លោកអ្នកប្រហែលជាធ្លាប់បានដឹងខ្លះៗ ពីការថែរក្សាសម្រស់របស់នារីកូរ៉េ ថៃ និងប្រទេសមួយចំនួនទៀត។ ថ្ងៃនេះ ពួកយើងនឹងនាំលោកអ្នកមកដឹងពីក្បួនក្នុងការថែរក្សាសម្រស់ឱ្យនៅក្មេងវ័យតាមបែបស្ត្រីជនជាតិជប៉ុនវិញម្ដង។ នៅប្រទេសជប៉ុនស្រ្តីពូកែថែសម្រស់ ពួកគេប្រើគ្រឿងសម្អាង និងគ្រឿងក្រអូប ដែលមានគុណភាពតាមសុខាភិបាលជប៉ុនច្បាស់ឡាស់បានគេហ៊ាន ដើម្បីការពារស្បែកពួកគេបានល្អ។ នៅពេលថ្មីៗ នេះ ប្រទេសយើង មានអ្នកទិញឡេលាបស្បែកគ្មានគុណភាព ធ្វើឱ្យស្បែកឡើងសរសៃរក្រហម(ស្បែកស្តើង) និងខូចកោសិកាស្បែក។
យោងតាមគេហៈទំព័រមួយដែលមានឈ្មោះថា WAWAZA បានប្រាប់់ពីក្បួនថែរក្សាសម្រស់របស់នារីជប៉ុនថា ការលាងសម្អាតជាមួយទឹកក្ដៅឧណ្ឌៗវាជួយឱ្យរន្ធញើសមុខរបស់ពួកគេបើកបានល្អបញ្ចេញជាតិខ្លាញ់អាក្រក់។ ពួកគេតែងតែមានទម្លាប់លាងសម្អាតដៃជាមុនជៀសវាងការឆ្លងមេរោគចូលទៅក្នុងសាច់មុខ នឹងប្រើម្រាមដៃក្នុងការម៉ាស្សាស្បែកមុខថ្នមៗ ដោយចលនាទន់ៗជារង្វង់ ដោយមិនមែនដុសខាត់ស្បែកមុខឡើយ។ ក្នុងនោះដែរ ការលាងសម្អាតមុខ២ដងក្នុងមួយថ្ងៃជាមួយទឹកក្ដៅឧណ្ឌៗ គឺគ្រប់គ្រាន់ហើយសម្រាប់ស្បែកមុខដែលមានខ្លាញ់ច្រើន ប៉ុន្តែប្រសិនបើមុខឆាប់ស្ងួតលាងតែម្ដងប៉ុណ្ណោះ។
ដូចជាលោកស្រី Yamada Yoshiko ដែលមានអាយុ ៥០ឆ្នាំបានប្រាប់អាថ៌កំបាំងថា ក្រៅពីប្រើប្រាស់គ្រឿងសម្អាងតែមួយមុខមិនទាន់គ្រប់គ្រាន់នៅឡើយទេ គាត់មានទម្លាប់ការពារភាពចាស់ដោយត្រូវការរបបអាហារមានជាតិប្រូតេអ៊ីន និងវីតាមីន មានទម្លាប់ហាត់ប្រាណ ឬដើរយ៉ាងតិច ២០ នាទីក្នុងមួយថ្ងៃ។ ហើយយើងត្រូវគេងឱ្យលក់បានស្កប់ស្កល់ ដើម្បីការពារសម្រស់ និងចិញ្ចឹមកោសិកាស្បែកបានល្អផងដែរ។ មួយថ្ងៃគាត់តែងតែផឹកតែបៃតងជាប្រចាំថ្ងៃ ជួយលុបបំបាត់ស្នាមជ្រួញតូចៗ រឹតបន្តឹងរន្ធញើស និងជួយព្យាបាលស្បែកខូច។
នៅជប៉ុនដែលត្រូវបានគេស្គាល់ថា komenuka ត្រូវបានប្រើប្រាស់ដោយស្ត្រីជនជាតិជប៉ុនអស់ជាច្រើនសតវត្សមកហើយតាមបែបធម្មជាតិ ដើម្បីថែសម្រស់ឱ្យមានសំណើម។ ពេលអ្នកលាងទឹកអង្កររួច មកលុបមុខធ្វើឱ្យអ្នកស្បែកទន់រលោង និងភ្លឺថ្លា។ ហើយកន្ទក់ស្រូវនេះ មានប្រសិទ្ធភាពខ្ពស់លើស្បែកស្ងួត ស្បែកចាស់ វាអាចព្យាបាលស្បែកបានល្អ មកពីវាវីតាមីន B និង E ហើយជួយជម្រុះកោសិកាចាស់ៗ និងផ្តល់សំណើមដល់កោសិកាស្បែក៕
អត្ថបទដោយ៖ ទ្រ សុភាព