បច្ចុប្បន្នគេសង្កេតឃើញ ប្រជាពលរដ្ឋខ្មែរយើង មួយចំនួនមានទម្លាប់ញ៉ាំអាហារ ដែលមានជាតិអំបិលខ្ពស់ ឬអាចនិយាយមួយបែបទៀតថា ចូលចិត្តញ៉ាំប្រៃ ។ តើការចូលចិត្តញ៉ាំប្រៃនេះ អាចបង្កឲ្យមានផលប៉ះពាល់ ចំពោះសុខភាពយ៉ាងដូចម្តេចខ្លះ?

បើយោងតាមគេហទំព័រ clevelandclinic.org អ្នកដែលមានទម្លាប់ ញ៉ាំអាហារប្រៃ អាចប្រឈមជាមួយ បញ្ហាសុខភាពធ្ងន់ធ្ងរ ដូចជាបញ្ហាសរសៃឈាម ជំងឺបេះដូង ជំងឺលើសសម្ពាធឈាម និងជំងឺខ្សោយតម្រងនោមជាដើម ។

នៅពេលដែលជាតិអំបិល បានកើនឡើងខ្លាំងនៅក្នុងចរន្តឈាម និងរយៈពេលយូរ វានឹងធ្វើឲ្យសរសៃឈាម ប្រែជារឹង និងត្បៀត ដែលជាមូលហេតុនាំឱ្យ កើនឡើងសម្ពាធឈាម ។ ស្របពេលជាមួយគ្នានេះ ការផ្គត់ផ្គង់ចំណីអាហារ និងអ៊ុកស៊ីសែន ទៅកាន់រាងកាយក៏ខ្វះខាត ដែលជាមូលហេតុដ៏ចម្បង នាំឲ្យបេះដូង ធ្វើការខ្លាំងជាងមុន ។ ពេលនោះហើយ ដែលសម្ពាធឈាម កាន់តែឡើងខ្ពស់ទៅៗ ហើយបេះដូងក៏ចាប់ផ្ដើមមានបញ្ហាផងដែរ ។

ប្រសិនបើ ស្ថានភាពបែបនេះ នៅតែបន្តរយៈពេលយូរ នោះសាច់ដុំបេះដូង ចាប់ផ្ដើមចុះខ្សោយ និងអាចរីកធំ ដែលជាមូលហេតុនាំឲ្យ មានបញ្ហាគាំងបេះដូង ឬប្រឈមនឹងការ ដាច់សរសៃឈាម នៅក្នុងខួរក្បាលផងដែរ ។

សម្ពាធឈាមខ្ពស់ ក៏បានធ្វើឲ្យ ប៉ះពាល់ដល់ ប្រព័ន្ធដំណើរការនៃតម្រងនោម ជាពិសេសសរសៃឈាមតូចៗ ដែលនៅក្នុងតម្រងនោម នឹងរងការខូចខាត ហើយក៏បង្កឲ្យ កើតមានជំងឺខ្សោយតម្រងនោមរ៉ាំរ៉ៃតែម្ដង ។

ករណីនេះ ភាគច្រើនអ្នកជំងឺ មិនបានដឹងខ្លួនជាមុនថា ពួកគាត់មានបញ្ហាលើសសម្ពាធឈាមទេ ព្រោះសញ្ញា និងរោគសញ្ញានៃជំងឺលើសសម្ពាធឈាម ភាគច្រើន មានលក្ខណៈស្ងៀមស្ងាត់ និងមានភាពមិនច្បាស់លាស់ ។

ប្រសិនបើមានសញ្ញា និងរោគសញ្ញាដូចជា អស់កម្លាំងខុសធម្មតា គេងមិនសូវលក់ មានរមាស់ស្បែក មានឈាមក្នុងទឹកនោម នោមតិចជាងធម្មតា មានហើមត្រង់ភ្នែកគោ ប្រអប់ជើង ឬក្រោមភ្នែក មិនឃ្លានអាហារ ក្អួតចង្អោរ រមួលសាច់់ដុំ និងស្លេកស្លាំង -ល- សូមប្រញាប់ប្រឹក្សាជាមួយគ្រូពេទ្យជំនាញ ។ ក្រៅពីនេះ លោកអ្នកគួរផ្លាស់ប្ដូរទម្លាប់ កុំញ៉ាំអាហារដែលមានរសជាតិប្រៃខ្លាំង ហាត់ប្រាណឲ្យបានទៀងទាត់ និងញ៉ាំទឹកឲ្យបានគ្រប់គ្រាន់ផងដែរ ៕

អត្ថបទដោយ៖ ហួ ភារ៉ា