ឱ្យតែចូលដល់ខែធ្លាក់ខ្យល់ អាកាសធាតុត្រជាក់ កម្តៅក្នុងខ្លួនយើងក៏ផ្លាស់ប្តូរ អ្វីដែលសំខាន់នោះសុខភាពនិងសម្រស់ក៏មានការផ្លាស់ប្តូរដូចគ្នា។ ស្បែកមុខឬស្បែកខ្លួនក៏ប្រែស្ងួត រឺឯបបូរបាត់វិញទាំងបុរសនិងនារីគឺ ប្រេះ ស្ងួត រហូតអ្នកខ្លះស្ងួតដល់ថ្នាក់ចេញឈាមទៀតផង។ ថ្ងៃនេះផងដែរ​ក្រុមការងារ Healthy Cambodia យើងក៏បាននាំយកនូវតិចនិចថែរក្សាបបូរមាត់ដើម្បីឱ្យមានភាពស្រស់ស្អាត មិនស្ងួតនៅរដូវធ្លាក់ខ្យល់នេះ។

កញ្ញា Khan Helen ដែលជាស្ថាបនិកក្រុមហ៊ុនទឹករុក្ខជាតិ បានផ្តល់បទសម្ភាសជាមួយហាងឆេង២៤ថា ឱ្យតែដល់រដូវធ្លាក់ខ្យល់នេះ ប្រជាជនយើងភាគច្រើនជួបនៅបញ្ហាប្រេះបបូរមាត់រហូតដល់ចេញឈាមទៀតផង ទោះបីជាពួកគាត់បានញ៉ាំទឹកច្រើន និងបរិភោគបន្លែផ្លែឈើយ៉ាងណាក៏ដោយ ឬក៏ព្យាយាមទិញក្រែមថ្លៃៗ ល្អៗ មកលាបយ៉ាងណាដ៏ដោយ ក៏មិនទទួលបានលទ្ធផលប្រសើរនោះឡើយ។

ហើយការប្រេះបបូរមាត់ វាពិតជាបានផ្តល់ការរំខានដល់ជិវិតរស់នៅប្រចាំថ្ងៃមែនទែន ពិបាកក្នុងការញញឹម ពិបាកក្នុងការនិយាយ ហើយថែមទាំងពិបាកក្នុងការញ៉ាំទឹកទៀតផង។ ហើយលោកអ្នកដឹងទេថា មូលហេតុអ្វីបានជាយើងប្រេះឬស្ងួតបបូរមាត់ជារៀងរាល់ឆ្នាំ ហើយមានវីធីសាស្រ្តអ្វីទើបអាចព្យាបាលបាន?

តាមបទពិសោធន៏របស់កញ្ញា និងការស្រាវជ្រាវបានឱ្យដឹងថា អ្នកដែលមានបញ្ហាប្រេះបបូរមាត់រាល់ឆ្នាំមកពីទម្លាប់នៃការរស់នៅតាំងពីក្មេងមានកង្វះនូវសារធាតុខ្លាញ់ សារធាតុដែក ហើយខ្វះនូវវីតាមីនបេ២ និង បេ៣។ ភាគច្រើនវីតាមីននិងសារធាតុទាំងនេះ មាននៅក្នុងគ្រប់ធញ្ញជាតិ សាច់សត្វ សាច់ត្រី ប្រេងធម្មជាតិដូចជាប្រេងដូង ប្រេងល្ងរ និងប្រេងធម្មជាតិ។

ដើម្បីអាចព្យាបាលជំងឺប្រេះបបូរមាត់ពីខាងក្នុង អ្នកអាចព្យាយាមញ៉ាំស៊ុតឱ្យបានច្រើន ព្រោះស៊ុតទានិងស៊ុតមាត់ មានផ្ទុកនូវប្រូតេអ៊ីននិងវីតាមីនដែលជួយឱ្យបបូរមាត់មានសំណើមវិញ។ លើសតែពីនេះ អ្នកអាចបរិភោគទឹកបន្ថែមឱ្យបានច្រើន បើមានទឹករុក្ខជាតិដែលជាទឹកផ្លែឈើផ្សេងៗកាន់តែល្អ ហើយបើសិនជារបបអាហារប្រចាំថ្ងៃមានប្រើប្រេងដូង ប្រេងល្ងរទៀតនោះ វានឹងចូលទៅចិញ្ចឹមបបូរមាត់របស់យើងឱ្យលែងមានប្រេះវិញផងដែរ។

យ៉ាងណាក៏ដោយ ការអនុវត្តវិធីសាស្រ្តនេះគឺអាចសម្រាប់រយៈពេលវែង បើអ្នកកំពុងតែមានប្រេះមាត់ឬស្ងួត គួរញ៉ាំទឹកឱ្យបានច្រើននិងប្រើក្រែមដើម្បីការពារភ្លាមៗ ព្រោះការប្រេះបបូរមាត់ហើយរបករយៈពេលយូរ អាចបង្ករឱ្យក្លាយជាជំងឺមហារីកស្បែកមាត់ដូចគ្នា៕

អត្ថបទដោយ៖ អឿ​ ស្រីហួយ