មុនសាច់ មុនក្បាលខ្មៅ មុនកប់ក្រោមស្បែក គឺសុទ្ធតែកើតឡើងមកពីកត្តាអរម៉ូនរបស់មនុស្ស ហើយប្រសិនណាមិនព្យាបាលឱ្យបានត្រឹមត្រូវទេស្បែកអាចនឹងរងការកើនឡើងមុនលើសដើម ស្រទាប់ត្រូវបំផ្លាញតាំងពីខាងក្នុងរហូតមកដល់ផ្នែកខាងក្រៅ។

ផ្អែកទៅតាមប្រភព Healthline បានពន្យល់ថា បញ្ហាស្បែកឡើងមុន គឺងាយកើតឡើងខ្លាំងចំពោះអ្នកមានបញ្ហាស្បែកខ្លាញ់ និងស្ងួតខុសប្រក្រតី។ បញ្ហាទាំងនេះ ក៏ត្រូវបានគេជឿថា វាកកើតចេញពីកត្តាស្ត្រេសផងដែរ​ ដោយអាចនឹងបង្កើនការរលាកលើស្បែក និងការផលិតបាក់តេរី ដែលបណ្ដាលឱ្យកើតមុនមិនថា នៅលើផ្ទៃមុខ ខ្នង ឬនៅតំបន់ផ្នែកខាងលើប្រដាប់បន្តពូជ ដែលជាទូទៅចំពោះបញ្ហាទាំងអស់នេះគេច្រើនហៅថា មុនអរម៉ូន។

ជាដំណោះស្រាយនៃការនៅក្នុងការទប់ស្កាត់ ក៏ដូចជាបន្ធូរបន្ថយនូវអាការឡើងមុនលើផ្ទៃមុននេះ ប្រភពដដែលបានបង្ហាញនូវគន្លឹះខ្លះៗ ដែលអ្នកមានបញ្ហាស្បែកគ្រប់រូបគួរព្យាយាមអនុវត្តន៍ឱ្យបានល្អ៖

-លាងសម្អាតមុខ ២ដងក្នុង១ថ្ងៃ ដោយប្រើហ្វូម ឬសាប៊ូលាងសម្អាតស្បែកមុខដែលមិនមានជាតិកាត់ធ្វើឱ្យស ឬជាប្រភេទសាប៊ូលាយផ្សំសារធាតុកាត់ខ្លាំងបង្កឱ្យស្បែកមុខស្ងួត

-ប្រើកូនកន្សែងទន់ ផ្តិតជូតលើផ្ទៃមុនថ្នមៗ

-ប្រើបន្ទះសំឡីអាស៊ីត glycolic ដើម្បីជម្រុះកោសិកាស្បែកដែលងាប់ កាត់បន្ថយការរលាក និងជំរុញការលូតលាស់នៃស្បែកថ្មី

-ប្រើជាប្រភេទឡេលាបមុខផ្តល់សំណើមស្បែក ឬជាប្រភេទផលិតផលសុទ្ធ និងមានគុណភាពដែលត្រូវនឹងប្រភេទស្បែកមុខ

-ប្រើនូវផលិតផលដែលមានវេជ្ជបញ្ជាច្បាស់លាស់ពីក្រុមគ្រូពេទ្យជំនាញឯកទេសសើរស្បែក ដើម្បីព្យាបាលនូវបញ្ហាមុន

-បិទម៉ាស ឬលាបក្រែមជំនួយស្បែកមុខ ដើម្បីរក្សារន្ធញើសឱ្យរួមតូចល្អ មិនបណ្ដាលឱ្យរីកធំ

-ប្រើឡេលាប​ការពារ​កម្តៅថ្ងៃ​ដែលត្រូវនឹងប្រភេទស្បែកមុខ និងព្យាយាមកុំនៅក្រោមកម្តៅថ្ងៃខ្លាំងពេក

-មកពីក្រៅគួរតែរងចាំរយៈពេល១០ទៅ១៥នាទីសិន សឹមលាងមុខ

-ញុំារបបអាហារដែលសម្បូរទៅដោយ ជីវជាតិ រួមមានបន្លែផ្លែឈើ ផឹកទឹកឱ្យបានគ្រប់គ្រាន់ និងកាត់បន្ថយការញុំាអាហារផ្អាប់ ផ្អែម ប្រៃ

-ក្នុងករណីមានបញ្ហាស្បែកឡើងមុនខ្លាំង គួរតែទៅពិនិត្យសុខភាពស្បែក ដើម្បីដឹងពីបញ្ហាច្បាស់ណាមួយងាយស្រួលក្នុងការព្យាបាលឱ្យត្រូវ ធ្វើឱ្យឆាប់ជាសះស្បើយ និងមិនបង្កឱ្យកើតមុនរុំារ៉ៃនាំឱ្យខូចផ្ទៃមុខ

-កាត់បន្ថយស្ត្រេស បន្ធូរអារម្មណ៍ទៅតាមវិធីសាស្ត្រផ្សេងៗដូចជា ការអានសៀវភៅ សម្រាកលំហែ ដំណើរកំសាន្ត ឬធ្វើលំហាត់ប្រាណបែបស្រាល...៕

អត្ថបទដោយ៖ ប៉ាវ ភក្តី