ជឿថាមនុស្សមួយចំនួនមានទម្លាប់ចូលចិត្តកក់សក់នៅពេលយប់ ពីព្រោះជាពេលដែលពួកគេសម្រាកពីការងារ ហើយការកក់សក់នៅពេលយប់គឺធ្វើឱ្យមានអារម្មណ៍ត្រជាក់ខួរក្បាល និងស្រស់ស្រាយ។ ជាការពិតណាស់ ការកក់សក់ពេលយប់គឺមិនបង្កជាបញ្ហានោះទេ ប៉ុន្តែអ្វីដែលជាបញ្ហានោះគឺថា អ្នកកក់សក់ពេលយប់ ហើយចូលគេងមិនបានផ្លុំសក់ឱ្យស្ងួត ចូលគេងទាំងសក់និងស្បែកក្បាលនៅសើម ទម្លាប់ទាំងនេះគឺគ្រោះថ្នាក់ខ្លាំងណាស់ដល់ស្បែកក្បាល។

យោងតាមការណែនាំពីគេហទំព័រ healthline បានឱ្យដឹងថា នៅពេលអ្នកកក់សក់ម្តងៗ គឺធ្វើឱ្យរន្ធញើសនៅតាមសរសៃសក់របស់អ្នកបើក ហើយបញ្ចេញកម្តៅពីក្នុងស្បែកក្បាលឱ្យចេញមកក្រៅ។ អំឡុងពេលដែលកម្តៅកំពុងតែបញ្ចេញមកខាងក្រៅ ហើយសក់និងស្បែកក្បាលទៅសើម តែអ្នកបែរជាទៅគេងនោះ វាធ្វើឱ្យស្ទះរន្ធញើស កម្តៅចេញមិនអស់ បង្កឱ្យស្បែកក្បាលងាយប្រឈមនឹងការកើតអង្គែ ហើយវិវិត្តទៅជាកើតជំងឺផ្សិតស្បែកក្បាល។

ជំងឺផ្សិតស្បែកក្បាល មួយប្រភេទឈ្មោះថា Malassezia វាបង្កឡើងដោយអង្គែរ ការរលាក និងមេរោគដែលទុំជាប់ជាមួយស្រោមខ្នើយដែលយើងកើយ។ ស្រោមខ្នើយឬខ្នើយដែលអ្នកកើយរាល់ថ្ងៃប្រសិនជាអ្នកមិនបានសម្អាតវាឱ្យស្អាតទេនោះគឺប្រភេទមេរោគផ្សិត និងប៉ារ៉ាស៊ីត វានៅទុំជាប់នៅទីនោះ ហើយនៅពេលដែលអ្នកគេងទៅលើខ្នើយទាំងស្បែកក្បាលឬសក់នៅសើមនោះ មេរោគផ្សិតដែលទុំជាប់នៅលើខ្នើយនិងឆ្លងចូលមកស្បែកក្បាលយើងមិនខាន។

ជាមួយគ្នានេះដែរ បើតាមការបញ្ជាក់ពីអ្នកឧកញ៉ា វេជ្ជបណ្ឌិត គួច ម៉េងលី បានឱ្យដឹងថា ការថែរក្សាស្បែកក្បាលនិងសរសៃសក់ គឺអ្នកមិនត្រឹមតែជ្រើសសាប៊ូកក់សក់ល្អៗមកកក់តែមួយមុខគ្រប់នោះទេ។ អ្នកត្រូវសម្អាតស្រោមខ្នើយ និងកន្លែងគេងរបស់អ្នកឱ្យបានស្អាត កុំឱ្យមានមេរោគ និងប៉ារ៉ាស៊ីតនៅទុំជាប់។ ស្រោមខ្នើយកើយ និងកម្រាលពូកជាដើម អ្នកត្រូវបោកសម្អាតយ៉ាងហោចណាស់ ២ដងក្នុង១សប្តាហ៍។

បន្ថែមពីលើនេះទៀត ការគេងទាំងសក់នៅសើម មិនត្រឹមតែធ្វើឱ្យស្បែកក្បាលរបស់អ្នកកើតជំងឺផ្សិតនោះទេ វាថែមទាំងធ្វើអ្នកឈឺ ផ្តាសាយញឹកញាប់ ធ្វើឱ្យសក់បែកចុង ទោះអ្នកខំសក់សាប៊ូល្អយ៉ាងណា ក៏មិនអាចព្យាបាលបានដែរ។ ដូច្នេះប្រសិនជាអ្នកកំពុងតែមានទម្លាប់ចូលគេងទាំងសក់នៅសើម សូមអ្នកប្រញាប់បញ្ឈប់ទម្លាប់នេះភ្លាម ពីព្រោះវាគ្រោះថ្នាក់ណាស់សម្រាប់ស្បែកក្បាល ហើយបើករណីអ្នកមានអង្គែរនៅលើស្បែកក្បាលក្រាស់ កក់សាប៊ូអ្វីក៏មិនបាត់អ្នកគួរទៅពិភាក្សា​ជាមួយគ្រូពេទ្យសើរស្បែកឱ្យបានឆាប់ ដើម្បីទប់ស្កាត់កុំឱ្យអង្គែរនោះវិវត្តទៅជាផ្សិត៕

អត្ថបទដោយ៖ មឿន គន្ធា