មានមនុស្សជាច្រើនរអ៊ូថា លាបក្រែមផ្ដល់សំណើមរាល់ថ្ងៃ ប៉ុន្តែស្បែកមុខនៅតែខ្សោះជាតិទឹក ខ្មៅស្រអាប់ លាបម្សៅមិនចូល ពេលផាត់មុខក៏មិនស្អាតដែរ ស្បែកមុខខ្ជាក់ម្សៅមកវិញឬក៏ឡើងប្រផេះតែម្ដងក៏មានដែរ។

ប្រសិនបើ អ្នកទាំងអស់គ្នាប្រាកដថាបានប្រើគ្រីមផ្ដល់សំណើមហើយ ប៉ុន្តែស្បែកមុខនៅតែមិនភ្លឺស្អាត អ្នកទាំងអស់គ្នាគួរតែធ្វើរឿង២នេះ៖

១ អ្នកទាំងអស់គ្នា គួរតែជម្រុះកោសិកាចាស់។ ជាធម្មតាស្បែកនឹងធ្វើការជម្រុះកោសិកាចាស់ខ្លួនឯងរាល់ថ្ងៃ២៨ថ្ងៃម្ដង ប៉ុន្តែពេលអាយុកាន់តែច្រើន បូករួមផ្សំជាមួយកាកសំណល់គ្រឿងសម្អាង Skincare ធូលីដី កកស្ទះបន្ថែមទៀតនោះ ធ្វើឱ្យការជម្រុះកោសិកាចាស់តាមធម្មជាតិមិនបានល្អ និងបង្កជាការស្ទះរន្ធរោម។  បើយើងមិនជួយជម្រុះកោសិកាចាស់ពីក្រៅបន្ថែមទេ អ្នកទាំងអស់គ្នាអាចសង្កេតមើលបានពីមុនស្បែកបាក នឹងចាប់ផ្ដើមលាបអ្វីក៏ចូលដែរ ស្បែកស្រអាប់ ឡើងក្រាស់រឹង ស្ងួតៗ ចាស់លឿន ពិសេសកើនភ្លីជ្រួញ លាបផលិតផលអីក៏មិនងាយបានផលដែរ ដោយសារតែកោសិកាដែលខូចខាតមិនបានជម្រុះចេញ។

ហេតុផលនេះ អាចជាមូលហេតុមួយដែលធ្វើឱ្យលាបក្រែមផ្ដល់សំណើមមិនបានផលនេះឯង។ ការជម្រុះកោសិកាជាទូទៅមាន២ គេហៅថា Physical exfoliate ជម្រុះតាមបែបធម្មជាតិ ភាគច្រើនអ្នកទាំងអស់គ្នាច្រើនតែស្គាល់ជាប្រភេទស្រ្កាប់ និង Chemical exfoliate ជាលក្ខណៈគីមី ដែលមាន Salicylic Acid, BHA ,AHA ,PHA ,Retinol អាចមានក្នុងទម្រងជាម៉ាសភក់(Clay mask) Toner សំឡីជូតមុខ ស្ក្រាប់...។ បញ្ជាក់ត្រូវចាំមិនមែនជម្រុះច្រើនពេកទេ ព្រោះអាចប៉ះពាល់សរសៃអេឡាស់ស្ទីន នៃស្បែកមុខ គួរតែធ្វើ១ឬ២ដងបាន ហើយ ហើយត្រូវចាំទៀតថាបើជម្រុះកោសិកាចាស់ពេលព្រឹកមុនចេញក្រៅត្រូវតែលាបក្រែមផ្ដល់សំណើមឱ្យស្បែក និងប្រើឡេការពារកម្ដៅថ្ងៃឱ្យបានក្រាស់ ឬRe apply ឱ្យញឹកញាប់បន្តិច ដោយសារដែលពេលយើងជម្រុះកោសិកាចាស់ UV ពីព្រះអាទិត្យអាចបំផ្លាញស្បែករបស់យើងបានងាយ។ បើជម្រុះទៅពេលយប់ ពេលជម្រុះរួចភ្លាមៗត្រូវតែលាបក្រែមផ្ដល់សំណើមឱ្យស្បែកវិញកុំឱ្យច្រើនយើងស្ងួត ហើយចូលគេងតែម្ដងទៅ។

២ គួរតែបិទម៉ាសសន្លឹក ឬហៅSheet mask ។ មូលហេតុដោយសារក្នុងម៉ាសសន្លឹកភាគច្រើនវាមានសារធាតុជួយបើរន្ធរោមដែលស្ទះបាន ប៉ះសន្លឹកមួយចំនួនអាចក៏ជួយDetox បន្សាបជាតិពុលមួយចំនួនដែលសល់ជាជាតិកខ្វក់ ខ្លាញ់ ញើស និងគ្រឿងសំអាង ដែលវាប្រមូលផ្ដុំគ្នាធ្វើឱ្យស្ទះរន្ធរោមរបស់យើងបាន។ បើអ្នកទាំងអស់គ្នា កំពុងតែចង់ផ្ដល់ជាតិសំណើមបន្ថែមឱ្យស្បែកមុខ អ្នកទាំងអស់គ្នាគួរតែរើសយកម៉ាសសន្លឹក ដែលមានសារធាតុផ្សំពី Hyaluronic Acid ព្រោះសារធាតុនេះគឺផ្ដល់សំណើមឱ្យស្បែកយើងបានល្អ។  ភាគច្រើន យើងតែងសង្កេតឃើញថា មុនពេលផាត់មុខ គេតែងតែបិទម៉ាសសន្លឹក១៥នាទីមុនសិន ដើម្បីឱ្យផាត់ចូលមុខល្អនិងជាប់បានយូរ។ សូមបញ្ជាក់ផងដែរ គួររើសមើលម៉ាសណាឱ្យត្រូវជាមួយនឹងស្បែកផងដែរ។

បន្ថែមពីលើនោះ គួរតែមើលឡើងវិញផងដែរ ថាគ្រីមផ្ដល់សំណើម ឬសេរ៉ូមផ្ដល់សំណើម ដែលអ្នកកំពុងប្រើនោះ ត្រូវនឹងប្រភេទស្បែកហើយឬនៅ(ចុចអត្ថបទរបៀបរើសគ្រីមផ្ដល់សំណើមតាមប្រភេទស្បែក)។ ប្រសិនបើចង់ឱ្យស្បែកភ្លឺថ្លា ក៏ត្រូវមើលដែលថាផលិតផលដែលអ្នកកំពុងប្រើមានសារធាតុណាមួយជំនួយឱ្យស្បែកភ្លឺថ្លាហើយឬនៅ(ចុចដើម្បីមើលពីសារធាតុផ្សំដែលជួយឱ្យស្បែកភ្លឺថ្លា)។

អត្ថបទដោយ៖ សេងហុង-Senghong

#សៀវភៅសម្រស់ភាគ៦