ឪពុកម្តាយចិញ្ចឹមកូនចង់ឱ្យស្តាប់តាមខ្លួន ហើយមានអនាគតល្អ។ បើចិញ្ចឹមកូនខុសក្បួនហើយ កូនក៏ខូចដែរ។ តាមលោកស្រី Susan Forward ជាបណ្ឌិតចិត្តវិទ្យា និងជាអ្នកនិពន្ធលក់ដាច់បំផុតបានឱ្យដឹងថា ៤សញ្ញានេះបង្ហាញថាឪពុកម្តាយចង់ឱ្យកូនល្អជ្រុលពេករហូតដល់ក្លាយជាការបំពានផ្លូវចិត្តកូន ធ្វើឱ្យកូនខូចពិបាកប្រដៅទៅវិញ។
១. ឪពុកម្តាយតាមគ្រប់គ្រងកូនគ្រប់ជំហាន តាមដានកូនពេក ហើយតែងប្រាប់កូនពីអ្វីដែលត្រូវធ្វើបែបនេះ បែបនោះ តែការធ្វើបែបនេះកូនរបស់អ្នកអាចមានអារម្មណ៍ថាពួកគេគ្មានសេរីភាព មានភាពធុញទ្រាន់ក្នុងចិត្តខ្លាំងឡើងជាមួយឪឪពុកម្តាយ។ ជំនួសឱ្យការតាមគ្រប់គ្រងកូនគ្រប់ជំហាន ធ្វើនេះក៏មិនបានធ្វើនោះក៏មិនបាន នាំឱ្យកូនទាន់ខ្សោយទាំងគំនិតបញ្ញា និងសមត្ថភាពទៅវិញទេ។ ឪពុកម្តាយគួរផ្តល់សិទ្ធិឱ្យពួកគេសម្រេចចិត្តខ្លះ ខុសត្រូវអ្វីគួរណែនាំគេ ទើបមានគេចេះកែប្រែ និងរឹងមាំឡើងពេលពេញវ័យ។
២. កុំបណ្តោយឱ្យកូនរស់នៅតាមគំនិតរបស់ខ្លួនជាឪពុកម្តាយ គួរឱ្យកូនរស់នៅតាមគំនិតខ្លួនឯង ទើបកូនរឹងមាំ។ ប៉ុន្តែមានឪពុកម្តាយខ្លះ ចង់ឱ្យកូនរស់នៅតាមគំនិតមួយជីវិត ធ្វើឱ្យកូនតានតឹងផ្លូវចិត្ត រហូតលែងស្តាប់ឪពុកម្តាយ ហៅថា រឹងក្បាលពិបាកប្រដៅ។ តាមអ្នកស្រី Susan បានបញ្ជាក់ថាអ្នកមិនអាចផ្លាស់ប្តូររបៀបដែលនរណាម្នាក់គិត ឬមានអារម្មណ៍នោះទេ ថ្វីបើកូនៗអ្នកអាចបង្កើតរូបរាងរបស់ពួកគេបាន ប៉ុន្តែឪពុកម្តាយមិនអាចបង្កើតចិត្តគំនិតរបស់គេបាននោះឡើយ”។ ពេលកូនធ្វើអ្វីមួយ ខុសគ្រាន់តែណែនាំគេបានហើយ។
៣. ប្រើអារម្មណ៍អប់រំកូន កាន់តែកាត់បន្ថយភាពស្និទ្ធស្នាលជាមួយគ្រួសារ។ ជាពិសេសឪពុកម្តាយកុំប្រើអារម្មណ៍ដើម្បីអប់រំស្តីប្រដៅកូន ពេលយើងសប្បាយចិត្តអារម្មណ៍ល្អបណ្តោយកូន ញញឹមដាក់កូន តែពេលកំពុងមួរម៉ៅឃើញកូនធ្វើខុសប្រើអារម្មណ៍តប់ប្រមល់លាយកំហឹងទៅអប់រំកូននោះ កូននឹងកាន់តែទម្រើសពិបាកប្រដៅឡើង។
៤. ឪពុកម្តាយបដិសេធមិនទទួលស្គាល់កំហុសជាគំរូប្រាប់កូនថា កូនខុសត្រូវចេះបដិសេធដែរ។ អ្នកណាក៏ធ្លាប់ធ្វើខុសនិងមានកំហុសដែរ ឪពុកម្តាយដែលមិនចេះទទួលស្គាល់កំហុសខ្លួនដោយមើលឃើញតែកំហុសរបស់កូននោះគឺជារឿងគួរឱ្យបារម្ហមួយនិងធ្វើឱ្យពួកគេជាមនុស្សមើលមិនឃើញកំហុសខ្លួនឯងដែរ ពោលគឺពួកគេមានការប៉ះទង្គិចអារម្មណ៍មិនចេះទទួលស្គាល់កំហុសចេញពីគ្រូទី១របស់ពួកគេនេះឯង។ ដូច្នេះក្នុងនាមជាឪពុកម្តាយគួរតែមានតុល្យភាពរវាងគ្នានិងគ្នាដោយមិនប្រកាន់ថាខ្លួនមានវណ្ណៈណាមួយដើម្បីគេចវេចការទទួលកំហុសនោះឡើយ៕ អត្ថបទដោយ៖ ទ្រ សុភាព