ខេត្តសៀមរាប ថ្ងៃទី 12 ខែកញ្ញា ឆ្នាំ 2022 – មូលនិធិ Herbalife Nutrition (HNF) ដែលជាសាជីវកម្មមិនស្វែងរកប្រាក់ចំណេញដែលបានប្តេជ្ញាចិត្តក្នុងការជួយកែលម្អការរស់នៅរបស់កុមារ និងសហគមន៍នៅជុំវិញពិភពលោកបានបន្តជួយគាំទ្រដល់ដៃគូ Casa Herbalife Nutrition របស់ខ្លួននៅក្នុងប្រទេសកម្ពុជា។ ថ្ងៃនេះមូលនិធិ Herbalife Nutrition បានប្រកាសបន្តភាពជាដៃគូជាមួយមន្ទីរពេទ្យកុមារអង្គរ (AHC) ជាមួយនឹងជំនួយហិរញ្ញវត្ថុចំនួន 112,653​ ដុល្លារអាមេរិក ដើម្បីជួយគាំទ្រដល់កម្មវិធីអាហារូបត្ថម្ភកុមាររបស់មន្ទីរពេទ្យកុមារអង្គរ​ដែល​មានគោលបំណងក្នុងការធ្វើឱ្យប្រសើរឡើងនូវស្ថានភាពអាហារូបត្ថម្ភរបស់កុមារមកពីទូទាំងប្រទេស​កម្ពុជា។

មន្ទីរពេទ្យកុមារអង្គរ គឺជាអង្គការថែទាំសុខភាពកុមារដែលមិនស្វែងរកប្រាក់ចំណេញ និងបានកំពុងផ្តល់សេវាថែទាំសុខភាពដោយឥតគិតថ្លៃចាប់តាំងពីឆ្នាំ 1996 មកម្ល៉េះ។ មន្ទីរពេទ្យកុមារអង្គរបានរីកចម្រើនពីមន្ទីរពេទ្យតូចមួយទៅជាអង្គការថែទាំសុខភាពកុមារឈានមុខគេមួយរបស់ប្រទេសកម្ពុជានាពេលបច្ចុប្បន្ន ហើយមានគោលបំណងកែលម្អការថែទាំសុខភាពសម្រាប់កុមារកម្ពុជាទាំងអស់ មិនថាពួកគេរស់នៅទីណា និងកន្លែងណាក៏ដោយ។

ការគាំទ្រពីមូលនិធិ Herbalife Nutrition សម្រាប់គម្រោងក្នុងឆ្នាំ 2022-2023 នេះនឹងអនុញ្ញាតអោយមន្ទីពេទ្យកុមារអង្គរ អាចផ្តល់នូវកញ្ចប់អាហារដែលមានជីវជាតិប្រមាណ 13,000 កញ្ចប់ដល់អ្នកជំងឺ 1,000 នាក់មកពីគ្រួសារដែលមានប្រាក់ចំណូលទាប និងការផ្គត់ផ្គង់កញ្ចប់អនាម័យសំខាន់ៗដល់អ្នកជំងឺដែលងាយរងគ្រោះចំនួន 1,000 នាក់។ លើសពីនេះទៀត 8,400 គ្រួសារនឹងត្រូវបានគាំទ្រក្នុងការបង្កើនចំណេះដឹងផ្នែកអាហារូបត្ថម្ភ​របស់ពួកគេនៅក្នុងមន្ទីរពេទ្យតាមរយៈវគ្គអប់រំអាហារូបត្ថម្ភជាក្រុម ការធ្វើបទបង្ហាញពីការធ្វើម្ហូប ការអប់រំផ្នែកថែសួន ការគាំទ្រអាហារូបត្ថម្ភមួយទល់មួយ និងការប្រឹក្សាអំពីការបំបៅកូនដោយទឹកដោះ។ នៅក្នុងសហគមន៍ជនបទដែលមានអត្រាកង្វះអាហារូបត្ថម្ភខ្ពស់ មន្ទីពេទ្យកុមារអង្គរនឹងផ្តល់ការអប់រំអំពីអាហារូបត្ថម្ភ និងការធ្វើបទបង្ហាញពីការធ្វើម្ហូបដល់ 6,798 គ្រួសារ។

លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យបានមានប្រសាសន៍ថា៖ “ក្នុងនាមមន្ទីរពេទ្យកុមារអង្គរ ខ្ញុំពិតជាមានកិត្តិយសក្នុងការទទួលបានជំនួយឆ្នាំទី ៤ ដែលមានចំនួនរហូតទៅដល់ 112,653 ដុល្លារអាមេរិកពីមូលនិធិ Herbalife Nutrition ។ អំណោយដ៏សប្បុរសនេះនឹងអនុញ្ញាតឱ្យមន្ទីរពេទ្យកុមារអង្គរ បន្តផ្តល់ការព្យាបាលផ្នែកកង្វះអាហារូបត្ថម្ភនៅក្នុងមន្ទីរពេទ្យ និងសហគមន៍ ក៏ដូចជាការផ្តល់ចំណេះដឹងល្អៗអំពីអាហារូបត្ថម្ភ និងសុវត្ថិភាពចំណីអាហារដល់អ្នកជំងឺ និងក្រុមគ្រួសាររបស់ពួកគេ ដើម្បីលើកកម្ពស់សុខុមាលភាពកុមារ។ ការបរិច្ចាគរបស់អ្នកទាំងអស់គ្នា គឺពិតជាសប្បុរសមិនគួរឱ្យជឿហើយនឹងធ្វើឱ្យមានភាពខុសប្លែកយ៉ាងខ្លាំង។ ខ្ញុំសូម​ថ្លែងអំណរគុណយ៉ាងជ្រាលជ្រៅចំពោះមូលនិធិ Herbalife Nutrition សម្រាប់ការបន្តភាពជាដៃគូ និង​គាំទ្រកម្មវិធីអាហារូបត្ថម្ភរបស់មន្ទីរពេទ្យកុមារអង្គរ ក្នុងអំឡុងពេលដ៏លំបាកនេះ។ ជាចុងក្រោយ ខ្ញុំសូមជូន​ពរអ្នកទាំងអស់គ្នាឲ្យមានសុខភាពល្អ និងជោគជ័យគ្រប់ភារកិច្ច”។

ជាមួយគ្នានេះផងដែរ នាយិកាគ្រប់គ្រងក្រុមហ៊ុន Herbalife Nutrition កម្ពុជា អ្នកស្រី ឈុន ណៃឈីវ បានមានប្រសាសន៍ថា៖ “ខ្ញុំមានកិត្តិយសក្នុងការតំណាងឱ្យមូលនិធិ Herbalife Nutrition ដើម្បីបន្តភាពជាដៃគូឆ្នាំទី 4 រវាង មូលនិធិ Herbalife Nutrition និង មន្ទីរពេទ្យកុមារអង្គរ ស្របពេលដែលយើងកំពុងបន្តជួយកែលម្អជីវិត និងអាហារូបត្ថម្ភរបស់កុមារដែលត្រូវការជំនួយ។ ខ្ញុំសូមឆ្លៀតក្នុងឱកាសនេះ ដើម្បីថ្លែងអំណរគុណដល់ម្ចាស់ជំនួយរបស់យើងទាំងអស់សម្រាប់ការប្តេជ្ញាចិត្ត និងទឹកចិត្តរបស់ពួកគេក្នុងការផ្តល់ត្រឡប់ទៅសហគមន៍របស់​ពួកគេ ជាពិសេសក្នុងអំឡុងពេលបញ្ហាប្រឈមទាំងនេះ”។

ព័ត៌មានបន្ថែមអំពីមូលនិធិ Herbalife Nutrition (HNF)

ចាប់តាំងពីឆ្នាំ 2005 មក មូលនិធិ Herbalife Nutrition (HNF) ដែលជាអង្គការមិនរកប្រាក់ចំណេញសកល 501(c)(3) បានប្តេជ្ញាក្នុងការកែលម្អជីវិតរបស់កុមារ និងសហគមន៍ជុំវិញពិភពលោក។ មូលនិធិ Herbalife Nutrition គាំទ្រដៃគូអាហារូបត្ថម្ភ Casa Herbalife ដែលមានមូលដ្ឋាននៅសហគមន៍ជុំវិញពិភពលោក ដែលជួយនាំមកនូវអាហារូបត្ថម្ភល្អដល់សហគមន៍ដែលងាយរងគ្រោះក្នុងសង្គម ក៏ដូចជាអង្គការដែលផ្តោតលើការលើកកម្ពស់លទ្ធភាពទទួលបានការអប់រំ និងការពង្រឹងអាហារូបត្ថម្ភល្អ សុខភាពទូទៅ និងការសង្គ្រោះគ្រោះមហន្តរាយ។ សម្រាប់ព័ត៌មានបន្ថែមអំពី មូលនិធិ Herbalife Nutrition និងរបៀបដែលអ្នកអាចគាំទ្រកម្មវិធី សូមចូលទៅកាន់គេហទំព័រ www.herbalifenutritionfoundation.org​​។