អំឡុងរដូវក្ដៅនេះ ថ្ងៃខ្លះសីតុណ្ហភាពឡើងដល់៣៧អង្សា ថ្ងៃខ្លះទៀតសីតុណ្ហភាពឡើងដល់៣៨អង្សាក៏មាន។ នៅពេលក្ដៅម្តងៗយើងគ្រប់គ្នាតែងតែមានអារម្មណ៍ថា អស់កម្លាំង ខ្សោះជាតិទឹក ហត់នឿយ ឬឃ្លានរបស់ផ្អែម ហើយបើបានទឹកភេសជ្ជៈណាផ្អែមញុំាវិញ ដឹងតែក្នុងខ្លួនប្រាណមានកម្លាំងពេញលេញតែម្តង។ ប៉ុន្តែមិនហ៊ានញុំាភេសជ្ជៈផ្អែមនោះទេ ពីព្រោះខ្លាចកើតជំងឺទឹកនោមផ្អែម ឬក៏រោគផ្សេងៗ ទើបសម្រេចចិត្តញុំាទឹកអំពៅជំនួសវិញ។ តើការផឹកទឹកអំពៅជំនួសទឹកសុទ្ធមានគ្រោះថ្នាក់ដែរឬទេ?

ជាការពិតណាស់ វេជ្ជបណ្ឌិត Bui Dac Sang មានប្រសាសន៍ថា ទឹកអំពៅមានលក្ខណៈសម្បត្តិផ្អែមត្រជាក់ ដែលជួយឱ្យរាយកាយមានថាមពលជះឆ្ងាយពីអាការធាតុកម្ដៅ បន្សាបជាតិពុល និងបង្កើនភាពសុំា។ មួយវិញទៀត ទឹកអំពៅមានជាតិស្ករធម្មជាតិ ជួយឱ្យរាងកាយមានថាមពល កាត់បន្ថយភាពនឿយហត់ ជាពិសេសថ្ងៃក្ដៅខ្លាំង។ នេះបើយោងតាមប្រភព VNexpress។

គួរជម្រាបថា ទឹកអំពៅសម្បូរជាតិកាល់ស្យូម ទង់ដែង ម៉ាញ៉េស្យូម ម៉ង់ហ្គាណែស ប៉ូតាស្យូម និងស័ង្កសី។ ទឹកអំពៅមួយកែវផ្តល់នូវជាតិដែក និងវីតាមីនជាច្រើនដូចជា A, C, B1, B2, B3, B5, B6 ក៏ដូចជាសារធាតុប្រឆាំងអុកស៊ីតកម្ម ប្រូតេអ៊ីន និងជាតិសរសៃផងដែរ។

មិនតែប៉ុណ្ណោះទេ ទឹកអំពៅមិនមែនមានតែសារធាតុស្ករសុទ្ធនោះទេ វាមានទឹកប្រហែល៧០-៧៥% ជាតិសរសៃប្រហែល១០-១៥% និងជាតិស្ករ១៣-១៥%។ តាមពិតទៅ វាក៏ជាប្រភពដ៏សំខាន់នៃជាតិស្ករល្អដែលស្ថិតនៅក្នុងទម្រង់មិនទាន់កែច្នៃ។ មួយវិញទៀត វាក៏ជាប្រភពល្អដែលសម្បូរទៅដោយសារធាតុប្រឆាំងអុកស៊ីតកម្ម phenolic និង flavonoid ផងដែរ។ នេះបើយោងតាមប្រភព Healthline។

វេជ្ជបណ្ឌិត Bui Dac Sang បានបន្ថែមថា ទោះជាយ៉ាងណាក៏ដោយទឹកអំពៅមានរសជាតិផ្អែមណាស់ ហើយសម្រាប់​អ្នក​មាន​សុខភាព​ធម្មតា ការ​ផឹក​ច្រើន​អាច​នាំ​ឱ្យ​ឡើង​ទម្ងន់​យ៉ាង​ងាយ។ ប៉ុន្តែអ្នកដែលមានអាការដូចជា ពោះវៀនខ្សោយ ហើមពោះ និងរាគ មិនគួរផឹកទឹកអំពៅជាប្រចាំនោះទេ។ រីឯអ្នកដែលមានជំងឺដូចជា ជំងឺទឹកនោមផ្អែម ខ្លាញ់ក្នុងឈាម ជំងឺរលាកសន្លាក់ គួរតែត្រូវផឹកក្នុងកម្រិតល្មម។

ម៉្យាងវិញទៀត ការផឹកទឹកអំពៅលើចិញ្ចើមផ្លូវ ប្រឈមនឹងការឆ្លងបាក់តេរី តាំងពីការលាងសម្អាតដើមអំពៅ កន្លែងទុកដើមអំពៅ កែវទឹកអំពៅ ដែលការឆ្លងបាក់តេរីនេះអាចប៉ះពាល់ដល់ប្រព័ន្ធរំលាយអាហារ ហើយថែមទាំងបណ្តាលឱ្យពុលទៀតផង។

ដូច្នេះអ្នកមិនគួរផឹកទឹកអំពៅតែមួយមុខនោះទេ អ្នកគួរតែប្តូរមកផឹកទឹកផ្លែឈើផ្សេងៗដូចជា ទឹកក្រូច ទឹកត្របែក និងទឹកឪឡឹកជាដើម។ នៅក្នុងនោះដែរ ប្រសិនបើអ្នកផឹកទឹកអំពៅ អ្នកអាចបន្ថែមអំបិលបន្តិចទៅក្នុងភេសជ្ជៈរបស់អ្នក ដើម្បីបង្កើនរសជាតិ និងបំពេញជាតិអេឡិចត្រូលីតដែលបាត់បង់តាមរយៈការបែកញើស។

ដើម្បី​ធានា​ដល់​សុខភាពរបស់អ្នក អ្នក​គួរតែឧស្សាហ៍ផឹកទឹកសាប(ទឹកសុទ្ធ)​ ដែលវាជា​ជម្រើសដ៏ល្អបំផុតសម្រាប់សុខភាព​។ មនុស្សជាច្រើនមិនចូលចិត្តផឹកទឹកចម្រោះទេ ព្រោះវាគ្មានរសជាតិ អាចបន្ថែមក្រូចឆ្មារពីរបីចំណិត ស្ត្របឺរី ត្រសក់ ស្លឹកជីអង្កាម ចូលក្នុងដបទឹក នោះវាក៏អាចជួយបង្កើនរសជាតិមួយកម្រិតផងដែរ។