ជំងឺលើសឈាមជាកត្តាហានិភ័យចម្បងមួយ ងាយវិវត្តទៅជាជំងឺដាច់សរសៃឈាមខួរក្បាល ជំងឺដាច់សរសៃឈាមបេះដូង ជំងឺខ្សោយបេះដូង ខូចតម្រងនោម សុទ្ធតែជាជំងឺគ្រោះថ្នាក់ខ្លាំងដល់សុខភាពនិងអាយុជីវិត។ ជំងឺនេះវាកើតឡើងយ៉ាងស្ងៀមស្ងាត់ មានប្រជាជនលើពិភពលោក ក៏ដូចជាប្រជាជនកម្ពុជាមិនតិចទេដែលត្រូវរងគ្រោះសុខភាពដោយសារជំងឺនេះ។ មិនមែនតែមនុស្សចាស់ប៉ុណ្ណោះទេ តែប្រឈមនឹងជំងឺលើសសម្ពាធឈាម សូម្បីតែមនុស្សវ័យក្មេងមួយចំនួនក៏អាចកើតជំងឺនេះបានផងដែរ ដោយសារកត្តារបបអាហារ កត្តារស់នៅផ្សេងៗ។

ដើម្បីការពារខ្លួនពីជំងឺលើសសម្ពាធឈាមនេះ ជារឿងចាំបាច់បំផុតដែលបងប្អូនត្រូវប្រុងប្រយ័ត្នលើរបបអាហារ។ មានភេសជ្ជៈមួយចំនួន អាចជួយកាត់បន្ថយហានិភ័យនៃជំងឺនេះ បានដោយគ្រាន់តែទទួលទានវារាល់ថ្ងៃ។ ផ្អែកតាមប្រភព Healthline បានណែនាំពីទឹកដោះគោប្រភេទSkim milk ជាទឹកដោះគោដែលមានជាតិខ្លាញ់ទាប អាចជួយទប់ស្កាត់និងការពារកុំឱ្យលើសសម្ពាធឈាមបាន។ តាមការសិក្សាក្នុងឆ្នាំ២០១៨ របស់បណ្ណាល័យឱសថជាតិអាមេរិក បានរកឃើញថាមនុស្សពេញវ័យ ២៦៩៤នាក់ដែលបានផឹកទឹកដោះគោមានជាតិខ្លាញ់ទាប មានកម្រិតថយចុះទាបនៃសម្ពាធឈាមស៊ីស្តូលីកនិងdiastolic ផងដែរ។ ដោយក្រុមអ្នកស្រាវជ្រាវបានសន្មត់ថាដោយសារតែទឹកដោះគោ មានផូស្វ័រ និងកាល់ស្យូម ដែលជួយការពារការលើសសម្ពាធឈាមបាន។

ចំពោះបរិមាណដែលត្រូវទទួលទាន គេណែនាំឱ្យក្នុង១ថ្ងៃ ផឹក២៥០មីលីលីត្រ និងកុំឱ្យលើសពី៥០០មីលីលីត្រក្នុង១ថ្ងៃ។ របៀបទទួលទាន អ្នកអាចទទួលទានទឹកដោះគោសុទ្ធ ឬលាយវាជាមួយគ្រាប់ធញ្ញជាតិ ផ្លែឈើ ឬកាហ្វេខ្មៅបាន។ ក្នុងករណីមានជំងឺលើសសម្ពាធឈាមស្រាប់គួរប្រុងប្រយ័ត្នចំពោះការទទួលទានកាហ្វេ គួរប្រឹក្សាជាមួយគ្រូពេទ្យរបស់អ្នកជាមុន។

គួរបញ្ជាក់ផងដែរ Skim milk សំដៅលើប្រភេទនៃទឹកដោះគោ មិនមែនជាឈ្មោះម៉ាកយីហោនោះទេ។ អ្នកអាចជ្រើសយកយីហោទឹកដោះគោណាក៏បាន ដែលមានដាក់ពាក្យថាប្រភេទ (Skim milk) ដែលមានលក់នៅតាមទីផ្សារនានា។ ម្យ៉ាងវិញទៀត អ្នកគួរព្យាយាមកាត់បន្ថយអាហារដែលមានជាតិប្រៃខ្ពស់ ព្រោះជាតិអំបិលជាកត្តាហានិភ័យធំដែលធ្វើឱ្យអ្នកមានជំងឺលើសសម្ពាធឈាម៕

អត្ថបទដោយ៖ Senghong