តាមលោកស្រីវេជ្ជបណ្ឌិត Archana Batra អ្នកឯកទេសខាងចំណីអាហារ និងអ្នកជំនាញជំងឺទឹកនោមផ្អែមបានប្រាប់ថា អ្នកលើសជាតិខ្លាញ់ក្នុងខ្លួនងាយប៉ះពាល់សុខភាពបេះដូង ជំងឺទឹកនោមផ្អែម និងបញ្ហាសន្លាក់ជាដើម។ ប្រសិនបើអ្នកចង់ ស្រកគីឡូ និងកាត់បន្ថយជាតិខ្លាញ់ក្នុងខ្លួន ខាងក្រោមនេះជាគន្លឹះដ៏មានប្រសិទ្ធភាពដើម្បីជួយអ្នកឱ្យសម្រេចបាននូវគោលដៅ៖

គ្រឹះជោគជ័យកម្ចាត់ជាតិខ្លាញ់ស្ថិតលើរបបអាហារឱ្យមានតុល្យភាព។ ជារបបអាហារមានជាតិប្រូតេអ៊ីនគ្មានខ្លាញ់ និងជាតិសរសៃច្រើនមានបន្លែ ផ្លែឈើ និងគ្រាប់ធញ្ញជាតិក្នុងរបបអាហារប្រចាំថ្ងៃ។ តាមលោកស្រី Batraបានបញ្ជាក់ថា ការកាត់បន្ថយអាហារកែច្នៃ អាហារសម្រន់សម្បូរជាតិផ្អែមៗ កាបូអ៊ីដ្រាត និងការទទួលទានកាឡូរីខ្ពស់ វាធ្វើឱ្យប៉ះពាល់រាងកាយធាត់លើសដើម។ បើអ្នកសម្រកគីឡូនោះ អ្នកគួរតែតាមដានរបបអាហារជាប្រចាំថ្ងៃ និងកំណត់របបអាហារ ទើបអ្នកមានកម្លាំងហាត់ប្រាណកម្ចាត់ជាតិខ្លាញ់បានល្អ។

លោកស្រី Batra ប្រាប់ថា “ការសម្រកគីឡូបានផលលឿន មិនអាចខ្វះលំហាត់ប្រាណបានទេ។ អ្នកគួរតែហាត់ប្រាណទាំងពីរបៀបបញ្ចូលគ្នាទីមួយ ហាត់ប្រាណបែបស្រាលៗ ដើរ រត់ ជិះកង់ និងយូហ្គា និងទីពីរ ហាត់លើកទម្ងន់។ ការរួមបញ្ចូលគ្នានៃលំហាត់ប្រាណអាចបង្កើនការសម្រកជាតិខ្លាញ់ក្នុងរាងកាយបានលទ្ធផលល្អ”។ បន្ទាប់ពីអ្នកហាត់ប្រាណហើយ កុំព្យាយាមហូបអាហារណាមានជាតិខ្លាញ់ ស្រា និងផ្អែមៗ វាស្តាយកម្លាំងខំហាត់ណាស់ ហើយមកហូបអាហារបែបនេះ អ្នកគ្មានថ្ងៃសម្រកគីឡូតាមក្តីស្រមៃនោះទេ។

មានរឿងមួយទៀតដែលអ្នកសម្រកគីឡូចាំបាច់ត្រូវតែមាន ហើយការពារសុខភាព គឺជាតិទឹកនេះឯង។ តាមលោកស្រីវេជ្ជបណ្ឌិត Batra បាននិយាយថា “ជាតិទឹកមានសារៈសំខាន់សម្រាប់ប្រព័ន្ធរាងកាយតាមផ្នែកផ្សេងៗ វាជួយរំលាយអាហារ ដំណើរការតាមប្រព័ន្ធឈាម និងបេះដូងឬខួរក្បាលជាដើម។ អ្នកយ៉ាងហោចណាស់ គួរតែផឹកទឹក ៣ទៅ៥លីត្រ សម្រាប់អ្នកសម្រកគីឡូ។ ព្រោះរាងកាយយើងត្រូវការជាតិទឹក ៧០%ឯណោះ។ សូម្បីតែការគេងឱ្យបានស្កប់ស្កល់ជាវិធីដុតខ្លាញ់បានលឿន ព្រោះជាអំឡុងពេលរាងកាយសម្រាកត្រូវការជាតិខ្លាញ់ប្រើការដើម្បីផ្តល់ថាមពល និងបង្កើនសាច់ដុំ៕

អត្ថបទដោយ៖ ទ្រ សុភាព