ក្នុងលក្ខខណ្ឌបំប៉នមេជីវិតឈ្មោល របបអាហារ គឺជារឿងចាំបាច់មែនទែន ដែលបុរសគ្រប់រូបគួរតែយកចិត្តទុកដាក់ញុំាឱ្យបានគ្រប់គ្រាន់ ដើម្បីបង្កើនកំហាប់មេជីវិតឈ្មោលឱ្យកើនមានកម្រិតខ្ពស់ និងធ្វើឱ្យចលនាមេរជីវិតកាន់តែមានគុណភាពប្រសើរឡើង។

តួយ៉ាង​បើយើងផ្អែកទៅតាមការចុះផ្សាយរបស់គេហទំព័រ NOVA IVF បានលើកឡើងនូវរបបអាហារសំខាន់មួយចំនួនដែលល្អបំផុតសម្រាប់ជំរុញមុខងារមេជីវិតឈ្មោល៖

1. ស៊ុត៖ ស៊ុត គឺជារបបអាហារដែលគេទទួលស្គាល់ថា វាសម្បូរប្រូតេអ៊ីនខ្លាំង បូករួមជាមួយនឹងវីតាមីន E និងសារជាតិប្រឆាំងអុកស៊ីតកម្មបន្ថែម អាចការពារមេជីវិតឈ្មោលពីការបំផ្លាញរ៉ាឌីកាល់សេរី និងបង្កើនចលនា។ លើសពីនេះទៅទៀត សារជាតិ​ចិញ្ចឹម​ដែល​មាន​នៅ​ក្នុង​ស៊ុត ក៏អាចជួយ​ក្នុង​ការ​ផលិត​មេជីវិត​ឈ្មោល​ដែល​មាន​សុខភាព​ល្អ បង្កើនលទ្ធភាព​មាន​កូន។

2. ត្រីសម្បូរខ្លាញ់ល្អ និងគ្រឿងសមុទ្រ៖ ត្រីសម្បូរខ្លាញ់ដូចជា ត្រីសាម៉ុង ត្រីសាឌីន វាមានផ្ទុកនូវអាស៊ីតខ្លាញ់អូមេហ្គា 3 ខ្ពស់ ដែលមានសារៈសំខាន់សម្រាប់ពង្រឹងគុណភាពមេជីវិតឈ្មោល។ ចំណែកក្រុមគ្រឿងសមុទ្រ ពិសេសអយស្ទ័រ សម្បូរទៅជាតិស័ង្កសី មានមុខងារជួយបង្កើនការផលិតមេជីវិតឈ្មោល និងកាត់បន្ថយភាគរយមេជីវិតឈ្មោលខ្សោយៗ។

3. ខ្ទឹមស៖ ខ្ទឹមស ក៏សម្បូរទៅដោយសារជាតិ allicin selenium និងវីតាមីន B6 អាចជួយបង្កើនលំហូរចរន្តឈាមរត់ក្នុងសរីរាង្គផ្លូវភេទឱ្យដំណើរបានប្រសើរឡើង និងការពារមេជីវិតឈ្មោលពីការបំផ្លាញ។ ចំណែកឯសារថាតុប្រឆាំងអុកស៊ីតកម្មដែលមាននៅក្នុងខ្ទឹមស ក៏ជាផ្នែកមួយជួយទប់ស្កាត់ពីការធ្លាក់ខ្សោយមុខងារនៃមេជីវិតឈ្មោលផងដែរ។

4. គ្រាប់ធញ្ញជាតិ៖ គ្រាប់អាល់ម៉ុន វ៉ាល់ណាត់ និងគ្រាប់ផ្កាឈូករ័ត្ន សម្បូរទៅដោយវីតាមីន E និងស័ង្កសី ដែលមានសារៈប្រយោជន៍ល្អសម្រាប់សុខភាពមេជីវិតឈ្មោល។

5. បន្លែ និងផ្លែឈើ៖ ផ្លែឈើ និងបន្លែស្លឹកបៃតង មានសារធាតុប្រឆាំងអុកស៊ីតកម្មខ្ពស់ ដែលជួយការពារមេជីវិតឈ្មោលពីការខូចខាត​ ជួយបង្កើនកំហាប់មេជីវិតឈ្មោល និងពង្រឹងគុណភាពមេជីវិតឈ្មោលជាប្រចាំ។

បន្ថែមជាមួយគ្នានេះផងដែរ មានរបបអាហារល្អៗមួយចំនួនទៀត ដែលក្រុមវេជ្ជបណ្ឌិតជំនាញក្នុងប្រទេសយើងធ្លាប់បានចែករំលែកឱ្យដឹងពីប្រសិទ្ធិភាពវា មិនចាញ់ទៅនឹងរបបអាហារខាងលើប៉ុន្មាននោះដែរដូចជា សូកូឡាខ្មៅ ទឹកដោះគោមានជាតិខ្លាញ់ទាប និងសូម្បីតែពងទាកូន ក៏មានផ្ទុកនូវសារជាតិចិញ្ចឹមល្អៗ ដើម្បីជួយជំរុញមេជីវិតឈ្មោល និងបង្កើនលទ្ធភាពក្នុងការមានកូន។

បន្ថែមពីលើការទទួលទានអាហារទាំងនេះ ការរក្សារបៀបរស់នៅដែលមានសុខភាពល្អ ដោយការធ្វើលំហាត់ប្រាណឱ្យបានទៀងទាត់ កាត់បន្ថយភាពតានតឹង ជៀសវាងការជក់បារី រក្សាទម្ងន់ និងកាត់បន្ថយការប្រើប្រាស់គ្រឿងស្រវឹង ក៏ជាផ្នែកសំខាន់ជួយធ្វើឱ្យមេជីវិតឈ្មោលមានសុខភាពប្រសើរឡើងផងដែរ៕

អត្ថបទដោយ៖ ប៉ាវ ភក្តី (Nuk)