ក្បួនទី១. ចេះ ៖ តាមលោក ជិន សំណាង ជាម្ចាស់សិប្បកម្មកែច្នៃផលសមុទ្របានផ្តល់បទសម្ភាធថា យើងធ្វើការងារ និងរកស៊ីអ្វីដោយ កុំឱ្យជីវិតលំបាក យើងត្រូវរៀនជំនាញហ្នឹងឱ្យចេះ ខំប្រឹងឱ្យខ្លាំង។ មុនគាត់ចេះជំនាញធ្វើបង្គាក្រៀមនេះ ពេលថ្ងៃខំប្រឹងធ្វើការ យប់ខំជ្រាវស្រាវ និងគិតណាស់ ទម្រាំគាត់មានសមត្ថភាពមានចំណូលរាប់ពាន់ដុល្លារក្នុងមួយខែ គាត់ត្រូវខំឱ្យខ្លួនចេះជំនាញមួយហ្នឹងឱ្យបាន។ ពាក្យខ្មែរយើងបានផ្តាំដែរថា “លំបាកមុន ស្រណុកក្រោយ” បើយើងខំឱ្យចេះជំនាញមួយឱ្យបានច្បាស់នោះ ជីវិតយើងមិនលំបាកពេញមួយជីវិតទេ។

ក្បួនទី២. ចាំ៖ បើយើងមិនចាំទេ ជីវិតយើងជួបតែការបរាជ័យដដែលៗ មិនខានទេ។ នេះជាសម្តីលោកពូ សំណាង។ គាត់បានបន្ថែមថា យើងរៀនសូត្រឱ្យចាំជារឿងល្អហើយ ប៉ុន្តែជីវិតយើងមានកំហុសច្រើនណាស់ ដូចនេះហើយ យើងត្រូវចេះចាំកំហុសណាមួយ ឱ្យយើងធ្វើជាបទពិសោធន៍ក្នុងជីវិត។ ពេលចាំកំហុស យើងមិនធ្វើវាលើកទីពីរទេ។

ក្បួនទី៣.ចាយ៖ មនុស្សសព្វថ្ងៃនេះមានបញ្ហាលុយ មកពីមិនទាន់ចេះចាយលុយ។ តាមលោកពូ សំណាង បានប្រាប់ថា បើយើងមិនចេះចាយលុយទេ រកបានច្រើនក៏ចាយអស់ពីខ្លួនដែរ។ ចាយឱ្យត្រូវ ចាយលើរបស់សំខាន់គឺចាយលើការរៀនសូត្រ និងចាយលុយលើការវិនិយោគណាមួយដើម្បីទាញចំណូលមកឱ្យយើងវិញ ទើបវាជារឿងសំខាន់។ កុំឱ្យចាយខុស ត្រូវគិតមុនចាយ បានយើងដឹងថា ចាយលុយទៅអ្វីមួយដែលចាំបាច់ឱ្យចំគោលដៅតែម្តង។

ក្បួនទី៤. ចូល៖ សម្រាប់ទីបួននេះក៏តពីចំណុចទី៣ដែរ។ លោកពូ សំណាង បានប្រាប់ថា ចាយលុយត្រូវលុយនឹងរត់ចូលហើយ។ ពេលលុយចូលត្រូវចេះទប់ចិត្ត កុំចាយតាមអារម្មណ៍នាំឱ្យក្រខ្លួនទេ។ អ្នកចាយអស់ៗ ភាគច្រើននាំឱ្យពួកគេស្រ្តេសណាស់។ សម្រាប់អ្នកមានលុយចូលហើយ ចេះចាយចេះគិត លុយចូលគឺកម្រចេញណាស់។ ព្រោះគេដឹងថា មានលុយក្នុងខ្លួនវាកក់ក្តៅ វាអត់ស្រ្តេសទេ ឬពេលយើងត្រូវការប្រើលុយ យើងបានលុយត្រៀមរួចជាការស្រាប់។ នេះជារឿងសំខាន់ណាស់សម្រាប់អនាគត ឱ្យអ្នកចេះរក្សាលុយចូលគឺចេះសន្សំនេះឯង៕ អត្ថបទដោយ៖ ទ្រ សុភាព

អ្នកអាចទិញបង្គាក្រៀមធម្មជាតិតាមលេខទូរស័ព្ទលោកជិន សំណាង៖ 016/017 864445 ផ្ញើរបាន ២៥ខេត្ត/ក្រុង