បញ្ហាសក់ជ្រុះស្បែកក្បាលកើតអង្គែរ កំពុងក្លាយជាប្រធានបទដ៏ក្តៅកគុក ពីព្រោះមនុស្សភាពច្រើនកំពុងតែជួបជាមួយបញ្ហានេះហើយដោះស្រាយមិនចេញ។ ថ្ងៃនេះក្រុមការងារចាបបៃតងយើងនឹងមកដោះស្រាយបញ្ហាទាំងនេះ តាមរយៈអ្នកជំនាញថែរក្សាសក់ម្នាក់។
អ្នកនាង សុខ សោភ័ណ្ឌ ជា Content Creator ដែលផលិតវីដេអូពីជីវិតប្រចាំថ្ងៃ និងមនុស្សស្រីម្នាក់ដែលស្រឡាញ់សរសៃសក់ខ្លាំង។ មុនពេលដែលអ្នកនាង មានសរសៃសក់ស្អាត វែង ភ្លឺរលោងដូចសព្វថ្ងៃអ្នកនាងក៏ធ្លាប់ជួបបញ្ហាជ្រុះសក់ សក់បែកចុង និងស្បែកក្បាលកើតអង្គែរដូចដែលបងប្អូនកំពុងជួបប្រទះដែរ។ ជាពិសេសអ្នកនាងជាស្រ្តីម្នាក់ដែលឆ្លងកាត់ការពពោះកូន អ្នកនាងប្រាប់ថា អំឡុងពេលពពោះអ្នកនាងជួបបញ្ហាសក់ជ្រុះខ្លាំងមកទាំងដៃៗ ធ្វើឱ្យអ្នកនាងអស់សង្ឃឹមថានឹងបានសក់ស្អាតដូចសព្វថ្ងៃណាស់។
បន្ទាប់ពីសម្រាលកូនរួច អ្នកបានងាកមកយកចិត្តទុកដាក់មើលថែសរសៃសក់ឡើងវិញដោយដំបូងអ្នកនាងចាប់ផ្តើមបង្កើតទម្លាប់ កក់សក់រាល់ថ្ងៃ។ ការកក់សក់រាល់ថ្ងៃធ្វើឱ្យសរសៃសក់របស់យើងភ្លឺរលោង ជ្រះជាតិកង្វក់ពីស្បែកក្បាល និងកម្ចាត់អង្គែរផងដែរ។ បន្ថែមពីលើនេះទៀត ចំពោះការបន្ទន់សក់វិញគឺអ្នកនាងមិនបន្ទន់គ្រប់ពេលដែលកក់សក់នោះទេ គឺបន្ទន់ ២ ថ្ងៃម្តង ពីព្រោះបើកាលណាយើងប្រើប្រាស់ក្រែមបន្ទន់ញឹកពេកធ្វើឱ្យសក់របស់យើងលើសជាតិប្រេង។
ចំណុចពិសេសមួយទៀត អ្នកនាង សុភ័ណ្ឌ បានប្រាប់មកមិត្តអ្នកអានថាប្រសិនជាចង់ឱ្យសក់យើងដុះលូតលាត់បានល្អ គឺយើងត្រូវញ៉ាំផ្លែឈើ និងទឹកឱ្យបានច្រើន។ ហើយចំពោះផ្លែឈើដែលជំនួយដល់សរសៃសក់បានល្អជាងគេបំផុតនោះគឺផ្លែក្រូច រាល់ថ្ងៃអ្នកនាងចូលចិត្តញ៉ាំផ្លែក្រូចណាស់ ពីព្រោះនៅក្នុងផ្លែក្រូចវាសម្បូរទៅដោយវីតាមីន C ជំនួយដល់ការលូតលាស់របស់សក់ និងធ្វើឱ្យអ្នកដែលមានបញ្ហាជ្រុះសក់អាចដុះសក់មកវិញបានលឿន។
ទន្ទឹមនឹងនេះដែរ ទម្លាប់ខុសពីគេមួយទៀតដែលជាមូលហេតុធ្វើឱ្យសក់អ្នកនាងដុះវែងលឿនខុសពីអ្នកដទៃ គឺអ្នកនាងជាមនុស្សដែលចូលចិត្ត តម្រឹមចុងសក់រាល់ខែ។ អ្នកនាងបានសង្កត់ធ្ងន់ត្រង់ចំណុចនេះថា មនុស្សជាច្រើនមិនហ៊ានតម្រឹមចុងសក់ទេពីព្រោះខ្លាចសក់ខ្លីមិនលូតលាស់ ប៉ុន្តែផ្ទុយទៅវិញការតម្រឹមចុងសក់រាល់ខែគឺជួយធ្វើឱ្យសក់របស់យើងលូតលាស់បានឆាប់តែវែងលឿនពីព្រោះយើងបានកាត់សរសៃសក់ដែលចាស់ចាស់ៗចោល ដូចជាសរសៃសក់ដែលបែកចុងជាដើម ហើយទុកឱ្យសរសៃសក់ថ្មីៗមានឱកាសលូតលាស់មកបានវែងលឿន ដូចពាក្យចាស់ពោលថា “សរសៃសក់ពេលស្គាល់កន្រ្តៃវានិងដុះលឿន”។ ចំពោះតិចនិកក្នុងការតម្រឹមចុងសក់នេះ គឺមិនមែនឱ្យយើងទឿកាត់សក់ចោលវែងៗនោះទេ គឺគេឱ្យកាត់តែ ១ថ្នាំងដៃប៉ុណ្ណោះ ពីព្រោះកាលណាយើងកាត់សក់ដែលបែកចុងចោលធ្វើឱ្យសក់ដែលល្អៗនិងលូតលាស់មកវែងលឿន៕
អត្ថបទដោយ៖ មឿន គន្ធា