ការសិក្សាមួយរបស់អង្គការសុខភាពពិភពលោកបានបង្ហាញថា ៨០ ភាគរយនៃជំងឺបេះដូង និងជំងឺសរសៃប្រសាទ ដែលជារឿងមួយធ្វើឱ្យមហាជនកំពុងមានភាពភ័យខ្លាច និងឈឺក្បាលយ៉ាងខ្លាំង ប៉ុន្តែយ៉ាងណាមិញអង្គសុខភាពពិភពលោកអះអាងថា អ្នកអាចជៀសវាងបាន លុះត្រាតែអ្នកអនុវត្តន៍នៅរឿងទាំង ៥ យ៉ាងនេះ៖
១‑អនុវត្តរបបអាហារឱ្យបានត្រឹមត្រូវ
វាមានន័យថា អ្នកត្រូវតែកាត់បន្ថយការប្រើប្រាស់នៅបរិមាណអំបិល, ខ្លាញ់ ឱ្យកាន់តែទាបកាន់តែល្អ ដោយហេតុនេះហើយ អង្គការសុខភាពពិភពលោកតែងជំរុញ និងលើកទឹកចិត្តឱ្យមហាជនគ្រប់រូបគួរទទួលទានបន្លែបៃតង និងផ្លែឈើ ឱ្យបានប្រមាណ ៤០០ ក្រាមក្នុងមួយថ្ងៃ។ លើសពីនេះទៀត ទឹកជាប្រភពសំខាន់សម្រាប់រាងកាយ ដូច្នេះវាជារឿងចាំបាច់ណាដែលអ្នកត្រូវអនុវត្តន៍លើការទទួលទានទឹកឱ្យបានគ្រប់គ្រាន់ ដើម្បីជួយធ្វើឱ្យចរន្តឈាមល្អ និងការពារជំងឺសរសៃឈាមថែមទៀតផង។
២‑អនុវត្តន៍លំហាត់ប្រាណឱ្យបានទៀងទាត់
ការសិក្សាមួយបានបង្ហាញថា ការធ្វើលំហាត់ប្រាណទៀងទាត់អាចជួយកាត់បន្ថយហានិភ័យនៃការវិវត្តទៅជាជំងឺបេះដូង និងជំងឺសរសៃឈាមបានយ៉ាងមានប្រសិទ្ធភាព។ ទន្ទឹមនឹងនេះអ្នកគួរតែហាត់ប្រាណកន្លះម៉ោង ទៅ មួយម៉ោងក្នុងមួយថ្ងៃ ដោយធ្វើជាប្រចាំឱ្យបានយ៉ាងហោចណាស់ ៥ ថ្ងៃក្នុងមួយសប្តាហ៍
៣‑ការកាត់បន្ថយភាពតានតឹង
នៅពេលដែលអ្នកមានអារម្មណ៍ខឹង នោះវានឹងធ្វើឱ្យសម្ពាធឈាមអ្នកឡើងខ្ពស់ អញ្ចឹងសម្រាប់អ្នកដែលមានជំងឺសរសៃឈាម និងជំងឺបេះដូង យល់ល្អអ្នកមិនគួរធ្វើឱ្យអារម្មណ៍របស់អ្នកតានតឹង ឬក៏ខឹងនោះទេ ចូលអ្នកព្យាយាមបង្កើតនូវអារម្មណ៍ធូរស្បើយ សប្បាយចិត្ត រីករាយឱ្យបានច្រើនទើបជាការប្រសើរ។
៤‑ហាមជក់បារី ឬនៅឱ្យឆ្ងាយពីបារី
ថ្នាំជក់ ឬបារី មិនត្រឹមតែបង្កគ្រោះថ្នាក់ដល់សួតប៉ុណ្ណោះទេ ប៉ុន្តែសារជាតិនីកូទីនមាននៅក្នុងបារីនោះ វានឹងធ្វើឱ្យប៉ះពាល់ដល់សរសៃឈាមទៀត មិនតែប៉ុណ្ណោះវាបង្កឱ្យមានជំងឺសរសៃឈាមក្នុងបេះដូង និងជំងឺសរសៃឈាមប្រភេទផ្សេងៗជាច្រើនផងដែរ ដូច្នេះដើម្បីការពារពីការកើតជំងឺបេះដូង និងជំងឺសរសៃឈាម ចូលអ្នកតាំងចិត្តនិយាយថាទេចំពោះបារី ឬក៏ឈប់ជក់បារី។
៥‑កាត់បន្ថយការទទួលទានស្រា
ជាតិអាល់កុលនៅក្នុងស្រាវាមិនផ្អែមទេ ហេតុអ្វីអ្នកចូកចិត្តផឹកម្លេះ? អ្នកត្រូវដឹងថា សរសៃឈាមរបស់អ្នកអាចកកស្ទះទៅបានបើអ្នកទទួលទានស្រាមិនឈប់ ដែលជាហេតុបង្កឱ្យកើតមានជំងឺបេះដូង ជំងឺមហារីក និងប៉ះពាល់សរសៃឈាមជាខ្លាំង។ ដូច្នេះបើអ្នកមិនស្រលាញ់សុខភាពអ្នកធ្វើចុះ ប៉ុន្តែប្រសិនបើអ្នកស្រលាញ់សុខភាពចូលអ្នកជៀងវាងពីការសេពគ្រឿងស្រវឹង នេះជាកត្តាដែលអ្នកត្រូវអនុវត្តន៍៕
អត្ថបទស្រាវជ្រាវដោយ៖ម៉ាង វិសិដ្ឋារតន៍