូទៅ​អ្នកមិនគួរសម្អាតឬលាងញឹកញាប់ពេកទេ យកល្អអ្នកគួរតែលាងរៀងរាល់៦ខែម្តងបានហើយ។ ហើយការលាងសម្អាតនេះ ក៏វាអាស្រ័យលើសុខភាពមាត់ធ្មេញ និង កម្រិតហានិភ័យនៃធ្មេញរបស់បុគ្គលម្នាក់ៗដូចគ្នា ព្រោះថាមនុស្សម្នាក់ៗមានទម្លាប់ខុសគ្នា សភាពធ្មេញក៏ខុសគ្នា ដូចជាអ្នកពិសាបារី ទទួលទានស្រាអាចនឹងធ្វើឡើងញឹកញាប់ជាងបុគ្គលធម្មតា។

ឧទាហរណ៍៖ បើអតិថិជនពិសាបារី ដែលឧស្សាហ៍ឡើងស្នឹមខ្មៅលើផ្ទៃធ្មេញ លោកស្រីទន្តបណ្ឌិត ណម ចំណាន ណែនាំឲ្យសម្អាតរៀងរាល់ ៣ ទៅ ៤ខែម្តង។ ចំណែកឯកុមារ ដែលទៅជួបទន្តបណ្ឌិតពិនិត្យលើកដំបូង មានសម្អេកធ្មេញច្រើន និង ចំនួនធ្មេញពុកខូចច្រើន លោកស្រីទន្តបណ្ឌិត ណែនាំឲ្យឪពុកម្តាយនាំមកសម្អាតរៀងរាល់៣ខែម្តង។ ក្នុងករណីពិសេសមួយទៀត បើអតិថិជនគាត់ចង់មកសម្អាតខ្លួនឯងរៀងរាល់ ១ខែ ឬ ២ខែម្តង ក៏លោកស្រីទន្តបណ្ឌិត មិនទទួលដែរ ព្រោះមិនចង់ឲ្យពួកគាត់ចំណាយច្រើន ហើយ វាអាចទៅបង្កឱ្យកើតមានហេតុធ្វើឲ្យស្រៀវធ្មេញវិញ កាលណាសម្អាតញឹកញាប់ពេក។ ជារួមយកល្អបំផុត គួរតែដាក់គម្លាតមកសម្អាតរៀងរាល់៣ ទៅ ៦ខែម្តងអាស្រ័យលើស្ថានភាពជាក់ស្តែងរបស់បុគ្គលម្នាក់ៗ។

សូមរម្លឹកផងដែរថា បច្ចុប្បន្នលោកស្រីទន្តបណ្ឌិត ក៏ជាទន្តបណ្ឌិតប្រចាំនៅមន្ទីរព្យាបាលអ្នកស្រីផ្ទាល់ដែលមានឈ្មោះថា មន្ទីរព្យាបាលធ្មេញ មែលវីន ។ អាស្រ័យហេតុនេះបងប្អូនដែលចង់សម្អាតធ្មេញ​ ឬ ចង់ពិគ្រោះបញ្ហាធ្មេញផ្សេងៗ ជាមួយទន្តបណ្ឌិតដែលមានជំនាញនិងឯកទេសជាង១៥ឆ្នាំ បងប្អូនអាចទាក់ទងទៅកាន់មន្ទីរព្យាបាលធ្មេញរបស់លោកស្រីផ្ទាល់បាន៕

អត្ថបទដោយ៖ កញ្ញា លីហួយ