ក្មេងឆាប់លូតកម្ពស់ខ្ពស់ស្រឡះគឺជាក្ដីបំណងប្រាថ្នារបស់ប៉ាម៉ាក់គ្រប់រូប ខណៈការដែលធ្វើឲ្យឆ្អឹងក្មេងរឹងមាំ និងលូតកម្ពស់ ទាមទារឲ្យកុមារត្រូវទទួលបានជាតិកាល់ស្យូម និងវីតាមីន D គ្រប់គ្រាន់ពីរបបអាហារ និងការធ្វើលំហាត់ប្រាណជាប្រចាំ ដើម្បីកសាងឆ្អឹងពួកគេ។
ជាក់ស្ដែងយោងតាមការចុះផ្សាយរបស់គេហទំព័រ Vnexpress បានឲ្យដឹងថា កាលណាឆ្អឹងដែលមានសុខភាពល្អគឺជួយកុមារអភិវឌ្ឍកម្ពស់បានល្អលឿនបំផុត។ នេះក៏ជាកត្តា៣ ដែលជួយកុមារការពារឆ្អឹងខ្សោយក្នុងពេលពេញវ័យ ផ្តល់សារធាតុចិញ្ចឹម និងពង្រឹងឆ្អឹងឲ្យកាន់តែលូតលាស់កាន់តែលឿនដូចខាងក្រោម៖
១. ញ៉ាំអាហារសម្បូរជាតិកាល់ស្យូម៖ កាល់ស្យូមគឺជាសារធាតុចិញ្ចឹមដែលជួយកសាងឆ្អឹង ត្រូវបានរកឃើញនៅក្នុងផលិតផលទឹកដោះគោ សណ្តែក គ្រាប់ធញ្ញជាតិ និងបន្លែស្លឹកបៃតង។ ឪពុកម្តាយត្រូវឲ្យកូនបរិភោគអាហារដែលសម្បូរទៅដោយជាតិកាល់ស្យូម ដើម្បីបង្កើនមីក្រូសារជាតិនេះសម្រាប់កូនៗ។ ទោះជាយ៉ាងណាក៏ដោយ អ្នកគួរតែទៅជួបវេជ្ជបណ្ឌិតចៀសវាងការឲ្យបរិភោគលើសបរិមាណក្នុងខ្លួនណាមួយ។
២. ធ្វើលំហាត់ប្រាណ៖ សាច់ដុំ និងឆ្អឹងកាន់តែរឹងមាំនៅពេលដែលកុមារធ្វើលំហាត់ប្រាណជាទៀងទាត់ដូចជាការដើរ រត់ លោត លោតខ្សែពួរ។ ខណៈលំហាត់ប្រាណលើកទម្ងន់គឺបានបង្កើនផលប៉ះពាល់ដល់ឆ្អឹងក្មេង។ កុមារតូចៗអាចធ្វើសកម្មភាពរាងកាយបានប្រហែល៣០នាទីក្នុង១ថ្ងៃ ឪពុកម្តាយគួរតែលើកទឹកចិត្ត និងហាត់ប្រាណជាមួយកូនៗ ដើម្បីឲ្យពួកគេមានអារម្មណ៍រំភើប និងប្រឹងប្រែងហាត់ប្រាណកាន់តែខ្លាំង។
៣. បន្ថែមវីតាមីន D ៖ កុមារតូចៗត្រូវការវីតាមីន D ៦០០ IU ក្នុង១ថ្ងៃ តាមរយៈ អាហារ អាហារបំប៉ន ស្រូបកម្ដៅព្រះអាទិត្យ ដើម្បីជួយទាះយកជាតិកាល់ស្យូមបានល្អប្រសើរ។ ខណៈវីតាមីន D នេះមានតែក្នុងអាហារមួយចំនួនដូចជា ស៊ុតលឿង ត្រីសាម៉ុង ត្រីសាឌីន ទឹកដោះគោ។ ម្យ៉ាងទៀតវីតាមីន D ត្រូវបានផលិតដោយធម្មជាតិ នៅពេលដែលស្បែកត្រូវពន្លឺព្រះអាទិត្យឪពុកម្តាយត្រូវឲ្យកូនហាលថ្ងៃនៅព្រឹកព្រលឹមរហូតដល់៣០នាទីដែលក្មេងអាយុក្រោម៦ឆ្នាំ មិនគួរប្រើឡេការពារកម្តៅថ្ងៃទេ ៕
អត្ថបទដោយ៖ ស្រីណុច