១. ជាតិខ្លាញ់របស់ត្រី៖ ត្រីដែលសម្បូរជាតិខ្លាញ់រួមមានត្រីសាម៉ុង ត្រីធូណា និងត្រីសាឌីនជាដើម។ ពួកវាមានប្រភពសម្បូរទៅដោយអាស៊ីតខ្លាញ់អូមេហ្គា៣ ដែលអាចជួយបន្ថយការរលាក និងសម្ពាធឈាម។ សូម្បីតែអាហារបំប៉នដែលចម្រាញ់ចេញពីខ្លាញ់ត្រី ក៏មានប្រសិទ្ធភាពផងដែរ។

២. ទឹកដោះគោ៖ ការ​ផឹក​ទឹកដោះគោ​មាន​ជាតិ​ខ្លាញ់​តិច ឬ​គ្មាន​ជាតិ​ខ្លាញ់ អាច​ជួយ​បញ្ចុះ​សម្ពាធ​ឈាម។ ទឹកដោះគោមានសារធាតុចិញ្ចឹមដូចជា កាល់ស្យូម ម៉ាញេស្យូម និងប៉ូតាស្យូម ដែលអាចជួយរក្សាសម្ពាធឈាមឱ្យមានសុខភាពល្អ។

៣. ផ្លែចេកពិតជាល្អសុខភាពសរសៃឈាមណាស់។ យោងតាមសមាគមន៍បេះដូងអាមេរិក បានឱ្យដឹងថាជាតិប៉ូតាស្យូមអាចកាត់បន្ថយជាតិសូដ្យូម(អំបិល) និងបន្ថយសម្ពាធក្នុងសរសៃឈាមបាន។ សូម្បីអ្នកឧកញ៉ាវេជ្ជបណ្ឌិត គួច ម៉េងលី ក៏បានណែនាំថា គួរញ៉ាំផ្លែចេកឱ្យបានច្រើន ព្រោះជាតិប៉ូតាស្យូមមាននៅក្នុងផ្លែចេក អាចកាត់ជាតិអំបិលបានច្រើន ធ្វើឱ្យសម្ពាធឈាមមិនសូវឡើងខ្ពស់។

៤. ការទទួលទានទឹកផ្លែទទឹម១ពែងក្នុង១ថ្ងៃ រយៈពេល២៨ថ្ងៃជាប់គ្នា អាចកាត់បន្ថយសម្ពាធឈាមដែលឡើងខ្ពស់ឱ្យចុះមកវិញបានក្នុងរយៈពេលខ្លី។ យោងតាម Medicalnewstoday បានឱ្យដឹងថា ផ្លែទទឹម មានសារធាតុប្រឆាំងអុកស៊ីតកម្ម និងសារធាតុផ្សំផ្សេងៗទៀតដែលអាចទប់ស្កាត់សម្ពាធឈាមកុំឱ្យឡើងខ្ពស់បាន។

ដូច្នេះហើយ! ដើម្បីឱ្យសរសៃឈាមរបស់អ្នកបញ្ចុះឈាមបានល្អ និងមានសុខភាពរឹងមាំ អ្នកគួរបន្ថែមទម្លាប់ដូចជាហាត់ប្រាណ ហូបផ្លែឈើ និងគេងឱ្យបានគ្រប់គ្រាន់។ នេះជាទម្លាប់ល្អ បណ្តុះសុខភាពល្អ៕ អត្ថបទដោយ៖ ទ្រ សុភាព