ស្ត្រេស មិនសប្បាយចិត្ត ជួបវិបត្តិផ្លូវចិត្ត គ្មាននរណាអាចគេចផុតពីអារម្មណ៍ និងស្ថានភាពផ្លូវចិត្តទាំងនេះទេ ប្រសិនបើនៅមានជីវិតរស់នៅក្នុងពិភពលោកមួយនេះ។ វិបត្តិផ្លូវចិត្ត ប៉ះទង្គិចផ្លូវអារម្មណ៍ នរណាក៏ជួបដែរប៉ុន្តែអ្វីដែលអ្នកអាចធ្វើបាន គឺមិនមែនរត់គេចចេញពីអារម្មណ៍ទាំងនេះទេ ប៉ុន្តែអ្នកត្រូវចេះគ្រប់គ្រងវា ដោយកុំបណ្តោយឱ្យវាប៉ះពាល់ដល់ជីវិតរស់នៅប្រចាំថ្ងៃរបស់អ្នកឱ្យសោះ។ មួយក្នុងចំណោមវិធីជាច្រើនដើម្បីកម្ចាត់អារម្មណ៍មិនល្អ បញ្ហាផ្លូវចិត្តនានា គឺការជ្រើសរើសអាហារញ៉ាំត្រឹមត្រូវ។ អ្នកជំនាញបានណែនាំអាហារមួយចំនួនដូចខាងក្រោម ដែលអ្នកគួរតែញ៉ាំដើម្បីកាត់បន្ថយបញ្ហាផ្លូវចិត្ត និងជំងឺថប់អារម្មណ៍ផ្សេងៗ។

បើយោងតាមអ្នកជំនាញផ្នែកអាហារ Courtney Barth ដែលបានសិក្សាចុះផ្សាយនៅក្នុងគ្លីនិក Cleveland បានឱ្យដឹងថា អាហារមានទំនាក់ទំនងយ៉ាងល្អក្នុងការជួយកាត់បន្ថយអ័រម៉ូនCortisol ដែលជាអ័រម៉ូនបញ្ចេញមកពេលស្ត្រេស និងតានតឹងផ្លូវចិត្ត។ នៅពេលដែលអ្នកស្ត្រេសក្នុងរយៈពេលខ្លី អ័រម៉ូនCortisolនឹងបញ្ចេញមកដើម្បីរក្សាឱ្យអ្នកមានតុល្យភាព ផ្ទុយទៅវិញបើអ្នកស្ត្រេសរយៈពេលយូរអ័រម៉ូនCortisol ក៏ក្លាយជាតួអាក្រក់ភ្លាម ពោលគឺវាអាចធ្វើឱ្យសម្ពាធឈាមឡើងខ្ពស់ និងប៉ះពាល់ដល់ផ្នែកជាច្រើនទៀត។ ហេតុនេះហើយ Courtney Barth ពន្យល់ថាវាគឺជារឿងចាំបាច់ណាស់ ដែលអ្នកត្រូវគ្រប់គ្រងអ័រម៉ូនCortisolឱ្យមានតុល្យភាព។

អ្នកជំនាញផ្នែកអាហារ Courtney Barth ក៏បានឱ្យដឹងពីអាហារមួយចំនួន ដែលអាចជួយកាត់បន្ថយកម្រិតអ័រម៉ូនCortisolបាន រួមមានដូចខាងក្រោម។

·     អាហារសម្បូរវីតាមីនប៊ី៖ គ្រាប់ធញ្ញជាតិ និងប្រភេទសាច់សត្វមួយចំនួន សម្បូរវីតាមីនB ច្រើនណាស់ ជាពិសេសវីតាមីនB12 ដែលអាចជួយដល់ការរំលាយរបស់អ័រម៉ូនcortisol។ ពពួកនេះមាននៅក្នុង សាច់គោ, សាច់មាន់, គ្រាប់ធញ្ញជាតិ, ស៊ុត និងគ្រឿងក្នុងសត្វជាច្រើនទៀត។

·     អាហារសម្បូរអាស៊ីតខ្លាញ់អូមេហ្កា៣៖ ពពួកអាហារទាំងនេះអាចកាត់បន្ថយការរលាកបានល្អណាស់។ អ្នកជំនាញផ្នែកអាហារ Courtney Barth មានប្រសាសន៍ថាភាគច្រើននៃអូមេហ្កា៣នេះ គឺរកបាននៅក្នុងខ្លាញ់ត្រី ប៉ុន្តែវាក៏មាននៅសាច់សត្វផ្សេងៗទៀតដែរ។ ពោលគឺ នៅក្នុងផ្លែប័រ, គ្រាប់ឈៀរ, ត្រីសមុទ្រ, ប្រេងអូលីវ, អយស្ទ័រ, ត្រីសាលម៉ុន, ត្រីសាលឌីន, ត្រីធូណា និងគ្រាប់ធញ្ញជាតិផ្សេងៗទៀតផងដែរ។

បន្ថែមពីនេះអ្នកអាចញ៉ាំអាហារដែលសម្បូរប្រូតេអ៊ីនខ្ពស់, អាហារជំនួយដល់ការរំលាយអាហារ និងពពួកអាហារដែលសម្បូរជាតិម៉ាញ៉េស្យូម។ កាន់តែមិនអាចរំលងបានទៀតនោះ អ្នកមិនត្រូវញ៉ាំអាហារដូចជា ជាតិកាហ្វេអ៊ីន, ជាតិអាល់កុល, អាហារមានជាតិស្ករខ្ពស់ និងសូដា នៅពេលដែលផ្លូវចិត្តអ្នកកំពុងស្ត្រេស កំពុងធុញថប់ ឬមានបញ្ហាផ្សេងៗទៀតនោះទេ៕

អត្ថបទដោយ៖ កញ្ញា លីហួយ