ជឿថាមានបងប្អូនយើងមួយចំនួន ធ្លាប់មានបទពិសោធន៍ជ្រុះសក់ ប៉ុន្តែវាអាចជ្រុះតិចតួច ឬអ្នកខ្លះទៀតជ្រុះសក់ច្រើន ខុសធម្មតា ដែលធ្វើឲ្យសក់ស្ដើង ។ មានកត្តាជាច្រើន ដែលអាចជាប់ពាក់ព័ន្ធ នឹងបញ្ហាជ្រុះសក់ ហើយយើងអាចមានមធ្យោបាយដោះស្រាយបាន។

យោងតាមគេហទំព័រ healthline.com មានមូលហេតុមួយចំនួន ដែលអាចបណ្ដាលឲ្យ លោកអ្នកមានបញ្ហាជ្រុះសក់ ។

១. ប្ដូរពណ៌សក់៖ ការប្ដូរពណ៌សក់ញឹកញាប់ និងការប្រើប្រាស់ ថ្នាំពណ៌សក់ មិនបានត្រឹមត្រូវតាមបច្ចេកទេស អាចមូលហេតុនាំឲ្យ ជ្រុះសក់បាន ។

២.​ ភាពតឹងណែន និងហប់៖ ឧទាហរណ៍ ដូចជាការពាក់ពួកសុវត្ថិភាព ដែលមានភាណតឹងណែន ចង្អៀតខ្លាំងពេក ឬសកម្មភាពមួយចំនួន ដែលបង្កឲ្យមានភាពហប់់ ណែន ដល់សក់ញឹកញាប់ វាអាចជាមូលហេតុនាំឲ្យ ប៉ះពាល់ដល់គល់សក់ និងបង្កឲ្យសក់ជ្រុះបាន។

៣. កង្វះអាហាររូបត្ថម្ភដល់សក់៖ សក់ត្រូវការ សារធាតុសំខាន់ៗដូចជា ជាតិដែក ជាតិរ៉ែច្រើនប្រភេទ​ វីតាមីនចម្រុះ និង អាស៊ីត folic ដើម្បីមានសុខភាពល្អ និងមិនងាយជ្រុះ ។ ករណីរបបចំណីអាហារ ដែលខ្វះសារធាតុទាំងនេះ វាអាចជាមូលហេតុនាំឲ្យជ្រុះសក់។​

៤. អារម្មណ៍ស្រ្តេសរ៉ាំរ៉ៃ៖ ការមានអារម្មណ៍ស្រ្តេសរ៉ាំរ៉ៃ គឺបានបណ្ដាលឲ្យ មានការកើនឡើង នៃអ័រម៉ូន cortisol ដែលធ្វើឲ្យប៉ះពាល់ដល់ សុខភាពនៃឫសសក់ ។

៥. ការពពោះ៖ ក្នុងកំឡុងពេលពពោះ រាងកាយស្រ្តី មានការប្រែប្រួលអ័រម៉ូនច្រើន វាអាចជាមូលហេតុ នាំឲ្យប៉ះពាល់ដល់ សុខភាពរបស់សក់ផងដែរ ។​

ក្រៅពីនេះ អាចមានមូលហេតុមួយចំនួនទៀតដូចជា៖ ការស្រកទម្ងន់លឿនពេក ត្រឹមរយៈខ្លី ការព្យាបាលជំងឺ autoimmune (ជាប្រភេទជំងឺ ដែលប្រព័ន្ធការពាររាងកាយ បានវាយប្រហារលើកោលិកាខ្លូនឯង) ការចុះខ្សោយនៃប្រព័ន្ធការពាររាងកាយ មានបញ្ហាស្បែក និងការបង្ករោគ កង្វះវីតាមីន D និងមូលហេតុផ្សេងមួយចំនួនទៀត ៕

អត្ថបទដោយ៖ ហួ ភារ៉ា