បច្ចុប្បន្នសង្កេតឃើញថាបញ្ហាឈឺក្រពះ ខ្សោយតម្រងនោមគឺបានវាយលុកខ្លាំងណាស់មកលើប្រជាជនខ្មែរយើង។ មនុស្សមួយចំនួនកំពុងមានជំងឺឈឺក្រពះខ្សោយតម្រងនោម ទាំងវ័យក្មេង គឺដោយសារទម្លាប់រស់នៅមិនល្អ និងញ៉ាំអាហារមិនបានត្រឹមត្រូវផងដែរ។ ដូច្នេះដើម្បីចៀសវាងកុំឱ្យអ្នកកើតជំងឺក្រពះ និងខ្សោយតម្រងនោមទាំងវ័យក្មេងសូមអានការណែនាំខាងក្រោម។
១. បញ្ឈប់ទម្លាប់ញ៉ាំអាហារហើយដេក៖ ផ្អែកតាមប្រសាសន៍របស់ អ្នកឧកញ៉ាវេជ្ជបណ្ឌិត គួច ម៉េងលី បានបញ្ជាក់ឱ្យដឹងថា បញ្ហានៃការកើតនូវជំងឺរលាកក្រពះ ឬឈឺក្រពះ គឺបណ្ដាលមកពីការញ៉ាំអាហារហើយដេក ទម្លាប់បែបនេះគឺធ្វើឱ្យក្រពះមិនអាចកិនម្ហូបបានទេ វាធ្វើឱ្យម្ហូបនៅថេរ យូរៗទៅវានឹងផ្អូម បង្កឱ្យជាតិអាស៊ីតក្នុងក្រពះកើនឡើង ធ្វើឱ្យកកិតនឹងជញ្ជាំងក្រពះ ដែលជាហេតុនាំធ្វើឱ្យជាតិរំអិលនៅជញ្ជាំងក្រពះត្រូវបាត់បង់ ឬសឹក ហើយនៅពេលដែលសារធាតុរំអិលត្រូវសឹកយូរៗវានឹងត្រូវរបក រហូតកើតចេញជាដំបៅក្រពះតែម្តង។ ហេតុនេះហើយទើបបាន អ្នកដែលមានបញ្ហាក្រពះ ញ៉ាំអាហារចាប់ផ្តើមក្រហាយចុក។
២. បញ្ឈប់ទម្លាប់ញ៉ាំអាហារបែបបង្ខំ៖ ការញ៉ាំអាហារបែបបង្ខំ ឬញ៉ាំអាហារបែបលឿនៗ ដោយមិនបានយកចិត្តទុកដាក់ក្នុងការទំពាឱ្យហ្មត់ គឺធ្វើឱ្យអាហារដែលអ្នកលេបចូលទៅនោះនៅជាប់គាំងក្នុងក្រពះ ពីព្រោះក្រពះរបស់យើងម្នាក់ៗមិនមានសមត្ថភាពរំលាយអាហារបរិមាណច្រើនក្នុងពេលតែមួយបានទេ។ ដូច្នេះពេលញ៉ាំអាហារ ឬបាយអ្នកត្រូវញ៉ាំតាមសម្រួលទំពាឱ្យហ្មត់ កុំញ៉ាំបង្ខំ។
៣. បញ្ឈប់ទម្លាប់ញ៉ាំអាហារប្រៃ៖ អាហារដែលមានរសជាតិប្រៃ និងអាហារកែច្នៃ ជាប្រភេទអាហារដែលប៉ះពាល់ដល់សម្ពាធឈាម អាចបណ្តាលឱ្យកើតជំងឺបេះដូង សួតផងដែរ។ ជាពិសេសគឺក្រលៀនឬភាសាពេទ្យហៅថាតម្រងនោម ការបន្តញ៉ាំអាហារប្រៃយូរៗទៅវាធ្វើឱ្យកម្រិតប៉ូតាស្យូមក្នុងរាងកាយកើនឡើង នាំឱ្យសម្ពាធឈាមឡើងខ្ពស់ បណ្តាលឱ្យបាត់បង់សមត្ថភាពរបស់ក្រលៀន និងបណ្តាលឱ្យខូចក្រលៀនផងដែរ។
៤. បញ្ឈប់ទម្លាប់ផឹកកាហ្វច្រើនក្នុង១ថ្ងៃ៖ យោងតាមការចុះផ្សាយរបស់គេហទំព័រ healthline បានបញ្ជាក់ថា ការញ៉ាំកាហ្វេច្រើនលើសកម្រិតជារៀងរាល់ថ្ងៃ ជាតិកាហ្វេអ៊ីនលើសអាចធ្វើឱ្យក្រពះរបស់អ្នកប្រឈមនឹងការរលាក។ តាមការណែនាំ ជាតិកាហ្វេអ៊ីន ៤០០ mg គឺសមល្មមសម្រាប់មនុស្សពេញវ័យ ដូច្នេះក្នុងមួយថ្ងៃអ្នកមិនត្រូវញ៉ាំការហ្វេឱ្យលើសពី ៤ពែងឡើយ។
គូសបញ្ជាក់ផងដែរថា ៤ចំណុចខាងលើសុទ្ធតែជាទម្លាប់តូចៗប្រចាំថ្ងៃដែលមនុស្សជាច្រើនតែងតែធ្វើ។ ប៉ុន្តែយើងកុំភ្លេចថាទម្លាប់តូចទាំងនេះបើយើងនៅតែបន្តធ្វើពីមួយថ្ងៃទៅមួយថ្ងៃ វានឹងបង្កជាបញ្ហា និងបន្សល់ទុកជាជំងឺឱ្យយើងនៅថ្ងៃខាងមុខមិនខាន៕
អត្ថបទដោយ៖ មឿន គន្ធា