ហឹរគឺជារសជាតិដ៏ពេញនិយមបំផុតសម្រាប់ជនជាតិអាស៊ីយើង ដែលអាហារមួយភាគធំតែងតែមានរសជាតិហឹរត្រូវបានដាក់បញ្ចូលឲ្យកាន់តែឱជារសឈ្ងុយឆ្ងាញ់។ ខណៈមានមនុស្សមួយចំនួនខ្លះទៀតបើថាម្ហូបមិនហឹរ ហើយមិនមានម្ទេសគឺមិនអាចបរិភោគបានឡើយ ដែលការញ៉ាំហឹរនេះស្ទើរតែក្លាយជាទម្លាប់ទៅហើយ។ ជាក់ស្ដែងមានការសិក្សាបានលើកឡើងថា អ្នកដែលចូលចិត្តញ៉ាំហឹរទំនងជាសប្បាយចិត្តជាងអ្នកដែលមិនចេះញ៉ាំហឹរ នេះបើយោងតាមការចុះផ្សាយរបស់គេហទំព័រ happyspicyhour ។
អ្នកវិទ្យាសាស្ត្រតែងតែស្វែងរកវិធីសាស្រ្តថ្មីដើម្បីធ្វើឲ្យមនុស្សមានអារម្មណ៍ធូរស្រាល ហើយយោងទៅតាមការសិក្សាថ្មីៗនេះ ការបន្ថែមម្ទេសបរិមាណសមល្មមទៅក្នុងរបបអាហារអាចជាដំណោះស្រាយក្នុងការកម្ចាត់រាល់នូវភាពមិនសប្បាយចិត្ត។ ជាក់ស្ដែងការបរិភោគហឹរ គឺវាធ្វើឱ្យយើងមានអារម្មណ៍សប្បាយចិត្ត រីករាយ ព្រោះវាអាចឱ្យខួរក្បាលអ្នកបញ្ចេញអ័រម៉ូនរីករាយserotonin ដែលជួយយើងទប់ទល់នឹងជំងឺធ្លាក់ទឹកចិត្ត ថប់អារម្មណ៍ កំហឹង និងភាពតានតឹង។ បើទោះបីជាញ៉ាំហឹរក្ដៅក្រហល់ក្រហាយ បែកញើស ក្ដៅចេញមកពីក្នុងពោះខ្លាំងយ៉ាងណាក៏ដោយ ក៏យើងនៅតែមានអារម្មណ៍រីករាយហើយសប្បាយចិត្តក្នុងការបន្តញ៉ាំផងដែរ។
ជាមួយគ្នានេះដែរម្ទេសជាគ្រឿងទេសដ៏អស្ចារ្យ វាបង្កើនចំណង់អាហារ ចលនាឈាមរត់ និងលំហូរឈាម ប្រយុទ្ធប្រឆាំងនឹងការមិនរំលាយអាហារ ហើមពោះ បំបាត់ភាពតានតឹង បន្ថយការឈឺចាប់សាច់ដុំ និងជាអង់ទីគ័រដ៏ល្អមួយផងដែរ។ នេះគឺជាមូលហេតុមួយដែលម្ទេសមានប្រជាប្រិយភាពខ្លាំងក្នុងមុខម្ហូបជុំវិញពិភពលោក។
សរុបយោងតាមការសិក្សារបស់អ្នកជំនាញបានអះអាងថា ការបរិភោគហឹរនៅក្នុងកម្រិតត្រឹមត្រូវណាមួយគឺវាបានផ្ដល់អត្ថប្រយោជន៍ជាច្រើនដល់សុខភាពដូចជា ប្រឆាំងនឹងការឡើងដំបៅស្បែក កាត់បន្ថយជាតិអាស៊ីតនៅក្នុងខ្លួន ជួយសម្រកទម្ងន់តាមរយៈការបង្កើនការរំលាយអាហារ ប៉ុន្តែចំពោះបុគ្គលណាដែលមានជំងឺរលាកពោះវៀនគួរតែចៀសវាងក្នុងការបរិភោគហឹរទើបជាការល្អ៕
អត្ថបទដោយ៖ ស្រីណុច