អ្នកកើតជំងឺមហារីក និងទឹកនោមផ្អែមមានការកើនឡើង។ តាមរដ្ឋមន្ត្រីក្រសួងសុខាភិបាល លោក ឈាង រ៉ា បានទទួលស្គាល់ថា កម្ពុជាមានមនុស្សម្នាក់ស្លាប់ដោយជំងឺមហារីកនៅរៀងរាល់ ៤០នាទីម្តង ឬប្រមាណ ៣៨នាក់ក្នុងមួយថ្ងៃៗ។ ការដោះស្រាយជំងឺមហារីកនៅកម្ពុជានៅមានកម្រិត និងថាជំងឺមហារីកនឹងឆក់យកជីវិតពលរដ្ឋខ្មែរក្នុងចំនួនមួយខ្ពស់ ក្នុងរយៈពេល ១៥ឆ្នាំខាងមុខ។ ចំណែកជំងឺទឹកនោមផ្អែមមានអ្នកប្រើសេវាព្យាបាលជំងឺទឹកនោមផ្អែមក្នុងឆ្នាំ២០២៤ បានកើនឡើង៥៩,១៨% នេះបើធៀបនឹងឆ្នាំ២០២៣។ ក្នុងនោះអ្នកជំងឺថ្មីមានចំនួនជាង២៣ ម៉ឺននាក់ ខណៈអ្នកជំងឺទឹកនោមផ្អែមសម្រាកព្យាបាលនៅមន្ទីរពេទ្យមានចំនួនជាង១ម៉ឺន៧ពាន់នាក់ ពោលគឺកើនឡើង៤៣,២៥%”។ នេះជាហានិភ័យធំមួយ អ្នកគួរមានទម្លាប់នេះការពារជំងឺទឹកនោមផ្អែម។ ផ្លែឈើ ១នេះជួយការពារជំងឺមហារីក និងទឹកនោមផ្អែមគឺផ្លែប៉ោមនេះឯង។
ចំពោះជាតិស្ករដែលអ្នកហូបផ្អែមៗ ជាប្រចាំថ្ងៃនេះ ក៏ជាកត្តាមួយនាំឱ្យជំងឺទឹកនោមផ្អែម និងមហារីកដែរ។ គ្រាន់តែអ្នកហូបផ្លែប៉ោមនៅពេលព្រឹក វាជួយស្រូបជាតិស្ករចេញពីសរសៃឈាមបានល្អបំផុត។ យោងតាមគេហ័ទំព័រសុខភាពអន្តរជាតិ National Institutes of Health បានចុះផ្សាយថា ផ្លែប៉ោមមានសារធាតុ polyphenol phloretin មានសមត្ថភាពជួយរារាំងការលូតលាស់កោសិកាមហារីកឈានមុនគេលំដាប់ទី២។ ក្រុមសារធាតុ phloretin អាចជម្រុញឱ្យមានការចាប់ខ្លួនកោសិកាក្នុងដំណាក់កាល G0/G1 ឱ្យស្លាប់កោសិកា apoptotic ដើម្បីការពារហានិភ័យទាបចំពោះជំងឺមហារីកសុដន់។
សម្រាប់អ្នកមិនទាន់កើតជំងឺទឹកនោមផ្អែមវិញ ការញ៉ាំផ្លែប៉ោមពេលព្រឹកជួយពង្រឺងរាងកាយ ដេញជាតិស្ករចេញពីរាងកាយ។ យោងតាមគេហទំព័រ Healthline បានបញ្ជាក់ឱ្យដឹងថា នៅក្នុងផ្លែប៉ោមមួយនេះ មានសារធាតុបី ទីមួយ Quercetin អាចកាត់បន្ថយល្បឿនជាតិស្ករពីអាហារកាបូអ៊ីដ្រាត ឬស្រូបជាតិស្ករចេញពីអាហារ។ ទីពីរ Chlorogenic acid ជួយឱ្យរាងកាយប្រើប្រាស់ជាតិស្ករមានប្រសិទ្ធភាពជាងមុន។ ទីបី Phlorizin ជួយកាត់បន្ថយជាតិស្ករបែបគីមី ឬពីអាហារកែច្នៃ ហើយជួយបន្ថែមជាតិស្ករធម្មជាតិដល់ចរន្តឈាមឡើងវិញផងដែរ។
ដូច្នេះ! អ្នកត្រូវមានទម្លាប់មួយចំនួនទៀត ដើម្បីការពារជំងឺមហារីក និងការពារជំងឺទឹកនោមផ្អែម អ្នកត្រូវមានរបបអាហារបែបធម្មជាតិ ដូចជាត្រី បន្លែ និងផ្លែឈើជាច្រើន។ ហើយមានទម្លាប់ហាត់ប្រាណ និងគេងឱ្យបានគ្រប់បន្ថែម ដើម្បីពង្រឹងរាងកាយរឹងមាំ ជួយបញ្ចុះជាតិស្ករ និងប្រឆាំងជំងឺជាច្រើនមុខ៕ អត្ថបទដោយ៖ ទ្រ សុភាព