បងប្អូនប្រាកដជាបានដឹងច្រើនរួចមកហើយទាក់ទិនទៅនឹងសារជាតិចិញ្ចឹម និងប្រូតេអ៊ីននៅក្នុងស៊ុត ដែលមានសារៈសំខាន់ សម្រាប់ការកសាងសាច់ដុំ ជួសជុលកោសិកា និងមុខងាររាងកាយទាំងមូល ជាពិសេសនោះបំប៉នទៅដល់សុខភាពបេះដូង និងជួយដល់ដំណើរការសម្រកទម្ងន់ថែរាង។ យ៉ាងណាមិញក្នុងប្រធានបទ១នេះ ចង់បង្ហាញនូវអត្ថប្រយោជន៍បន្ថែមដែលស៊ុតក៏មានសមត្ថភាពផ្សេងទៀតជំនួយដល់សុខភាពអ្នកទទួលទាន់ផងដែរ។
1. សុខភាពភ្នែក៖ សារធាតុប្រឆាំងអុកស៊ីតកម្ម lutein និង zeaxanthin ដែលមាននៅក្នុងស៊ុត ជួយការពារភ្នែកពីបញ្ហាធ្លាក់ខ្សោយមុខងារទៅតាមវ័យ និងជំងឺភ្នែកឡើងបាយ។
2. សុខភាពខួរក្បាល៖ សារធាតុ Choline គឺមានសារៈសំខាន់សម្រាប់ការអភិវឌ្ឍ និងបង្កើនមុខងារខួរក្បាល។ សារជាតិ១នេះ វាចាំបាច់សម្រាប់ ដំណើរការររវាងប្រព័ន្ធសរសៃប្រសាទនិងសាច់ដុំ និងធ្វើអោយប្រសើរឡើងនូវមុខងារ ខួរក្បាល និងការចងចាំ។
3. សុខភាពបេះដូង៖ ការទទួលទានស៊ុតក្នុងកម្រិតមធ្យម អាចទ្រទ្រង់សុខភាពបេះដូង។ នេះ ដោយសារតែអាស៊ីតខ្លាញ់អូមេហ្គា 3 នៅក្នុងស៊ុតអាចជួយកាត់បន្ថយការរលាក និងធ្វើឱ្យសុខភាពបេះដូងប្រសើរឡើង។
4. សុខភាពឆ្អឹង៖ ស៊ុត គឺជាប្រភពដ៏ល្អនៃវីតាមីន D ដែលមានសារៈសំខាន់សម្រាប់ការស្រូបយកជាតិកាល់ស្យូម និងជំរុញការពង្រឹងមុខងារឆ្អឹងឱ្យកាន់តែរឹងមាំ។ ទន្ទឺមនឹងនេះ វាក៏មានផ្ទុកនូវសារជាតិផូស្វ័រផងដែរ ដែលមានសារៈសំខាន់សម្រាប់ពង្រឹងកំហាប់ឆ្អឹង។
5. ជំនួយប្រព័ន្ធការពាររាងកាយ៖ វីតាមីន និងសារធាតុរ៉ែនៅក្នុងស៊ុត ដូចជា វីតាមីន A វីតាមីន D និងសេលេញ៉ូម ដើរតួក្នុងការរក្សាប្រព័ន្ធការពារដែលមានសុខភាពល្អ ការពារកោសិការាងកាយចេញពីបញ្ហារលាក។
ដោយឡែក បើទោះបីជាស៊ុត មានប្រយោជន៍ខ្លាំងជួយដល់រាងកាយក៏ដោយក្តី ប៉ុន្តែអ្នកជំនាញតែងណែនាំឱ្យទទួលទានស៊ុតក្នុងបរិមាណសមស្របមួយប៉ុណ្ណោះ។ ក្នុង១ថ្ងៃ ញុំាចន្លោះពី ១»២ គ្រាប់ គឺគ្រប់គ្រាន់ហើយ និងក្នុង១សប្តាហ៍ញុំាត្រឹមបរិមាណ ៤»៥ គ្រាប់ ល្អបំផុត៕
