ទឹកដោះគោជាប្រភេទភេសជ្ជៈអាហារបំប៉នដែលផ្ទុកប្រូតេអ៊ីនច្រើន និងមានសារប្រយោជន៍ខ្លាំងចំពោះរាងកាយរបស់មនុស្សមិនថា ក្មេង ពេញវ័យ ឬមនុស្សចាស់នោះទេ។ ត្បិតថាទឹកដោះគោល្អសម្រាប់សុខភាពពិតមែន ប៉ុន្តែកន្លងមកមានមតិលើកឡើងជាច្រើនថា ការផឹកទឹកគោរាល់ថ្ងៃនាំឱ្យកើតមុនពេញមុខ។ តើទឹកដោះគោប្រភេទណាខ្លះដែលនាំឱ្យកើតមុន?

ជាការពិតណាស់ យោងតតាមការណែនាំពីគេហទំព័រ healthshots បានឱ្យដឹងថា ផលិតផលទឹកដោះគោគឺមានរាប់រយប្រភេទខុសៗគ្នា មានទឹកដោះគោខ្លះសម្រាញ់មកពីទឹកដោះរបស់សត្វគោពិតៗ ហើយទឹកដោះគោខ្លះទៀតគឺគេចម្រាញ់មកពីរុក្ខជាតិដូចជា សណ្តែក ជាដើម។ ទឹកដោះគោទាំងអស់មិនមែនសុទ្ធតែផឹកហើយបណ្តាលឱ្យកើតមុខនោះទេ។ ទឹកដោះគោបណ្តាលឱ្យកើតមុនបានលុះត្រាតែផឹកខុសប្រភេទ និងខុសពេលសមស្រប។

តាមរយៈការសិក្សាជាច្រើនបានរកឃើញថា ផលិតផលទឹកដោះគោប្រភេទ Skim milk ជាទឹកដោះគោដែលមានកម្រិត IGF1 (Insulin-like Growth Factor)ខ្ពស់។ មូលហេតុដែលនាំឱ្យទឹកដោះគោ Skim milk អាចធ្វើឱ្យកើតមុនបានគឺមកពី Skim milk ជាប្រភេទទឹកដោះគោដែលសម្រាញ់ចេញមកពីសត្វគោដែលមានផ្ទុកអរម៉ូនខ្ពស់ មានន័យនៅតាមកសិដ្ឋានចិញ្ចឹមគោខ្លះគឺគេត្រូវការចាក់បញ្ចូលអរម៉ូនទៅក្នុងខ្លួនសត្វគោដើម្បីឱ្យវាចេញទឹកដោះច្រើន។

បន្ថែមពីលើនេះទៀត តាមការពិសោធន៍ជាក់ស្តែង ក្នុងចំណោមស្ត្រីជាង ៤៧០០០ នាក់នៅសហរដ្ឋអាមេរិក ដែលផឹកទឹកដោះគោប្រភេទ skim ២កែវក្នុងមួយថ្ងៃ ៤៤% នៃស្រ្តីទាំងនោះគឺជួបបញ្ហាកើតមុននៅលើមុខច្រើន។

ម្យ៉ាងវិញទៀត ក្រៅពីទឹកដោះ Skim milk ក៏មានទឹកដោះគោផ្សេងៗមួយចំនួនទៀតដែរដែលមានលទ្ធភាពបង្កទៅជាមុន នៅពេលដែលអ្នកផឹកវាខុសពេល។ ជាធម្មតាទឹកដោះគោ វាមិនដូចជាទឹកសុទ្ធឬទឹកធម្មតាដែលអាចផឹកពេលណាក៏បានទៅតាមចិត្តចង់នោះទេ។ ជាទូទៅ ទឹកដោះគោត្រូវបានគេហាមប្រាមមិនឱ្យផឹកដាច់ខាតនៅអំឡុងពេលដែលយើងកំពុងបែកញើស។ មានន័យថា ក្រោយហាត់ប្រាណ ឬបន្ទាប់ពីមកពីបំពេញការងារ រាងកាយកំពុងបែកញើស ក្តៅខាងក្នុង ប្រសិនជាអ្នកផឹកទឹកដោះគោ គឺវានិងប្រតិកម្មជាមួយញើសនោះបង្កទៅជាមុននៅលើ ជាពិសេសគឺមុនខ្នង។

គូសបញ្ជាក់ផងដែរថា ចំណុចសំខាន់មួយទៀតដែលអ្នកត្រូវគិត គឺមរិមាណ។ ត្បិតថាទឹកដោះគោល្អចំពោះសុខភាពក៏ពិតមែន ប៉ុន្តែអ្នកមិនត្រូវផឹកវាទៅតាមចិត្តចង់ដូចទឹកធម្មតានោះទេ។ ជាទូទៅគឺគេណែនាំឱ្យផឹកទឹកដោះគោ ២កែវក្នុង១ថ្ងៃ គឺពេលព្រឹក១កែវ ពេលល្ងាច១កែវ។ ចំណែកពេលថ្ងៃអ្នកគួរចៀសកុំផឹក ពីព្រោះពេលថ្ងៃជាពេលក្តៅ បើផឹកទឹកដោះគោគឺមិនសូវល្អទេ៕

អត្ថបទដោយ៖ មឿន គន្ធា