តាមការរាយការណ៍ពីប្រភពព័ត៌មានថៃThethaiger នៅថ្ងៃទី០៦ ខែមិថុនា ឆ្នាំ២០២៣ នេះបានឱ្យដឹងថា ការព្យាករណ៍អាកាសធាតុក្នុងប្រទេសថៃនឹងមានភ្លៀងធ្លាក់ និងខ្យល់បោកបក់ខ្លាំង វាយប្រហារ៤៨ខេត្តនៅទូទាំងប្រទេសថៃ និងឱកាសមានភ្លៀងធ្លាក់ខ្លាំង៧០% នៅក្នុងទីក្រុងបាងកក។ នាយកដ្ឋានឧតុនិយម ព្រមានប្រជាពលរដ្ឋអំពីគ្រោះទឹកជំនន់ដែលអាចកើតមាន និងដួលរលំព្រៃឈើ ខណៈនៅតំបន់មាត់សមុទ្រអាចមានរលកកម្ពស់រហូតដល់៣ម៉ែត្រ។
ស្ថានភាពអាកាសធាតុមិនល្អរបស់ប្រទេសនេះ ត្រូវបានគេសន្មត់ថា បណ្តាលមកពីការរួមផ្សំនៃឥទ្ធិពលធ្លាក់ខ្យល់ពីប្រទេសមីយ៉ាន់ម៉ា ខ្យល់មូសុងដែលឆ្លងកាត់ភាគខាងជើង និងភាគឦសាន ប្រទេសថៃ និងតំបន់សម្ពាធទាបខ្លាំងនៅសមុទ្រចិនខាងត្បូង និងតាមបណ្តោយឆ្នេរសមុទ្រនៃប្រទេសមីយ៉ាន់ម៉ា។ ករណីនេះបណ្តាលឱ្យមានភ្លៀងធ្លាក់កើនឡើង ហើយតំបន់ខ្លះមានភ្លៀងធ្លាក់កាន់តែខ្លាំង ជាពិសេសនៅតំបន់ភាគឦសាន ខាងកើត និងភាគនិរតីនៃប្រទេស។
ក្រសួងធនធានទឹកថៃ បានអំពាវនាវដល់ប្រជាពលរដ្ឋ ដែលរស់នៅក្នុងតំបន់ងាយរងគ្រោះ មានការប្រុងប្រយ័ត្នចំពោះភ្លៀងធ្លាក់ខ្លាំង កម្ពស់ទឹកកកកុញ និងទឹកជំនន់ដែលអាចកើតមាន។ លើសពីនេះ អ្នកដែលរស់នៅតំបន់ភ្នំក្បែរផ្លូវទឹក គួរតែប្រុងប្រយ័ត្នខ្ពស់។ ចំណែកតំបន់មាត់សមុទ្រនៅសមុទ្រAndaman ខ្យល់ត្រូវបានគេរំពឹងថានឹងមានរលកខ្ពស់ដែលធ្វើឱ្យមានគ្រោះថ្នាក់សម្រាប់ទូកតូចៗផងដែរ។
បន្ថែមពីនោះ អាជ្ញាធរក្នុងប្រទេសនេះ ក៏បានព្រមានផងដែរថា សម្រាប់ទីក្រុងបាងកក បានឱកាសទទួលរងនូវភ្លៀង ផ្គររន្ទះ ដោយភាគច្រើននឹងធ្លាក់នៅពេលរសៀលនិងពេលល្ងាច៕
អត្ថបទដោយ៖ Senghong