គ្មាននរណាម្នាក់ចង់កើតមកទាបនោះទេដែលកម្ពស់របស់មនុស្សត្រូវបានកំណត់ដោយហ្សែន ទម្លាប់មួយចំនួន ឬការទទួលទានរបរអាហារប្រចាំថ្ងៃដែលសុទ្ធសឹងតែមានឥទ្ធិពលក្នុងការលូតលាស់របស់យើង។ មុននឹងចូលដល់វ័យ២០ឆ្នាំ ប្រសិនបើយើងចង់មានកម្ពស់ខ្ពស់ទៅតាមអ្វីដែលយើងប៉ងប្រាថ្នាដាច់ខាតត្រូវតែអនុវត្តនូវវិធីសាស្រ្ដទាំងនេះដែលចាបបៃតងបានដកស្រង់ចេញមកពីប្រភពវែបសាយ 1mg ដូចខាងក្រោម៖

១. ញ៉ាំអាហារដែលមានសុខភាពល្អ៖ ការ​ញ៉ាំ​អាហារ​ឲ្យ​បាន​ត្រឹម​ត្រូវ​គឺ​សំខាន់​ណាស់​ដើម្បី​សម្រេច​បាន​កម្ពស់​ត្រឹមត្រូវ និង​មាន​រាង​កាយ​ដែល​មាន​សុខភាព​ល្អ​។ យើងត្រូវតែបរិភោគអាហារណាដែលសម្បូរទៅដោយវីតាមីនD រួមមាន ស៊ុតលឿង ថ្លើមគោ ផ្លែក្រូច គ្រាប់ធញ្ញជាតិ ហ្វ្រូម៉ា ខ្លាញ់ត្រី។ វាមានសារធាតុរ៉ែសំខាន់២ ដែលជួយឱ្យឆ្អឹងរបស់យើងលូតលាស់។ អ្វីដែលសំខាន់នោះប្រសិនបើអ្នកព្យាយាមបង្កើនកម្ពស់តាមធម្មជាតិ អ្នកត្រូវទទួលទានសាច់មាន់យ៉ាងតិច ៥០ក្រាម ស៊ុតស៥-៦គ្រាប់ និងសណ្តែកសៀង ៥០ក្រាមជារៀងរាល់ថ្ងៃ ដើម្បីទទួលបានប្រូតេអ៊ីនគ្រប់គ្រាន់។

២. លេងកីឡា និងធ្វើលំហាត់ប្រាណ៖ មានលំហាត់ប្រាណ និងកីឡាមួយចំនួនដែលត្រូវបានគេស្គាល់ថាអាចជួយបង្កើនកម្ពស់បានយ៉ាងមានប្រសិទ្ធភាព។ ខណៈកីឡាទាំងនោះរួមមាន ហែលទឹក និងបាល់បោះ ដែលវាគឺជាកីឡាទូទៅធ្វើឱ្យយើងខ្ពស់ជាងមុនបាន១០០%។ ចំណែកលំហាត់ប្រាណរួមមានដូចជា ការលោត ព្យូរខ្លួនឬលើកខ្លួន ការហាត់ប្រាណប្រភេទនេះ វាតម្រូវឲ្យអ្នកប្រើកម្លាំងដៃទាញ ដើម្បីលើកដងខ្លួនទាំងអស់ឡើង ហើយជើងរបស់អ្នកសំយុងចុះក្រោម ឬចេញកាយវិការផ្សេងៗ វាមានប្រយោជន៍ខ្លាំង ដែលអាចជួយពន្លូតកម្ពស់របស់អ្នកបាន។

៣. រក្សាសំណើម៖ ការរក្សាជាតិទឹកឱ្យបានល្អគឺចាំបាច់សម្រាប់រាងកាយដ៏ល្អ។ ការផឹកទឹកឱ្យបានច្រើនវានឹងជួយសម្អាតប្រព័ន្ធខាងក្នុងនៃរាងកាយ និងជំរុញការរំលាយអាហារ ដែលមានឥទ្ធិពលលើកម្ពស់ យើងត្រូវផឹកទឹកយ៉ាងតិច ៧-៨កែវក្នុងមួយថ្ងៃ។

៤. ចៀសវាងទម្លាប់មិនល្អ៖ ទម្លាប់មួយចំនួនពិតជាអាចបន្ថយល្បឿន ឬរារាំងដំណើរការនៃការលូតលាស់តាមធម្មជាតិរបស់រាងកាយយើងបាន។ ដូច្នេះហើយយើងមិនគួរទទួលទានគ្រឿង​ស្រវឹងច្រើន មិនគួរលេបថ្នាំស្តេរ៉ូអ៊ីតក្នុងកំឡុងឆ្នាំលូតលាស់ទេ ព្រោះវាអាចរារាំងការលូតលាស់ឆ្អឹង ជាតិកាហ្វេអ៊ីនដែលមាននៅក្នុងកាហ្វេគឺជាសារធាតុមួយទៀតដែលគួរចៀសវាង ការជក់បារីក៏អាចធ្វើឲ្យយើងក្រិនផងដែរ។

៥. គេងឲ្យបានគ្រប់គ្រាន់៖ អ័រម៉ូនលូតលាស់ និងជាលិកា​ក្នុង​ខ្លួន​យើង​រីក​ធំ​នៅ​ពេល​យើង​គេង ឬខួរក្បាលយើងបានសម្រាក។ ការគេងឲ្យបានគ្រប់គ្រាន់គឺជាកត្តាសំខាន់បំផុតមួយសម្រាប់ការឡើងកម្ពស់ ក្មេងជំទង់ និងមនុស្សវ័យជំទង់ត្រូវការការគេងយ៉ាងតិចឲ្យបាន ៨ ម៉ោងក្នុង១ថ្ងៃ ដូច្នេះហើយដើម្បីគេងឲ្យបានគ្រប់គ្រាន់ពេលដែលយើងចូលដល់វ័យជំទង់យើងគួរតែ​កាត់បន្ថយ​ការ​ជប់លៀង​ពេល​យប់ ហើយ​ទុកឲ្យរាងកាយសម្រាក​ឲ្យបានសុខស្រួល។

ជារួមមកវិញទម្លាប់ខាងលើនេះមិនត្រឹមជួយឲ្យមានការលូតលាស់កម្ពស់កាន់តែល្អប្រសើរនោះទេ វាថែមទាំងជួយឲ្យយើងទទួលបានសុខភាពល្អ រាងកាយរឹងមាំល្អទៀតផងដែរ។ ម្យ៉ាងវិញទៀត វិធីសាស្រ្ដខាងលើយើងត្រូវតែអនុវត្តប្រសិនបើអាយុយើងនៅក្រោយ២០ឆ្នាំ៕

អត្ថបទដោយ៖ ស្រីណុច